24. desember 2007

Hátíð í bæ

Kæru vinir og vandamenn sem rata inn á þessa síðu.

Gleðilega jólahátíð!

Hafið það sem allra best í dag og næstu daga,

jólknús og milljón kossar

Lára

20. desember 2007

Að gleðjast yfir því að geta glaðst

ég er búin að bíða eftir jólakyrrðinni sem kemur yfirleitt alltaf. búin að bíða eftir augnablikinu þegar hjartað hættir að slá svona fast og ég leyfi mér að gleyma mér.

jólin í mínum huga eru tími fjölskyldu og vina - tími til að njóta þess sem maður hefur og þakka fyrir sig. ég er þakklát fyrir margt í ár, börn sem fæddust heilbrigð, börn sem urðu til og eru væntanleg með vorinu, vináttubönd sem styrktust og önnur sem mynduðust óvænt, heilsuna og sjálfstæðið (já ég veit, kannski skrýtið :)

ég get glaðst og gleðst yfir því

19. desember 2007

Hard things

Þetta er svo fallegt lag..

Hard things you said to me
Of monsters beneath your sea
That lurk in the dark deep abyss.
Hard things you told me of
A cold and a bitter frost
That bites at your feet while we kiss...

And so we ran away from the storm
Your feet on my belly, to keep you warm
You’ve got to learn,
Soon we’ll both learn, to let go of our pain...

And to think (I thought you needed time to think...)

Warmth I can give to you
To last us the whole night through
I’ll scatter your bad dreams away
And all of our sorrows and all of our banes
Will make like the snowflakes and melt in the rain.
And leave us the puddles to play

Þið getið hlustað á það og fleiri góð hér

18. desember 2007

Eigum við að ræða þetta eitthvað?

Uppáhalds jólalagið mitt í ár en maðurinn er greinilega búinn að tapa sér!

17. desember 2007

Forðist mig

Samstarfskona mín var að ljúka samtali við afar óliðlegan mann sem svarar fyrir þetta gistiheimili. Málið snérist um einfaldan hlut vegna herbergis sem hún afpantaði en fær ekki endurgreiðslu því hún pantaði ekki í gegnum síma. Hún reyndi að panta í gegnum síma, margoft, en aldrei var svarað og benti maðurinn henni þá á að skipt hefði verið um símkerfi. Sem sagt, skítapleis með lélegar afsakanir.

Eins og umsagnirnar benda á mæli ég með því að fólk forðist Travel Inn og beini viðskiptum sínum annað.

16. desember 2007

Jólahlaðborð

ég smyglaði mér í jólahlaðborð í gær. ég mætti með köku svo mér var hleypt inn ;)
Ótrúlegustu málefni flugu þarna um stofuna og flest þeirra vil ég ekkert hafa eftir hér - hver veit nema börn rambi inn á þessa síðu! Kalkúnn, svartfugl, hangikjöt (3 mismunandi gerðir), snilldar meðlæti og kakan hjá Eilífi og Kára var mjög góð - þó svo að þeir hafi ekki gert hana sjálfir ;D
Takk fyrir mig öll sömul - ég er ennþá södd!

Var að koma úr 1. árs afmæli Jóhönnu Margrétar og vakt púsluspilið sem ég kom með mikla athygli hjá afmælisbarninu, kannski þó bara vegna þess að pakkarnir á undan voru mjúkir.

Jólaskapið er að renna á mig - nú verður jólamynd á dag fram til aðfangadags!!

15. desember 2007

jóla jóla jóla

ég lagðist í stutt en leiðinleg veikindi... held ég sé að verða ímyndunarveik, en þar hef ég ekki tærnar þar sem Guðjón minn hefur hælana! Hann er hypochondriac af guðs náð og veit af því!

ég veit stundum ekki hvað ég á að skrifa inn í jólakort. ég held að stundum sé ég jafnvel of væmin eða of snubbótt - ég skrifa bara það sem mér dettur í hug þá stundina og allt er það vel meint :)

mamma er að spila 'Let it snow' frammi í eldhúsi... dýrka það lag.

er á leiðinni að kaupa jólatré með ma, pa, steinunni sys og ágústi. Í fyrra þóttist ég ætla að troða barninu í gegnum netavélina. honum var ekki skemmt. held ég taki þann brandara ekki með í ár!

12. desember 2007

Er þetta hægt?

Ég ætla að biðja fólk um að lesa þessa færslu, ef það er ekki búið að því nú þegar.
Þessi unga kona fór til Bandaríkjanna og lenti í vægast sagt leiðinlegri lífsreynslu við komuna til landsins.

http://erla1001.blog.is/blog/erla1001/entry/388660/

11. desember 2007

nammi namm :)

You Are Apple Pie

You're the perfect combo of comforting and traditional.
You prefer things the way you've always known them.
You'll admit that you're old fashioned, and you don't see anything wrong with that.
Your tastes and preferences are classic. And classic never goes out of style.

Those who like you crave security.
People can rely on you to be true to yourself - and true to them.
You're loyal, trustworthy, and comfortable in your own skin.
And because of these qualities, you've definitely earned a lot of respect.

10. desember 2007

Upptyppingar



Það er eitthvað pínu sexý við svona jarðskjálftahrinu




9. desember 2007

jólafríð nálgast...

ég og mummi kláruðum verkefnið okkar áðan svo ég er komin í jólafrí frá skólanum. Það er nú reyndar ekki upp á marga fiska því ég þarf að skila verkefni 10. janúar - skítt.

ég er búin að ganga frá nokkrum jólagjöfum, skrifa helming jólakortanna og byrjuð á jólahreingerningunni (betur þekkt sem 'færum þessa hrúgu af drasli þangað sem við sjáum hana ekki' prógrammið) svo ég get farið að horfa á eitthvað af þessum jólamyndum mínum ;)

ég gleymdi auðvitað bestustu myndinni minni á listanum um daginn - The Nightmare before Christmas e. Tim Burton... schnilldarmynd þar á ferð og ég fæ alltaf 'this is halloween' á heilann þegar ég hugsa um hana!!

damn, nú langar mig að kíkja á hana...

8. desember 2007

(ó)farir?

Piparkökumótin mín komu loksins.. ég nennti ekki að baka fleiri piparkökur svo ég ákvað að bara eitthvað sem heita 'sugar cookies' og bragðast mitt á milli vanilluhringja og kúrenukaka (mínus kúrenur)

deigið var of lint, svo var það of hart, svo bakaði ég nokkrar kökur og þær voru of harðar og næstu voru og þykkar svo þær voru mis líka..

ég gafst eiginlega upp en á þó nokkrar sem hægt er að gera sætar með því að smyrja á þær flórsykurkremi og borða þær í myrkri...

ég vaknaði allt of snemma í morgun og nú er ég búin á því en er á leið í jólaleiðangur... minn er þreyttur


p.s. ég ætla að láta blessa íbúðina mína - presturinn er klár í verkið.

6. desember 2007

Don't tap it - wack it!


Þetta er ótrúlega gott (Lisa, I know you'll agree!)
Það besta er að maður þarf að buffa þennan bolta til þess að hann "brotni" í súkkulaði/appelsínubáta ;)

4. desember 2007

Prestablogg

Ég les bloggið hans séra Svavars og finnst hann oft hitta naglann á höfuðið og oft er gott að lesa falleg og hlý orð í garð náungans þegar manni er kalt eða þykir myrkrið og mikið.
Í gær skrifaði hann um orðin 'Varúð! Prestur!' sem höfðu verið skrifuð aftan á bílrúðu séra Óskars og skrifar hann pistil í kringum það sem ég hvet ykkur til að lesa.

Ég ætla hins vegar að biðja fólk um að stilla sig þegar kemur að athugasemdum, því trúmál eru hitamál eins og sjá má á athugasemdum við pistilinn hans....

3. desember 2007

Niðurtalningin hefst

Já jólin koma víst alltaf á endanum, sama hvort maður er búinn að baka, þrífa, pakka inn gjöfunum, senda jólakortin og hvaðeina...
Ég og mútta erum búnar að baka, ég eina sort og hún 5! Svo gerðum við piparkökur saman, en það hallar nú aðeins á hana, ekki satt? Dugleg mamma ;)

Ég á eftir að skella jólakortunum í póst og taka netta jólahreingerningu á herbergið en það kemur allt saman. Fyrst þarf ég að skila inn ritgerð með Mumma en við höfum viku til að klára hana og þá ætla ég aldeilis að leyfa jólabarninu að dafna.

í fyrra setti ég inn lista yfir jólabíómyndir sem ég vil helst horfa á í desember eða milli jóla og nýárs og í ár er engin breyting.. í fórum mínum á ég nú:
-While you were sleeping
-Love actually
-The Holiday
-White Christmas
-The Grinch

Auk þess sem ég horfi oft á LOTR um jólin, því þær voru allar frumsýndar um jól.

Íbúðin gengur alveg ótrúlega vel en það er löngu orðið ljóst að ég flyt ekki inn fyrir jól. Næsta pressa er að klára fyrir afmælið mitt í janúar svo krossleggið nú puttana með mér. Svefnherbergið er tilbúið undir málningu og parket, hurðirnar eru að koma, flísarnar eru líka komnar svo það vantar bara eldhúsinnréttinguna og svo alla vinnuna ;)

Þorláksmessa ætti að vera athyglisverð - ekki einungis verða úrslit í dansþættinum Strictly come dancing heldur tekur Barcelona á móti Real Madrid á heimavelli og það er ruuuuusalegt! Stemmarinn á áhorfendabekkjunum er ólýsanlegur og ekki spillir fyrir ef Smárinn fær að vera inná...

26. nóvember 2007

að hafa fortíðina að baki sér

Ég hef verið að lesa gamlar bloggfærslur síðustu daga og mikið hef ég hlegið og grátið til skiptis. nóvember síðustu ár:

25. nóvember 2004 Góðar fréttir og slæmar
góðu fréttirnar eru þær að ég er að lesa með fyndnari bókum sem ég hef á ævinni lesið; "eats, shoots and leaves - the zero tolerance to punctuation".. ef þið hafið húmor fyrir lélegum staðsetningum á kommum og punktum og þess háttar merkjum þá er þessi flott.. slæmu fréttirnar eru þær að það er fyrirlestur eftir um klukkutíma og ég er að fá stress kast! vantar að róa mig aðeins, sérstaklega þar sem við erum búnar að öllu.. gef mér gott klapp á bakið *klapp klapp* verð að þjóta, þarf að fá mér vatn að drekka og lesa yfir glærurnar aðeins :)

28. nóvember 2005 'Við vorum orðin svo stressuð að koma hingað'
þetta sagði Jónsi í Sigur Rós rétt áður en tónleikunum lauk í höllinni í gær.. öö þau hefðu alveg getað sparað sér þetta stress því þetta var ÓTRÚLEGT!!!!! Ég er samt ekkert smá fegin að ég var í stúku en ekki í maurahafinu á gólfinu eins og allir 'litlu krakkarnir'. Sviðsframkoman, öll umgjörðin í kringum tónleikana, ljósin, myndbrotin sem er varpað á tjaldið bakvið þá - allt saman small eins og flís við rass og maður fór í gegnum allan tilfinningaskalann bara. Ég held ég hafi verið með gæsahúð meirihlutann af þeim 2 og hálfum tíma sem þeir voru á sviðinu og geri aðrir gott betur!öll, öll, öll uppáhaldslögin mín fengu að hljóma um salinn -er hægt að biðja um eitthvað betra?

19. nóvember 2006 "Hver heldurðu að þú sért Bastian?! Bæjarfógetinn?"
Ég fór í leikhús á föstudaginn á Herra Kolbert eins og ég minntist hér á og ég verð að segja að það kom mér skemmtilega á óvart. Ég hafði séð brot úr því á N4 rétt fyrir frumsýningu og var með vissar efasemdir en hristi þær af mér eftir 10 mínútur af leikritinu. Þessir leikarar eru ótrúlegir, leikritið sjálft fyndið og örlítið átakanlegt um leið og það stuðar mann í endann. Mæli með þessari sýningu en það er víst bara sýnt fram að jólum. (já og fyrirsögn bloggsins er einmitt úr leikritinu)
Í gær fór ég svo í bíó á Bond og annan eins Bond hef ég ekki séð. Hann er svo mikill karlmaður að mann svimar bara. Ó já! Myndatakan er frábær, mér fannst sagan líka alveg ágæt (þó það truflaði mig pínu að þetta átti að vera forsaga sem gerðist samt í nútímanum.. hmm)og Bond-pían skemmtileg. Mæli með henni, en athugið að hún er 2 1/2 klst.


Fyndið að glugga svona í hugsanir manns árum seinna... svona er lífið skrýtið

22. nóvember 2007

Af bílum

Ég held ég hafi get mistök...
Ég hefði að sjálfsögðu átt að kaupa mér sport útgáfuna af Aygo





Já eða splæst í Dj- útgáfuna




Verst er samt að ég var að komst að því að Aygo (dregið af I-go) var svona samstarfsverkefni milli Toyota, Citroën og Peugeot árið 2005 og eru Citroën C1 og Peugeot 107 framleiddir með Aygo í Tékklandi.

Sjáið þið sauðasvipinn?






21. nóvember 2007

Af regnbogum, föllum og gönguljósum

Fyrsta fall vetrarins er staðreynd!
Ég fór í kaffi til Önnu og Jens á sunnudaginn og ákvað að labba í stað þess að vera alltaf á bílnum. Ekki gekk það betur en svo að á leiðinni heim, þar sem ég gekk í sakleysi mínu niður Oddeyrargötuna þá steig ég ógætilega niður og flaug á rassinn! Sem betur fer var enginn þarna því ég hló eins og fáviti, klöngraðist á fætur og labbaði svo flissandi ofan í bringu alla leiðina heim.

Ég náði að næla mér í svæsna kvefpest um helgina og er enn hóstandi og hnerrandi öllum regnbogans litum ásamt því að kafna næstum í svefni. Hressandi. Svo hljóma ég líka eins og konukarl. Í gær þekkti samstarfskona mín mig ekki og þegar Mummi hringdi í mig hélt hann að ég væri nývöknuð. Ótrúlega fínt ;) Ég ætla samt í ræktina á eftir og vona að ég geti hrist eitthvað upp úr lungunum.

Ég tók eftir dálitlu í vor sem ég gleymdi alltaf að blogga um. Á ljósunum hjá BSO sem ég geng alltaf yfir þegar ég kem úr bænum hefur einhver listamaðurinn skellt tveimur svörtum doppum á rauða kallinn. Hvar, heyri ég ykkur hugsa, jú á bringuna. Við Akureyringar skörtum því mjög kvenlegum gönguljósum og ég brosi alltaf ósjálfrátt þegar ég lít upp á rauða ljósið og sé brjóstagóða konuna standa teinrétta og meina mér að ganga yfir götuna.

11. nóvember 2007

Blitz-blogg

Var að koma úr mat frá Önnu og Jens og stend á blístri!
Takk fyrir hangikjötið og kökuna - ljúffengt alveg :)

Annars er ég búin að vera ein heima og vinna í MA-ritgerðinni og velt ýmsu fyrir mér, eins og að

*það á að rassskella fólkið sem "þýddi" Toys'R'Us bæklinginn
*Pétur Ben er algjört krútt (gaman að lenda óvænt á kaffihúsi með þeim Mugison)
*Sunnudagsbíó á Rúv er tærasta snilld
*hundar eru algjört möst fyrir einhleypar konur og mig langar í einn slíkan (helst labrador ;)
*Dr. Phil er vanmetinn (hehehe)
*ég hlakka til að sjá Ökutíma

love love love úr köldu gettóinu,
Laura Ingalls

2. nóvember 2007

Passar þetta?

Samkvæmt kaffiprófinu er ég
Latte!
og samanstend af tvöföldum espresso og flóaðri mjólk.
Hvernig kaffi ert þú eiginlega?

31. október 2007

Oh, the weather outside is frightful...


Fæ þetta jólalag alltaf á heilann þegar það snjóar ótæpilega.

Í gær snjóaði all verulega en í morgun var slabbið alls ráðandi. Nú þegar ég lít út um gluggann er snjókoman með sterka innkomu og mér sýnist sem ég þurfi að sópa aftur af bílnum áður en ég kemst heim í dag!

Mér finnst þetta pínu notalegt, en ég hef samt áhyggjur af vaxandi þörf minni fyrir svefn! Um leið og það fer að dimma eitthvað af viti og kuldinn eykst þá vil ég bara borða kjöt og kartöflur og sofa í minnst 10 tíma á dag... sem er fáránlegt ;)

Ég keypti mér nóvemberkaktus í Blómavali um helgina og sit nú spennt og bíð eftir öllum blómunum sem ættu að springa út fljótlega - það er nú 1. nóvember á morgun!

Já og það er hrekkjavaka í dag þannig að Happy Halloween!!

30. október 2007

Stjörnuspá dagsins á mbl.is

Steingeit: Sköpunarorkan flæðir! Þú átt þína Mary Poppins stund þar sem "matskeið af sykri" mun virkilega hjálpa "meðalinu niður". Þetta er rétti andinn!

26. október 2007

Dúndur

Ég held því fram (og ekki reyna að telja mig ofan af því) að þetta sé eitt flottasta lag sem samið var árið 1982 þó lengi væri leitað!



B-E-A-Utiful!

25. október 2007

Lazarus vinur minn

Ég er búin að vera lasin síðan um helgina, mismikið reyndar en alltaf þegar ég held að mér sé að batna þá versnar mér :/ Í dag er ég reyndar nokkuð hress - vinna á morgun er markmiðið :)

Ég verð að segja að niðurstöður könnunarinnar koma mér ekki á óvart, Latté hefur lengi vermt hjarta kaffiunnenda þó mér finnist allir drykkirnir sem ég setti þarna mjög góðir. Svo tengi ég líka vissa drykki við vissar manneskjur og staði.
Anna Ey er t.d. Latté
Lisa er Frappó
Cappucchino minnir mig bara á Kanada og allan tímann sem ég var þar (French vanilla cap var drykkur ársins ;)
Svart minnir mig á Reykjavík og strætóferðirnar upp í Árbæ þegar ég vann hjá 365...

Ég er enn að velta því fyrir mér hvað næsta könnun skuli snúast um... fylgist með

22. október 2007

Gulur, rauður, grænn

Ég fór í regnbogamessuna í gær í Akureyrarkirkju.
Þetta var ótrúlega falleg stund og gaman að sjá hversu margi mættu. Stúlknakór Akureyrarkirkju á líka hrós skilið fyrir fallegan söng - væri alveg til í að fara á tónleika með þeim :)

Aðalsteinn og krakkarnir í ungliðahreyfingu Samtakanna 78 stóðu sig líka með prýði en sú sem kom mér mest á óvart var Guðfríður Lilja en hún átti hugvekju kvöldsins. Einlægni er eina orðið sem mér dettur í hug.

Það er góð tilfinning að styðja við bakið á samkynhneigðum og finna hversu margir eru sama sinnis. Það hlýtur að vega upp á móti þeim þröngsýni sem alltaf þurfa að eyðileggja allt - er það ekki?

19. október 2007

Lisa ROCKS!

Ok,
hvet ykkur til að fara inn á síðuna hennar Lisu Marie og lesa um búðarferðina hennar í gær. Hún er snillingur ;)

18. október 2007

Alltaf lærir maður eitthvað nýtt

Vissuð þið að:

- svitabönd nefnast líka svitagjarðir
- gong nefnast einnig bomböld
- skíðagalla er hægt að prjóna og hekla
- til eru samlokulampar (og nei, það eru ekki ljósabekkir)

Vinnan mín er endalaus uppspretta gagnlegs fróðleiks

15. október 2007

Iran so far

Þetta myndband er uppspretta gleði minnar þessa dagana! Horfi á þetta minnst einu sinni á dag.

svo er hann Andy líka sætur ;)

14. október 2007

Sunnudagsmorgun

Vaknaði kl. 7:30 við litla rödd við rúmstokkinn sem heimtaði barnaefni. Ágúst Óli var s.s. í pössun og nennti ekki að sofa lengur! Þetta er snilldin við það að vera með sjonvarp inni hjá sér - þú getir legið þarna og hlustað á teiknimyndirnar en þarft voða lítið að taka þátt. Very nice :)

Er í framkvæmdum í dag - heita- og kaldavatns rör eru viðfangsefnið. Ég verð sífellt bjartsýnni á að ég geti flutt inn í desember. Einhver sagði þó við mig að líklegast fengi ég lykilinn í jólagjöf og flytti því ekki inn fyrr en í fyrsta lagi á jóladag :/

Ég sá að það er margt til að gleðja sig yfir á rúv á næstu dögum. Í kvöld hefur göngu sína dönsk spennuþáttaröð um morðrannsókn sem spannar 20 daga og auðvitað er 1 þáttur = 1 dagur. Töff.
Í kvöld er líka nútímagerð á leikriti Shakespeare Snegla tamin með Shirley Henderson (Jude í Bridget og moaning Myrtle í Harry Potter myndunum) og Rufus Sewell (leikur yfirleitt vonda gaurinn, t.d. count Adhemer í Knight's Tale) í aðalhlutverkum.
Á þriðjudaginn er svo Pétur Ben söngvaskáld og miðað við auglýsinguna (sem var sýnd allt of oft í gær) þá verður það eyrnakonfekt.

Annars hljómar þetta orð, eyrnakonfekt, frekar viðbjóðslega. Ég sé alltaf fyrir mér að fólk troði súkkulaðimolum í eyrun á sér... oj bara!

Vona að helgin hafi verið ánægjuleg - mín rann ljúflega áfram

11. október 2007

Feis ársins

Stórundarlegir hlutir gerðust í dag.

Svo virðist sem að ekkert hafi gerst í hinum stóra heimi eftir klukkan þrjú í dag. Engar fréttir af stríði. Engar fréttir af hungursneyð. Engar fréttir af bílslysum, umferðarteppum eða kaupum og sölu hlutabréfa. Jafnvel landsbyggðin var tíðindalaus.

Miðja alheimsins færðist all skyndilega að tjarnarbakkanum og fjórum einstaklingum þar með bros á vör og að tröppum íbúðarhúss þar sem átta einstaklingar með skeifu og samanherptar varir stóðu í kuldanum.

Það sem mér fannst skemmtilegast við þetta allt saman var í Kastljósinu þegar Svandís benti á þá staðreynd að "Sjálfstæðisflokkurinn beið í 12 ár, í 12 ár eftir að komast til valda, talandi um það allan tímann að það þyrfti að koma glundroðanum frá og taka upp eitthvað nýtt, og 17 mánuðir dugðu þeim til að steyta á skeri".

Feis ársins, dömur mínar og herrar.

Risið úr rekkju

Ég lagðist í veikindi á mánudagskvöldið en hef risið upp að nýju. Ég hef tekið eftir því að með aldrinum leggjast vægari pestir aðeins þyngra á mann. Nú er ég hvorki hundgömul né gamalreynd en mér finnst ekki gaman að leggjast í rúmið fyrir smá hita, máttleysi, ógleði og almenna vanlíðan. Í den tid harkaði maður allt af sér, mætti í vinnu með 39 stiga hita og brosti bara. I'm getting weak...

Ég komst líka að því að það er býsna óhentugt að vera ein heima lasin. Þegar ég bjó í Reykjavík var hann Guðjón yfirleitt heimavið, fór í búðina og keypti handa mér eitt og annað. Þegar ég flyt á ég eftir að þurfa að staulast sjálf í búðina, hundveik eflaust, til að splæsa í eins og einn Gatorade eða Powerade, svona til að líkaminn þorni ekki upp. Ótrúlegustu hlutir sem maður pælir í þegar maður liggur og getur ekki sofið...

Sólin er að ná í gegnum skýin - lítur út fyrir gott veður í dag

7. október 2007

númer fjögurhundruð fjörtíu og fimm

þetta er víst fjöldi færslna á þessu bloggi frá upphafi... minnir að ég hafi byrjað á þessu bloggi í september '04 svo það er þriggja ára um þessar mundir.. ekki slæmt það..
Lengi vel hét það "fréttir úr 101", fékk svo stuttlega nafnið "fréttir úr 600", þá kom "framhaldslífið" og loks náði orðið brainfart tökum á mér og fékk þetta blogg því íslenskuðu útgáfuna "heilaprump". Oftast er þetta bara raus í mér um hitt og þetta, varla nokkra visku að finna en mér finnst þetta gaman.

Síðan á fimmtudaginn finnst mér hafa liðið mörg ár, aðallega vegna þess að ég var í lotu í réttindanáminu mínu og náði ég að innbyrða heilmikinn fróðleik um sálfræði, taka eins og eitt próf (35%) og skila hópverkefni um viðhorf okkar til menntunar (7%). Á morgun byrjar svo enn ein vikan - þeim fækkar sem eftir eru af árinu.

Ég ætlaði að kaupa mér ís áðan en endaði með heitt kakó. Ég ætlaði að vera þögul í kvöld en lenti í skemmtilegum samræðum í Pennanum. Stundum tekur lífið óvænta stefnu og verður yfirleitt meira spennandi fyrir vikið.

Ég mæli með lagi Danielson sem heitir Did I step on your trumpet? og ómar í bakgrunni þessarar kynningar...

3. október 2007

1. október 2007

SuperBad trailer

Skylduáhorf fyrir aðdáendur dónahúmors!

Takk fyrir góða Reykjavíkurferð - kiss kiss

28. september 2007

Reykjavík calling

ég er í þann mund að skunda til Reykjavíkur - sný aftur á mánudag

27. september 2007

mitt rými - þitt rými

Ég lenti í undarlegri aðstöðu fyrr í dag.
Ég fór á kaffihús með vinkonu minni og fengum við okkur sæti við gluggann - svona til að fylgjast með rokinu og öllu fólkinu sem fauk framhjá. Ég tók eftir ungri stúlku sem ráfaði um búðina, líkt og hún væri að bíða eftir einhverjum og fór hún nokkrum sinnum út og kom svo aftur inn, ráfaði meira og ráfaði svo aftur út. Ekki nennti ég nú að pæla mikið meira í henni því við vorum niðursokknar í æsispennandi samræðum um kaffisýróp, námsbækur og vinnuna.
Allt í einu kemur stúlkan aftur inn, sest við næsta borð en dregur stólinn svo langt að okkar borði að hún nánast sat með okkur! Ég gaf nú frá mér einhvern skrýtinn svip en því miður snéri hún baki í okkur og tók ekkert eftir þessu. Ég hélt að hún myndi færa sig nær borðinu sínu en nei - hún sat sem fastast, svo nálægt mér að mitt rými var flækt í hennar rými.
Á endanum varð ég að standa upp því þetta var bara of mikið.

Nú spyr ég eins og sauður: fer þetta ekkert í taugarnar á öðrum, þegar fólk (blá-ókunnugt) ryðst svona nær manni að maður finnur lyktina af hádegismatnum þeirra af fötunum þeirra? (svona sem dæmi bara). Ég þoli svona aðstæður mjög illa og þess vegna líður mér oftast illa í biðröðum og reyni ég að forðast þær eins og heitan eldinn.

Hvað finnst þér?

24. september 2007

Að standa á gati/blístri

Ég held ég sé ennþá södd síðan í gærkvöldi, svei mér þá!
Ég var drifin í lambalæri (af nýslátruðu) með nýjum kartöflum og fersku salati hjá Önnu og Jens í gær. Ekki nóg með að þessar kræsingar hafi verið unaðslegar heldur skellti húsfreyjan í eftirrétt sem samanstóð af köku bleyttri í líkjör, rjóma með sykri og jarðarberjum.

Þarf að segja eitthvað fleira??

Kærar þakkir fyrir mig bæði tvö (og kveðja til "hundsins" :)

22. september 2007

Að læra ekki af mistökum

Ég þoli kaffi alveg ágætlega. Mér finnst gott að fá mér eins og einn latté af og til og í vinnunni er góð vél sem malar baunir fyrir hvern bolla og hvaðeina. Ég þarf samt að passa mig því ég á það til að fá kaffiskjálfta og verða örlítið ör - sérstaklega ef ég fæ mér tvöfaldan latté.
Samt læt ég alltaf eins og þetta sé nú bara vitleysa í mér, að ég geti nú alveg fengið mér tvöfaldan latté án þess að neitt gerist. Skellti einum í mig áðan þegar ég var að læra með Mumma og hvernig líður mér núna? Eins og ég hafi verið að éta sykur með skeið!

Annars fluttum við í vinnunni upp á 7. hæð á Borgum á fimmtudaginn og er útsýnið mitt vægast sagt glæsilegt. Ég náði samt ekki að taka mynd því það var skýjað og blautt í gær en við fyrstu sólarglætu skal ég smella einni mynd hér inn - Súlur og Hlíðarfjall og blár himinn.
Schnilld.
Jæja, ég get ekki setið kyrr, verð að gera eitthvað þangað til kaffið er farið úr kerfinu... tjuuuus

17. september 2007

Allez Gute zum Geburtstag!


Lieber Hanz!
Ich hoffe, daß Sie einen guten Geburtstag haben!
Jetzt sind Sie 27, aber Sie schauen viel jünger!!

bis später,

Pedro

15. september 2007

echoes, silence, patience & grace

Var að hlusta á nýju Foo Fighters plötuna.. er ennþá að melta hana en strax hrifin af 3 lögum...

Home



Echoes and silence, patience and grace,
all of these moments I’ll never replace,
no fear of my heart, absence of faith,
and all I want is to be home.




people I’ve loved, I have no regrets,
some I remember, some I forget,
some of them living, some of them dead,
and all I want is to be home.

13. september 2007

Tveir gítarar, eitt píanó og fullt af græjum úr bænum...

Var að koma heim af tónleikum með Pétri Ben og þeir voru vægast sagt frábærir! Ótrúlegt hvað maðurinn getur gert með gítarinn að vopni, þó svo að hann þyrfti stundum að rifja upp lögin áður en hann byrjaði ;)
Brandarar flugu um salinn, lögin voru allt frá myrkum lögum við píanó til sálma sem ómuðu um salinn þar sem tónleikagestir ýmist sungu með eða hummuðu laglínuna.. yndislegt alveg.
Mæli með að fólk kíki á tónleika í Laugarborg því það er ágætis salur, hvorki of stór né of lítill.

Tónleikarnir náðu að bægja burt þeirri hugmynd að veturinn væri kominn til Akureyrar því það snjóaði langt niður hlíðar Vaðlaheiðar - nánast niður að þjóðvegi - og kuldinn smaug inn að beini. Ég reyndi að vinna á móti honum með því að skella mér í ræktina í hádeginu en það dugði skammt. Ég horfi núna á dúnsængina mína með glampa í auga.. spurning um að sofa í hnésokkum?

10. september 2007

La vie...

Ótrúlegt en satt, þá er helsti blogg"aðdáandinn" minn elskuleg samstarfskona mín sem minnir mig í sífellu á það hve lítil hreyfing er hérna! ;)
Ástæða bloggleysis er að mestu leti. Ég blogga ekki á vinnutíma og þegar ég er komin heim til mín tekur ræktin oftast við, já eða bókalestur og ég hreinlega gleymi mér þar til klukkan er orðin allt of margt og letin hellist yfir mig. Ég lofa hvorki bót né betrun en hvur veit...

Það er reyndar frekar erfitt að blogga í dag því ég var í Body Pump tíma í ræktinni áðan og handleggirnir titra svolítið. Ég var gjörsamlega að skíta á mig og þurfti að "hvíla" nokkrum sinnum, en þetta batnar víst með hverju skipti ;) Stefni á massa upphandleggsvöðva um jólin!
Ég ætla þó ekki að ganga jafn hart fram í æfingunum eins og þessi elska hér...

Ég stefni að því að kíkja suður síðustu helgina í september og get því tekið við pöntunum um heimsóknir :) Veit að ég ætla að kíkja á nýju íbúð AME og Elvars og á Hanz mit das dwarfenbad ins Hafnarfjörður ;)

Jæja, heimildarmynd um Grace Kelly bíður mín - au revoir mín kæru

31. ágúst 2007

Er ég nörd?

greinilega!!


I am nerdier than 47% of all people. Are you a nerd? Click here to find out!

19. ágúst 2007

Ári síðar...

Í dag er ár síðan ég flutti aftur heim til Akureyrar. Þetta er auðvelt að muna því Ágústa og Ægir giftu sig sama dag og eiga því 1. árs brúðkaupsafmæli í dag. Til hamingju bæði tvö, já og auðvitað líka með hann Kristinn Örn sem er nýorðinn 2ja mánaða!

Það er ótrúlega margt búið að gerast á þessu ári en samt stendur ýmislegt annað í stað. Ég hef endurnýjað vináttu við fólk frá fyrri tíð, fengið að kynnast nýjum börnum og tilvonandi börnum, tekið þátt í að mennta og uppfræða frábæra einstaklinga sem ég á vonandi eftir að fá að fylgjast með áfram, þó svo að ég hafi skipt um vinnustað.

Nýja vinnan gengur framar vonum og sé ég ekki eftir að hafa gripið þetta tækifæri þegar það gafst. Veturinn verður samt eflaust strembinn því ég þurfti að færa MA-ritgerðina mína fram í febrúar og verð því í fullri vinnu, við ritgerðarskrif og svo skellti ég mér líka í kennararéttindanámið við HA, með öllu því fjarnámi sem fylgir! Fyrsta lotan var núna frá miðvikudegi til laugardags og tók hún aðeins á. Það er eins gott að fólk eins og Kristján x2 og Jóa verði dugleg að mæta svo maður hafi einhvern til að hlæja með ;)

Vinna við íbúðina er í fullum gangi og erum við að gipsa veggi í gríð og erg. Áætlað er að ég flytji inn fyrir jól en það á bara eftir að koma í ljós.. ég ætla að skella inn myndum á Fotki við tækifæri og læt fólk þá vita :)

Ég er eitthvað meir þessa dagana svo ekki láta ykkur bregða þó ég faðmi ykkur upp úr þurru - mér þykir bara vænt um ykkur ;D

15. ágúst 2007

blitz

er á lífi, nýja vinnan gengur vel, byrja í réttindanáminu eftir klukkutíma - meira síðar

27. júlí 2007

Af starfsþjálfun, skriftum og sushi

Það er merkilegt hvað maður dettur úr blogg stuði yfir sumartímann. Ég er búin að vera ansi upptekin í júlímánuði við að skrifa ritgerðina, hitta mína elstu og bestu vini og svo fór ég í starfsþjálfun í þessari viku.

Ég er sem sagt búin að vera að þýða síðustu 5 daga og er rétt að venjast þessu öllu saman áður en ég byrja svo af fullum krafti á miðvikudaginn. Ritgerðin hefur því beðið í saltlegi og verð ég því að vera dugleg um helgina svo þetta ryðgi ekki...

Eva Stína og Guðjón eru í bænum og héldum við Sushi-matarboð með Ingu Björk um síðustu helgi sem gekk svo vel að ég át yfir mig (og vel það) og held ég geti ekki borðað sushi aftur í svolítinn tíma! Þetta var eins og maðurinn sem sprakk af mintunni - þannig leið mér.

er að lesa Potterinn - klára hann í kvöld. Mér finnst frábært hvað allir hafa þagað yfir söguþræðinum. Það er sjaldgæft á þessum síðustu og verstu.

Best að kíkja á feitar fjölskyldur keppa í þyngdartapi... langar skyndilega í ís ;)

20. júlí 2007

föstudagskvöld

hvað er málið?
það er einhver "fjölskyldumynd" á rúv (eins og vanalega) og mig langar mest til að kasta mér í sjóinn eftir að hafa kveikt á þessu fyrir rælni...

16. júlí 2007

klukkuleikir

mér leiðast oft klukkuleikir en Lisa mín á skilið að ég geri þetta :)

8 handahófskenndar staðreyndir um mig

1. Ég hlæ upphátt í svefni.
2. Mér leiðist að festa tölur á föt.
3. Ég á bestu vini í heimi.
4. Ég á erfitt með að klára hluti.
5. Ég elska gott kaffi.
6. Ég er hrædd við hafið.
7. Mig langar til að búa á Írlandi einhvern tíma.
8. Ég hlakka til að klára námin mín - þreytt á þessu!

There you have it.. er nánast að detta út af þessu bloggi - er föst í Facebook if you're interested...

9. júlí 2007

heilaprump

enn einn mánudagurinn - þeir koma víst með reglulegu millibili ;)
sit á amtinu og pikka inn afrakstur morgunsins sem var býsna frjór! Ef þetta heldur áfram verður þetta lítið mál... ahemm..

Ég ætla að bregða mér út úr bænum í tvo daga og vera í kyrrð. Ekkert net, lítið útvarpstæki, reyndar sjónvarp sem nær rúv og gsm síminn en annað ekki. Ég verð að loka mig meira af til að ná góðri skorpu í ritgerðinni.

þessi færsla var í boði leiðinlegra frétta.is

4. júlí 2007

Reykjavík

kom heim í gær eftir 5 daga í borg óttans, sódómu, sollinum - þið megið velja ;) las 2 bækur, Dauðarósir eftir Arnald og Viltu vinna milljarð. Þær voru báðar fínar og ágætis sumarlesning.

ég fór í:
*smáralind
*ikea
*keiluhöllina
*byko
*matarboð í hafnarfirði
*heimsókn til Lisu :D
*parki
*innx

og örugglega fleiri staði sem ég er að gleyma núna - en þetta var sem sagt fín ferð, ekkert stress, nema í umferðinni og gott að hitta Evu sys og kúra á sófanum hjá henni.

er dofin í hausnum í dag vegna þreytu svo ég læt þetta duga...

28. júní 2007

paperback or hardcover?

ég renndi augunum yfir metsölulista (yeah right) bókabúðanna í fréttablaðinu í dag og sá að flestar bækurnar voru merktar 'kilja'. Persónulega finnast mér kiljur betri en harðspjaldabækur því auðveldara er að lesa kiljur uppi í rúmi seint að kveldi.

Ég þurfti að kaupa biblíuna á ensku fyrir einn áfangann í HÍ og var hún einmitt í kilju, með næfurþunnum blaðsíðum - svo þunnum að letrið lak örlítið í gegnum blaðsíðurnar. Þessi bók var mismikið lesin en ég hafði hana uppi við þar sem ég bjó fyrir sunnan. Nú man ég ekki hver það var, en einhver sem kom til mín og sá að biblían var þarna í kiljubroti var frekar hneykslaður og fannst þetta vanvirðing við þennan mikla texta. Mig minnir að ég hafi svarað því til að þetta væri nú einmitt það sem biblían gengi út á, að koma textanum til fjöldans og ekki hefðu allir efni á að kaupa innbundna biblíu með gullskreytingum.

Við vorum ekki sammála. Það var meira en allt í lagi.

Kiljur eru ekki minni bækur en harðspjalda bækur. Ef ég gæfi út ævisögu mína kæmi hún eingöngu út í kilju. Hún yrði rauð.

25. júní 2007

að miða áfram

ritgerðin mjakast áfram, á hraða snigilsins. sit á amtinu og reyni að pikka inn gáfulegar hugsanir sem fjúka í burtu jafnóðum í þessu roki.

ég hef eina gulrót í vændum - er á leiðinni suður á föstudaginn og ætla að vera fram á þriðjudag eða miðvikudag. ætla að reyna að vera búin með alla vega 10 blaðsíður fyrir þann tíma, því þá eru bara 80 eftir ;)

23. júní 2007

Face!

Henry er farinn frá Arsenal yfir til Barcelona. Face!!

21. júní 2007

It's raining.... but not men!

Já loksins kom rigningin sem ég er búin að væla um í nokkra daga! Þið hin fyrirgefið mér að ég vilji ekki glampandi sólskin og tveggja stafa hitatölur því þá er ekkert hægt að einbeita sér að ritgerðasmíð! Í gær var ég t.d. 'lokkuð' í hádegismat á teppi í Lystigarðinum, fékk mér kaffi á Te & Kaffi og fór í langan göngutúr með Ingu og Jóhönnu! Það var s.s. ekki mikið um skrif hér í gær en í dag stefnir allt í góðan dag, þökk sé rigningunni!

Eins og venjan er, í hinu dásamlega lífi, þá varð ég bleklaus og pappírslaus við fyrsta tækifæri hér í morgun! En þessi Þrándur í götu varð mér ekki að falli og held ég ótrauð áfram!

Æi, ég vona að það rigni áfram í dag... og helst á morgun en svo má vera gott veður um helgina, er það díll?!? ;)

19. júní 2007

Til hamingju með daginn!

19. júní er bleikur dagur... samt get ég ekki sett bleika fyrirsögn? skrýtið...

Í dag vann ég minn allra síðasta dag í MA - alla vega í bili :) ég kvaddi fólk en flesta á ég nú eftir að rekast á niðri í miðbæ, í sundlauginni eða hreinlega bara í Nettó, því Akureyri er nú ekki stór bær, hehe.

Sexy Boy hljómar hér bakvið mig því Air er í viðtali í Kastljósinu. Finnst þeir alltaf krúttlegir.

Úff, eitthvað lítið varið í bloggið í dag - kannski vegna þess að ég svaf í 4 klst. áðan, gjörsamlega búin á því og með óbærilegan hausverk. Ætla að kíkja á myndina um hnatthlýnunina á rúv á eftir, hún lofar góðu.

18. júní 2007

update á bílahelgi og þjóðhátíðardagurinn sjálfur

jahá,
ég hélt að ég væri búin að sjá allt,verandi gamalreyndur versló-djammari (svona back in the day alla vega ;) en ég fékk eitthvað nýtt að sjá í gær. Bíll á miðju torgi að keyra í hringi, með allar rúður niðri og töffara dauðans innanbúðar (n.b. það er ekki gert ráð fyrir bílum þarna) og ungmenni að sparka á milli sín 30kg steypukúlu sem vanalegast gegnir því hlutverki að varna mönnum því að leggja ólöglega. Beinbrot lágu í loftinu. Þetta var á miðnætti í gær.
Þegar ég hætti mér heim um tæpum 2 tímum síðar var búið að setja froðu í einn gosbrunninn og tveir ungir menn stóðu við þann næsta og pissuðu í kross. Ég elti lögreglubíl, sjúkrabíl og securitas bíl á leið minni heim og fannst ég nokkuð örugg. komst heil á húfi heim að minnsta kosti ;)

Í dag var svo yndislegt veður, flestir óspektar gemlingar enn í fangelsi eða farnir heim þegar skrúðgangan byrjaði og bærinn búinn að sópa flest allar götur hreinar aftur. Í kvöld sat ég svo í höllinni og fagnaði með nýstúdentum og át á mig gat. Til hamingju krakkar, sérstaklega Tryggvi Páll - moðsteikt all the way :D

16. júní 2007

Kann fólk ekki að skammast sín?

Ég var að vakna af værum blundi og telst ég víst heppin að hafa náð að sofa í alla nótt. Fréttirnar á mbl.is benda til þess að hasarinn hafi verið þvílíkur í bænum að jaðri við verslunarhelgarstemmara. Hvað fær fólk til þess að slást þegar það er drukkið, veitast svo að lögreglumönnum sem komnir eru til að skikka leikinn og hvað þá að lemja tjaldvörð 2svar í andlitið? Þetta gerðist all á tjaldsvæðinu á Hömrum í nótt!!

Burt með þennan lýð sem vill yfirtaka bæinn! Djöfulsins dónaskapur og læti!

update

smá update á bílasýningarfólkinu:

það eru 3 tjöld í garðinum hér á móti og 1 neðar í götunni... ég segi bara 'party on wayne'...

15. júní 2007

dimmalimm

fíla mig sem dimmalimm þessa dagana.
Man einhver eftir fyrsta þættinum í þriðju syrpu af Grey's þegar allir töluðu um "dark and twisted Meredith"? hehe, alltaf gott að geta vitnað í sjónvarpsefni ;)

Nei annars, ég hef það ágætt núna. Ég fékk ofsalega leiðinlegar fréttir og þær gengu miklu nærri mér en ég bjóst við. Sem er fáránlegt því ég er ekki að ganga í gegnum erfiðleikana heldur vinur minn og hann tók þessu býsna vel. Þannig að það er ekkert annað í stöðunni en onwards and upwards, my friends, such is life and we must live it.

Bloggið mitt hefur verið frekar niðurdrepandi síðustu vikur og spilar þar margt inn í sem ég nenni ekki að fara út í nánar - sópum því bara inn í reynslubankann og reynum að hressa okkur aðeins við. Ég sá t.d. að Sprengjuhöllin spilaði í lok Kastljóssins áðan og það gladdi mig. Núna er Gríman í gangi og ég er með aulahroll.. það er eitthvað við íslenskar verðlaunaafhendingar sem fer í mínar fínustu háræðar og vandræða-roðnið mætir á svæðið.

Ég er um það bil að kveðja minn ástkæra skóla og ætla að gera það með pompi og prakt á sjálfan þjóðhátíðardaginn með kvöldverði og dansleik við útskrift nemenda. Ég vona að þið hafið það gott núna um helgina og passið ykkur á bílafólkinu sem allt morar í hér á Akureyri!

13. júní 2007

the running-away game

again I run into the open arms of the language that is not mine. the last few weeks have been filled with so many emotions it's become hard to process them all. superficial things have made me happy and sad; very important things have made me so sad I haven't dealt with them properly. I'm trying to turn the negative energy that seems to be accumulating around me into something positive but some days you just don't feel like playing Pollyanna.

today I drove. there's something that calms me down about sitting in the car, driving on and on with the music on and bugs squashing on the windscreen. today was good. I don't know what tomorrow will be. here's hoping...

11. júní 2007

Baðað sig í birtu

Ég er komin út úr hinum miklu prófatíðar göngum og baða mig núna í ljósinu. Reyndar var veðrið ekki sammála mér um ágæti dagsins í dag en ég skundaði samt um bæinn með Ingu og Jóhönnu áðan og er veðurbarin eftir það ;)

Ég náði að klára allt sem ég þarf að gera í vinnunni í dag og sit núna og bíð eftir tómleikatilfinningunni sem ég veit að á eftir að skella á mér einhvern tímann. Eflaust er ég aðeins of þreytt og hreinlega bara fegin að vera komin í frí til að finna til söknuðar strax.

Framundan næstu daga er örlítil afslöppun, vonandi eins og eitt gott tjútt, saumaskapur, ritgerðasmíð og LOST-gláp... þarf að herða mig í þessu!

8. júní 2007

The light at the end of the tunnel

ég sé ljósið.. það stækkar með hverri mínútunni!

Á bara eftir að klára yfirferð á einu prófi og klára eitt sjúkrapróf og þá er ég laus.. sem sagt, málleysi mitt hér undanfarna daga er sökum anna við yfirferð.

best að halda áfram svo ég geti skroppið í dinner með góðri samvisku á eftir ;)

túdúls

3. júní 2007

'mig langar' græðgin

mig langar í svo margt.

Mig langar t.d. í útilegu. Eftir góðviðri síðustu daga hefur mig dreymt um að setjast upp í fákinn minn og flýja Akureyrina og komast aftur á suðaustuhorn landsins. Síðan ég keyrði hringinn í ágúst í fyrra hefur þetta svæðið kallað á mig að snúa aftur. Eða svoleiðis.

líka kyrrð og ró. Einn heilan dag þar sem ekki heyrðist tónlist, fréttir, börn að leik eða bílaumferð - nema þá í fjarska svo hún virðist vera árniður. Það er búið að vera ansi mikið áreiti undanfarið og hugurinn þráir hvíld.

Mig langar til Nýfundnalands, til Írlands, til Hjaltlandseyja og Orkneyja. Finn fyrir eyjafiðringnum og langar að finna til samkenndar með öðrum eyjaþjóðum. Mig vantar fleiri rætur...

Ég hef allt sem ég þarf í heiminum en langar samt í meira..

einu sinni þýddi enska sögnin 'to want' að vanta eitthvað - skort á einhverju... í dag er hún notuð yfir löngun...

tungumál eru skrýtin

2. júní 2007

Losing my mind

Ég er sem sagt að tapa mér..
ég er að týna huganum því ég er að fara yfir próf og maður verður ansi steiktur í hausnum þegar maður þarf að lesa sömu setningarnar, sömu eyðufyllingarnar, sömu krossana áttatíu og tvisvar sinnum í röð!
Ég veit alla vega að ég ætla að hætta klukkan fjögur og taka mér verðskuldað frí fram á morgundaginn - og hana nú!

Fór út að hlaupa í gærkvöldi því veðrið var svo sjúklega gott. Skokkaði 5km alveg ágætlega en þarf samt aðeins að bæta mig í bakaleiðinni - tók of margar pásur.

Það er nokkuð fyndið að hugsa til þess að fyrir ári síðan fór ég að skokka í kringum tjörnina í Reykjavík og gat þá aðeins hlaupið í eina mínútu í senn og þurfti 3 mínútna hlé á milli. Nú skokka ég 2.5 án þess að taka mér hlé og þarf svo 2-3 labb pásur til að klára 5 km.
Frábært að skoða árangur í þessu ljósi :D

31. maí 2007

Melinda eða Heiða?

Í vetur sá ég glitta í skemmtilega hljómsveit hjá Jóni Ólafs, sem ég fékk mig þó yfirleitt aldrei til að horfa á - fékk einhvern aulahroll við að sjá hann spila á hljómborð eða hvað sem þetta var meðan gestir gengu í sal.
En hljómsveitin heillaði mig. Þetta var Sprengjuhöllin og þeir fluttu lagið Worry til Spring og fjallaði m.a. um hana Melindu. Krúttleg melódían náði mér algjörlega og ég var ekki lengi að grufla upp MySpace síðuna þeirra. Um daginn var ég svo stödd í búð og heyri allt í einu Melindu-lagið mitt en það var á íslensku og hét stúlkukindin nú Heiða.

Hvort sem það er á íslensku eða ensku finnst mér þetta lag eitt það skemmtilegasta í spilun þessa dagana og ágætis tilbreyting frá yfir-unnum popp ballöðum sem tröllríða...

Þú veist hvað ég vil - ef þú vilt finna yl
Vertu þá ekki að hringja
Því ég á ekkert til, og ég ekkert nú skil
Og við ei skulum sporin mín þyngja.


Þarf að segja meira?

29. maí 2007

exitlude

Aggressively we all defend the role we play
Regrettably time’s come to send you on your way
We’ve seen it all bonfires of trust flash floods of pain
It doesn’t really matter don’t you worry it’ll all work out
No it doesn’t even matter don’t you worry what it’s all about

We hope you enjoyed your stay
It’s good to have you with us, even if it’s just for the day
We hope you enjoyed your stay
Outside the sun is shining, seems like heaven ain’t far away

Dance like no one's watching

Ég er þekkt fyrir að syngja með útvarpinu þegar ég er úti að keyra. Stundum á ég það meira að segja til að blasta tónlistina full hátt - sérstaklega þegar ég er ofurglöð eða ofurpirruð. Í spilaranum í dag voru Lost Prophets og Interpol og féll skapið í síðari flokkinn. Það er fátt betra en að fá útrás með tónlist og því að keyra aðeins hraðar en maður er vanur...

Prófatíðin stendur sem hæst og stressið farið að segja til sín með örari hjartslátti og minni matarlyst.. Kaffið góða frá Te & Kaffi er ekkert að hjálpa maganum, en það er bara svo fjandi gott!

Helgin var ekkert spes en ég eyddi hellingstíma með Ingu og fjölskyldu og það bætti hana verulega upp. Takk elskurnar fyrir allt - líka kúkinn ;)

Best að halda áfram svo ég geti farið að hlaupa á eftir...

25. maí 2007

með fiðring í tánum

Ég er búin að vera eitthvað æst í dag - svona 'get ekki setið kyrr' æsingur. Í gamla daga var sagt við mann að maður væri með njálg í rassinum. Þegar ég var yngri hélt ég að þetta væri bara orðatiltæki og fattaði ekki fyrr en mörgum árum seinna (þegar ég vann einmitt í apóteki) að það væri í raun til eitthvað sem heitir njálgur! En nóg um það...

Föstudagsfiðringurinn náði sem sagt í skottið á mér. Það versta er að ég hef ekki minn uppáhalds 'partner in crime' fyrir útrás á þessum fiðringi. Danstaktarnir fá því að bíða þar til Guðjón, mon frére, kemur frá París í næsta mánuði. Can't hardly wait!

Skokkið í fyrrmálið - mæting kl. 10:15!!!

24. maí 2007

Eymd og volæði

Bretar eru þekktir fyrir grínþætti sína. Miðvikudagar á rúv hafa verið valin til að sýna landanum helstu molana, t.d. Little Britain, The Catherine Tate Show, Smack the Pony (voru reyndar á mánudögum) og fleiri gimsteina sem ég er að gleyma. Bretarnir hafa líka verið þekktir fyrir ágætis spennuþætti á borð við Spooks, Ultimate Force og nú síðast þættina Ghost Squad.

Hvernig stendur þá á öllum þessum þáttum sem velta sér upp úr eymd og volæði í verkamannastétt Bretlands? Hver hefur ekki rekist á þætti sem fjalla um verksmiðju sem á að loka þannig að allir missa atvinnuna? Ég hef séð textílverksmiðju fara á hausinn, sömuleiðis postulínsverksmiðju og eitthvað rámar mig í 2-3 syrpur af námum sem átti að loka og drepa niður andann í norðri. Allt þetta fólk lifir á lágum launum, yfirleitt drekkur fjölskyldufaðirinn illa og vill helst horfa á leiki á kránni og börnin eru útúrdópuð eða drukkin með sígarettu í annarri og föst í feitum sleik við misgáfuleg ungmenni. Ok, skemmtun fyrir suma.

Í sjónvarpinu í kvöld rakst ég á syrpu sem mér finnst falla í eymdarflokkinn. Viðfangsefnið er skóli sem inniheldur ráðalausa kennara, uppgefin ungmenni og enskukennarinn var gamall kall sem vildi troða Shakespeare í hausinn á börnunum og sá engan skilning í augum þeirra.

Burt með Waterloo Road og eymdina - komið með grínið í staðinn!

Ný klipping


Skellti mér í klippingu í gær þrátt fyrir slappleika. Sat í stólnum og lokaði ansi oft augunum. Þetta var mjög fínt og eins og sjá má á myndinni hérna fyrir ofan :)

Hlaupin hafa gengið upp og ofan undanfarið. Ég er búin að missa af síðustu 3 skiptum en fór ein á þriðjudaginn og hljóp 2.5 með einu 30 sek stoppi og var nokkuð sátt. Ætla að reyna að fara aftur á morgun og svo auðvitað á laugardaginn. Ég er sem sagt búin að ná því markmiði að hlaupa að skautasvellinu án þess að taka mér pásu, eða sömu vegalengd því fyrir rúmri viku hljóp ég 2.5km án nokkurs stopps - vei! Nú er bara að þjarma að svo ég nái 5km fljótt og örugglega!

Hvítasunnuhelgin er framundan og fyrir flesta er það 3ja daga helgi.. held nú að ég verði í því að semja próf eða skrifa ritgerðina svo það verður ekki mikið frí hjá mér en til lukku fyrir hina ;)

22. maí 2007

Blómafans

Ég er eiginlega orðlaus eftir daginn í dag.
Ég á greinileg yndislega nemendur sem sjá á eftir mér - tja, nema þau séu að reyna ða hífa upp einkunirnar? ;) nei nei, hehe.

Fyrst komu elskurnar í 2F með RISA-stóran blómvönd, köku, stórt kort og myndir og segul sem á stóð "þú ert besti kennari í heimi". Við gæddum okkur á kökunni (sem á stóð með hvítum glassúr "elskum þig Lára" :)og spjölluðum áður en ég fékk knús á línuna.
Takk fyrir mig elskurnar mínar - ég á eftir að sakna ykkar!

Núna áðan hitti ég svo 3H sem mætti líka með blóm, kort og mynd af bekknum í sínu fínasta pússi. Kærar þakkir til ykkar líka, my dears - leiðinlegt að fá ekki að fylgjast með ykkur áfram og pína ykkur til að tala um líknardráp, siðleysi og slúður!

Ég kenndi sem sagt síðasta tímann minn rétt áðan og hver veit hvort ég eigi eftir að kenna eitthvað aftur. Í ágúst fer ég í nýja vinnu hjá þýðingamiðstöð utanríkisráðuneytisins svo það eru spennandi tímar framundan!

21. maí 2007

Happy pappy

Man einhver eftir Seinfeld þættinum þar sem George var með frasann "happy pappy"?
Góður þáttur alla vega..

Dett inn og út úr tónlist... var að detta aftur inn í Muse...

Far away
This ship has taken me far away
Far away from the memories
Of the people who care if I live or die

gott lag og hvað er flottara en að vera á risastóru skipi með gítar? fátt alla vega...

20. maí 2007

I'm happy, I'm sad

I suddenly had the urge to write in English.. maybe because my mind has been a bit warped this weekend. I keep switching between languages in my mind, for work, for home, for friends.. not just from Icelandic to English but from local-speak to common-speak, from very politically IN-correct sayings to watching my every word, because you never know who's listening...

Tomorrow I have to say goodbye to a lot of people and that makes me a little sad...
But tomorrow is also good - because it's one more day, right?

this entry probably doesn't make sense to anyone but me... but that's fine.. I'm allowed to be weird every once in a while....

18. maí 2007

Að leggja tvo og tvo saman

Fann þessa frétt hjá CBC í Kanada

WHITEHAVEN, England (AP) -
Plans for the wedding have been sunk - along with the prospective groom's clothes, CDs, DVDs and his van. Police in northwestern England have arrested Emma Thomason, 24, after she allegedly packed her partner's possessions into his van, drove to the harbour and left off the hand brake on Sunday. She was charged with aggravated vehicle-taking without consent and released on bail.
The incident reportedly followed an argument between Thomason and Jason Wilson, 24, her partner for seven years and father of her two children.
"She put every single last item of clothing I had in the back of the van. All I was left with were the clothes I was wearing," Wilson told reporters.
"I haven't told her yet that the wedding is off, but I think she can put two and two together."
The van was pulled out of the water on Monday.
"The recovery operation was quite difficult, they had to partly drain the harbour to get the vehicle out," said Inspector David Gartland of Cumbria Police.

andleg eyðimörk

Ég er andlaus andi og hef ekkert að segja. Jú, horfði á Reservoir dogs með öðru auganu í gær - hélt ekki einbeitingu alla myndina en hún er samt góð. Klassamynd.

14. maí 2007

Götulist


Vinur minn benti mér á þessa snilld...
hinum megin götunnar, á sams konar skilti stendur máðum stöfum 'in the name of love'.
Hvað myndir þú skrifa á Stopp skiltið þitt?

Svona næstum því

Ég er hjartanlega sammála Önnu pönnu þar sem hún talar um "næstum því" helgina miklu;
Við komumst næstum því áfram í Eurovision (14 stig) og ríkisstjórnin féll næstum því (1 þingmaður). Ég fékk Fréttablaðið með gömlu fyrirsögninni - fannst það frekar fyndið.

Helgin var frekar litlaus hjá mér. Hálsbólgan sem byrjaði að plaga mig á miðvikudaginn kom mér loks í rúmið á föstudaginn þar sem ég lá rænulaus fram eftir öllu og náði mér ekki að fullu fyrr en á sunnudag, þó ég þættist vera alhress á laugardaginn. Ég fór og kaus, reyndi að kíkja í kosningakaffi en endaði heima í sófa með prjónana. Það styttist óðum í barn hjá Ágústu og Ægi svo ég varð að haska mér áfram og það hafðist!

Gærdagurinn fór svo í afslöppun, yfirferð stíla og almennt sjónvarpsgláp. Ég þreytist ekki við að horfa á Top Gear og sérstaklega í gær þar sem þeir lögðu í mikið ferðalag með hjólhýsi í eftirdragi - tær snilld.

Nú dugar ekkert nema útihlaup kl. 17:15 og svo rólegheit eftir það... muna að teygja!

11. maí 2007

Handa 2H

Þetta er bara fyrir ykkur:

Kæri annar bekkur Há!
Án ykkar væri lífið leiðinlegt ;)

verið nú dugleg að læra :Þ

9. maí 2007

Hlaup, Eurovision og kosningar

Jæja,
þá er þriðja hlaupadegi lokið og ég verð að segja að þetta var aðeins erfiðara en á mánudaginn. Gekk samt sæmilega og ég kláraði mína 5km (síðust reyndar) og geri bara betur á laugardaginn!

Talandi um laugardaginn - Júró og kosingar! Var að sjá úrslitin úr stóru könnuninni frá Félagsvísindastofnun HÍ og þetta stefnir bara í hasar og spennu. Sjaldan er jafn skemmtilegt að horfa á kosningasjónvarp eins og þegar tæpt stendur. Sé fram á hörku keppni alveg frá 19:00 og langt fram á nótt :D

Annars gleymi ég alltaf að forkeppnin er barasta á morgun. Ég tek lítið undir með þeim sem segja að Eiki komist áfram - ég held með Kýpur og segi bara: "Cyprus, twelve points!"

Já og munið að fara og kjósa - þó þið skilið auðu ;)

7. maí 2007

Eyrarskokk - dagur 2

Fór í gær og skokkaði og labbaði 3,5km (inni á bretti) með Hörpu vinnupartner og fílaði mig bara vel. Engir strengir en einhver smá pirringur í hægri fætinum sem ég hlustaði bara ekkert á!
Í dag dró svo stór ský fyrir sólu og það komu meira að segja slyddudropar svo mér leist nú ekkert á að mæta í skokkhópinn, auk þess sem Nike-hlaupaskórnir mínir eru farnir að særa mig fullmikið og ég var ekki viss hvort ég ætti fyrir nýjum ;)
Ég fór samt í Apótekarann og splæsti í 16. þús króna Asics hlaupaskó sem eru massakúl og virka svona helvíti vel. Splæsti líka í hnésokka því ekki vil ég fá beinhimnubólgu, ó nei!

Ég mætti síðan galvösk kl. 17:15 og skokkaði og labbaði 5km á 40 mínútum og heyrði útundan mér að þetta væri bæting upp á 2 mín síðan á laugardaginn... spurning hvort fólki hafi legið meira á að komast úr slaka veðrinu :D
Hægri fóturinn á mér stífnaði reyndar ansi mikið eftir svona 3 km en ég held ég geti nuddað hann eitthvað til í kvöld.

Sem sagt, nú er markið sett á að geta hlaupið pásulaust að skautasvellinu (tók tvær mínútu labbpásur þangað) í lok næstu viku!

túdúls

6. maí 2007

Aygo vs. Fox

var að horfa á Top Gear og þeir ákváðu að prófa hvort Aygo væri betri í bílafótbolta en VW Fox... *sigh*
Því miður tapaði Aygo 4-3.. but I still love it :D

5. maí 2007

5 km

Var að koma heim úr fyrsta Eyrarskokkinu (sjá heimasíðu Átaks) þar sem ég skokkaði og labbaði til skiptis 5km og það var GEÐVEIKT! fyrir ykkur sem eruð vön að hlaupa þá virðist þetta smotterí og þið megið alveg hlæja en ég var næstum dauð á tímabili svo þetta er afrek hjá mér. Jei!!

Ætla núna í sturtu því ég svitnaði í gegnum alla bolina mína... namm :)

4. maí 2007

Friday, Friday..

hvað á maður að gera af sér á föstudagskvöldi? Jú, ég ætla að skella mér í "dinner and a movie" með Önnu pönnu frönskuséní. Það vill nefnilega svo skemmtilega til að við fílum sömu frönsku myndina í tætlur og ætlum því að kíkja á 'Le Placard'eða Skápinn. Hún fjallar á skemmtilegan hátt um mann sem fréttir að það eigi að reka hann úr starfi svo hann þykist vera hommi svo ekki sé hægt að reka hann vegna mismununar ;) Geðveikt plott!
Á sunnudaginn er svo önnur af uppáhalds frönskumyndunum mínum á rúv - La haine, eða Hatur. Ég mæli líka með henni, sérstaklega í ljósi óeirðanna sem urðu í Frakklandi í fyrra.

Vikan er búin að vera fáránlega fljót að líða - gott að fá aukafrídag á þriðjudaginn - og er ég ennþá að velta því fyrir mér hvert apríl fór...

Hafið það yndislegt um helgina

1. maí 2007

Le weekend and such trivial matters...

Ég hef hrist af mér allar dauðlegar hugsanir, þ.e. hugsanir um dauðann :)
Helgin var alveg einstaklega skemmtileg þó ég hafi varla gert neitt sem telja tekur; aðallega sjónvarpsgláp og spjall og svona.
Það spillti ekki fyrir að hafa svona gott veður og var maður meira úti við en vanalega. Í gær var svo frábært, frábært veður og náðu nemendur að narra mig út í útikennslu og svo fór ég með umsjónarbekkinn minn í Brynjuferð.

Ég sit núna og var að hlusta á You'll Never Walk Alone sungið af nánast öllum á Anfield.. fílaða í tætlur. Stutt vinnuvika framundan en samt nóg að gera!

Lag dagsins: "Hvað dreymir þig í dag, Hlöðver grís? oink, oink" (bwahahahahah :)

27. apríl 2007

Morbid

Það er komin enn einn föstudagurinn! Apríl er að verða búinn og ef dæma má bloggsíður vina minna eru flest allir í sumarskapi! Garún snilli er að fara á Hvannadalshnjúk á morgun (goood luck!), Masa að fara að hjóla og sumarið er víst komið í Belgíu. Og hvað er mér svo efst í huga þessa dagana? Jú, sjúkdómar, lífslok og svo loks dauðinn.

Ekki skilja mig svo að ég sé í einhverri niðursveiflu, þvert á móti ;) Ég tók einfaldlega þá ákvörðun fyrir margt löngu að ég vildi hafa mín mál á hreinu ef eitthvað kæmi upp á. Síðustu mánuðina hef ég svo velt mikið fyrir mér erfðaskrá, svokallaðri lífsskrá og hvað ég vil að sé gert eftir að ég er fallin frá. Mér finnst allt of erfitt að hugsa til þess að foreldrar mínir eða maki (vonin lifir enn þar ;) þurfi að taka erfiðar ákvarðanir á versta tíma. Þess vegna er ég búin að líf og sjúkdómatryggja mig, skrifa undir lífsskrá og ætla mér að fá löglegt skjal þar sem mínar óskir varðandi jarðarför koma fram. Með því móti ætti ég að fá það sem ég vil og hlífa ástvinum mínum við slíkum 'óþarfa' hlutum.

Með allri lukku lifi ég löngu og heilbrigðu lífi og þessir pappírar safna bara ryki ofaní skúffu!

Hressandi föstudagsblogg, ekki satt? :D

26. apríl 2007

Jónsmessudraumur

Ég fór í leikhús í gærkvöld á Draum á Jónsmessunótt í flutningi LMA og ég verð að hrósa nemendum fyrir frábæra sýningu. Ég átti auðvitað ekki von á öðru en að nemendur legðu sig alla fram en þarna fóru þau fram úr mínum væntingum. Einn af mínum nemendum, Axel Ingi stendur sig frábærlega í hlutverki tónlistarstjórnanda og nær á skemmtilegan hátt að tengja saman atriðin með þema tengdum stefum sem endurtaka sig. Flott, flott flott sýning!

Ég vil því hvetja alla sem hafa áhuga á að sjá leikritið (tekur ekki nema um 70 mín í flutningi) að panta miða hjá Hörpu í síma 661-8912. Þetta kostar ekki nema 1.500 kr og hefur maður nú eytt öðru eins í tóma vitleysu!

Það er sýning í kvöld (fimmtudag 26. apríl) kl. 20:00 og svo er næstu sýningar
fimmtudaginn 3. maí klukkan 20.00
föstudaginn 4. maí klukkan 19.00 og 21.15
laugardaginn 5. maí klukkan 17.00 og 20.00

Helgin verður undirlögð af sögum frá nemendum, ritgerðarskrifum og málningarvinnu. Eins og máltakið góða segir: There's no rest for the wicked!

25. apríl 2007

andlaus andi

Ég hef verið krafin um fréttir. Það er voða lítið að frétta héðan úr norðri nema kannski helst að ég er að skipta um vinnu næsta haust en ætla þó ekki að tala neitt meira um það núna.

Ég er ótúlega þreytt þessa dagana og búin að vera slöpp líka svo ég er algjörlega andlaus..
kannski dettur mér eitthvað sniðugt í hug seinna í dag...

20. apríl 2007

the curse of the car wash

Ok,
ég má sem sagt ekki þvo bílinn minn! Ég hef þvegið hann tvisvar sinnum síðan ég fékk hann; í fyrra skiptið fór að rigna og síðan snjóa 2 tímum eftir að ég keyrði hann nýþvegin heim og núna áðan skellti ég mér í sólskini og þokkalegum hita á næsta þvottaplan. Veðrið núna, 2 tímum seinna: snjókoma, þungbúið og lækkandi hitastig.

var ég búin að nefna það að hann er á sumardekkjum?

19. apríl 2007

Gleðilegt sumar!

Já mín kæru, sumarið er loksins komið og fraus meira að segja saman við veturinn svo nú er von á góðu! Siggi stormur fór einmitt hamförum í fréttatímanum í gær og tafsaði næstum því á þessum fréttum, svo mikið var honum í mun um að koma þeim á framfæri.

Það er að sjálfsögðu frí í skólanum í dag en ég vaknaði samt frekar snemma og fór í málningarvinnu. Náðum að mála gluggana sem munu á endanum hleypa fallegri birtu inn í íbúðina mína. Við vorum reyndar bara að grunna svo það er hellingur eftir en gott verk samt. Er núna á leiðinni í sumarkaffi hjá sys og Ágústi Óla.. hlakka til ;)

16. apríl 2007

fullorðins

Fór í bankann í dag og splæsti í líf- og sjúkdómatryggingar. Ég kíkti líka á reglubundinn sparnað, sá hvar ég ætti í raun og veru að tryggja bílinn minn og ákvað að héðan í frá yrðu fjármál mín í góðum höndum. Mér fannst ég vera hellings fullorðin þegar ég gekk síðan út úr bankanum.
Nú á ég bíl, er að borga af tryggingum og innan þriggja mánaða ætti ég að vera komin aftur í leiguhúsnæði. Limbóinu fer að ljúka.

Annars er limbó fyndið orð. Hvers vegna tala menn um að vera í limbói þegar allt er óvíst eða gengur upp og niður? Er það vegna þess að menn verða að beygja sig og bukta þegar menn fara í limbó? Hvur veit...

Það var PrestMA söngfundur í skólanum í dag og stjórnin klæddist fermingakirtlum og sungu hástöfum ásamt meginþorra nemenda. Kíkti aðeins við og söng eins og eitt lag hástöfum með Hóu stæ. Alltaf gaman að sjá hvað krakkarnir eru duglegir ;)

já og fyrir þá sem vita ekki hvað PrestMa er þá eru það prestssynir og dætur í MA (að mér skilst ;)

14. apríl 2007

Nýtt barn í heiminn

Ég fékk þær gleðifréttir að Íris Helga vinkona mín átti aðra dóttur sína í nótt og hefur hún hlotið nafnið Lísbet Hekla. Innilega til hamingju Íris, Halldór og Naomí!

Föstudagurinn 13

Ég er, að ég held, ekki mjög hjátrúafull en dagurinn í gær fékk mig til að hugsa aðeins um ógæfutöluna 13 og þá sérstaklega þegar föstudagur er 13 dagur mánaðarins.
Ég vaknaði frekar seint því ég svaf illa um nóttina og ákvað að vera fín (þ.e. ekki í buxum ;). Ég skellti mér því í pils og jakka, henti hárinu í teygju og spennur og fór svo í stígvél með smá hæl til að vera aðeins stærri. Eftir að ég var búin að labba í Sjóvá, bankann og komin í vinnuna fannst mér hægri sólinn eitthvað sleipur (datt næstum því á ganginum í Gamla) og viti menn: tappinn var farinn undan hælnum! Ég snaraði mér í hælaskóna sem ég geymi í vinnunni og hélt ótrauð áfram, fór yfir verkefni, sat á fundi og kenndi svo krökkunum mínum. Nú ég þurfti að fara heim í einhverjum skóm og þessir virtust betri en hinir (því nú var komin hellidemba á Akureyri!) en ég ákvað að skella mér í bæinn fyrst. Eitthvað finnst mér vinstri skórinn orðinn hávær þegar ég kem á hellurnar í göngugötunni og jú jú: tappinn var farinn og ég gekk á járnpinnanum!

Nú spyr ég, lesendur góðir, er eðlilegt að fara með tvö pör af hælaskóm á sama deginum? Tilviljun eða óheppni föstudagsins 13?

(þess má geta að allt annað gekk mjög vel þennan dag ;)

12. apríl 2007

Helgi og leikritin

dagurinn í dag fór mest allur í að finna heimildir fyrir mastersritgerðina mína og var ég orðin rangeygð af því að fletta í gegnum gömul TMM og Skírni. Það virðist líka vera svolítið ryk í þessum gömlu blöðum því ég er búin að hnerra svolítið mikið síðan þá (spurning hvort þú lendir í þessu Garún??)

er annars búin að vera pínu dofin í hausnum - ekki alveg að detta í hressleikagírinn þó ég hafi reyndar dottið niður af kennarapallinum í G21 í dag (í miðri setningu!). hreeeeessandi..

9. apríl 2007

Páskarnir

Gleðilega páskahátíð sem því miður er senn á enda. Ég fæ reyndar auka frídag, "þriðji í páskum" á morgun og engin vinna fyrr en á miðvikudaginn. Lífið er oft ljúft þegar maður er kennari ;)

Ég hef haft það mjög gott síðustu daga. Í fyrsta lagi er ég óð í að fara í bíltúr á nýja bílnum og býðst til að skutla öllum í búð/partý/matarboð :D Ég fékk einmitt nokkur skemmtileg heimboð síðustu daga: fyrst var spilakvöld hjá Hólmari og Valgerði á skírdag (takk fyrir mig ;) og svo lunch með Önnu Margréti og Ágústu (mmmm, nammi nammi) og svo matarboð hjá Ingu og Einari um kvöldið á laugardaginn. Takk fyrir mig krúttin mín!

Ég sit núna og býð eftir kínverskum chili-kjúklingi og svei mér ef ég er ekki til í að kíkja í bíltúr seinna í kvöld.. einhver með?

5. apríl 2007

Hjem igen

Ég hef snúið aftur heim eftir yndislegt frí í Danaveldi hjá Evu Stínu, Anders og Óskari Smára. Dagarnir liðu áfram í leti, rólóferðum, smá verslun og almennri "ís-kaffi-rölt í sólskini" sælu. Kærar þakkir fyrir mig elskurnar - hlakka til að sjá ykkur eftir fjóra mánuði!

Ég lenti reyndar í þeirri "skemmtilegu" reynslu að fluginu mínu var frestað vegna bilaðs takka í flugstjórnarklefanum. Við vorum látin bíða í 2 tíma í vélinni áður en okkur var hleypt aftur inn í flugstöðina með 75 dkr í farteskinu. Ég fékk mér steik og las tískublað á meðan ég beið í aðra 2 tíma eftir að komast aftur um borð. Eftir að okkur var hleypt inn aftur kom í ljós að varahluturinn var ekki kominn í gegnum tollskoðun og því biðum við í aðra 2 tíma um borð í vélinni áður en við lögðum loksins af stað. Fólk klappaði þegar vélin tókst á loft - 6 tímum á eftir áætlun. Takk Iceland Express fyrir að "leyfa" okkur að sitja í vélinni án þess að hafa loftræstinguna á.

Komst heim á leið í gær um hádegi og lenti í einni af svaðalegustu lendingum hér heima í langan tíma. Þurftum að koma yfir fjöllin í vestri og holy mother! Pomms, hrinstingur og almennt skak og skrum var gjaldið sem þurfti að borga fyrir allan meðvindinn sem við fengum á leiðinni. Það var gott að lenda loksins! Ég brunaði beint á Toyota og fékk bílinn minn afhentann hálftíma og mörgum undirskriftum síðar ;) Takk Rut!
Nú er ég eins og lítill krakki sem á nýtt leikfang og bíð þess spennt að geta farið út að keyra aftur á eftir!

30. mars 2007

Hallo? Copenhagen?

10 tímar í brottför, æsispennandi gettu betur í gangi og MK með 4 stiga forskot á MR...sjáum hvað setur...

fékk að vita áðan að bílinn minn verður tilbúinn þegar ég kem aftur heim á miðvikudaginn svo að um hádegisbil verð ég brunandi um bæinn á rauðri þrumu og fæ mér líklegast einn stóran brynjuís ef veður leyfir.

hafið það gott næstu daga, túdúls í bili

lára köbenfari

28. mars 2007

Aygo - yes I go!!

Keypti mér bíl í gær.. eða leigði hann ;)
Eftir nokkra daga mun ég keyra um á gljáandi fínum, eldrauðum Toyota Aygo. Sumir myndu segja að hann væri með minnstu bílum á markaðnum. Ég veit bara að það er gott að keyra hann, hann er sparneytinn og ég get keyrt frá A til B án þess að hafa miklar áhyggjur :D Já og gaurarnir í Top Gear töluðu vel um hann á sínum tíma ;)

3 dagar í Köben - get varla beðið

27. mars 2007

endirinn


já,

Madríd var RISA stór og full af fólki, mótmælendum og heimilslausu fólki. Við fórum frekar snemma til þess að ná að sjá eitthvað áður en við þurftum að bruna út á flugvöll og ná fluginu til London. Myndin hér til hægri er að listaverki sem var afhjúpað 11. mars og er til minningar um þá sem létust í hryðjuverkaárásinni í Madríd fyrir tveimur árum. Utan frá séð er þetta hlaðin glerveggur (hringlaga) en svo er hægt að labba undir glervegginn og þar er einhvers konar silkistrigi eða álíka með áletrunum á helstu tungumálum heims þar sem foreldrar eru hvattir til að ala börn sín upp við umburðalyndi og að virða náungann og að þetta verk sé til minningar um öll fórnarlömb hryðjuverka í heiminum.
Við örkuðum fram hjá Banco de Espana, Prado-safninu (hinum megin við götuna fór fram mótmæli gegn Íraksstríðinu), gengum Grand Via (en fengum ekkert að versla) og enduðum á torginu þar sem haldið er upp á nýja árið, ár hvert.
Restin af ferðinni snérist nær eingöngu um að fara í flug til að komas heim og fylgjast með því hvort stelpurnar væru nokkuð mjög veikar, sem þær voru :/
Það er gott að vera komin heim, þetta var allt of löng ferðasaga en takk þeir sem lásu ;)

more more more

Eitthvað vesen búið að vera undanfarna daga hérna... vonum það besta

En já, fimmtudagurinn og föstudagurinn runnu saman í eitt því báðir dagarnir fóru í endalausar skoðunarferðir, labb um gamla bæinn í Toledo og annað hvort að borða eða bíða eftir einhverju. Það var ansi mikið um bið í þessari ferð. Við biðum á flugvellinum og svo biðum við eftir að komast upp á hótelherbergi til að hvíla okkur. Nú oft þurftum við að bíða eftir að allur hópurinn væri tilbúinn og svo biðum við líka eftir að vera sótt hingað og þangað eftir að hafa fengið smá frí til að melta þetta allt saman! Með því merkilegasta sem við skoðuðum var samkunduhús gyðinga (synagogue), stærsta gotneska kirkja Evrópu (tók 300 ár að byggja hana og önnur 200 að skreyta hana - púff!)og annan eins gull og glamúr, feita rokókó-engla og mikilmennskubrjálæði hef ég varla séð! Ég var orðin þreytt eftir 20 mínútur en við vorum þarna í 2 klukkutíma! Nú við fengum líka leiðsögn um gamalt munkaklaustur, nokkur af hinum frægu "hliðum" Toledo (borgin var jú alltaf að stækka svo þeir urðu að gera nýja múra = ný hlið) og svo auðvitað um skólann sem við vorum að heimsækja. Hann var einmitt sláturhús í gamla daga. Frekar steikt...

Tvennt er mér þó minnisstæðast úr þessari ferð og sá þér báða þá staði á sérstakri kvöldgöngu sem litlu munaði að ég tæki ekki þátt í . Á föstudagskvöldinu fórum við út að borða (eins og alltaf - þríréttað fyrir minna en 20 evrur) og fórum svo nokkur í smá göngutúr um næsta nágrenni því einhverjir vildu finna bar eða kaffihús til að tylla sér inn á. Ég drattaðist með þó að klukkan væri að nálgast miðnætti og við ættum strembinn laugardag framundan. Fyrst fórum við á tónleika (ókeypis) sem voru í húsi sem reyndist vera 14. aldar kirkja. Luis sagði okkur frá því hvernig húsið hefði verið komið í slæmt ástand og einhver boðist til að gera við það gegn því að fá að reka þarna bar/klúbb næstu 25-30 árin. Svo að þarna stóðum við, í kirkju sem augljóslega var undir áhrifum mára og hlustuðum á rokkhljómsveit spila í "kórnum". Alveg magnað!

Seinna gengum við fram hjá stórri byggingu og var okkur sagt að þarna væri biskupinn með kapellu þar sem fólk mátti koma allan sólarhringinn og biðja. Við gengum inn í þá mestu þögn, kyrrð og ró sem ég hef upplifað en mér fannst ég vera að trufla því þarna sat kona og bað og þegar ég leit betur á hana sá ég að hún grét sáran. Þá fannst mér ég vera hræsnari að standa þarna í gættinni eins og ónærgætinn ferðamaður enda hraðaði ég mér út.

daginn eftir héldum við til Madrídar og London og loks heim á sunnudeginum ... verð að setja það inn í sér færslu – þessi er orðin svo löng.

21. mars 2007

jæja, hvar var ég?
Já, alveg rétt... Við náðum loksins að skrá okkur í flugið frá Gatwick til Madrídar og náðum að slappa aðeins af áður en við stigum um borð í appelsínugula vél EasyJet og við tók starfsfólk í gráum og appelsínugulum fötum sem talaði sjúklega hratt og stúlkurnar voru sambland af Vicky Pollard og píunum úr Mile High þáttunum með smá dassi af druslunum úr Footballer's wives. Það tók 2 tíma að fljúga til Madrídar og maturinn sem maður þurfti að kaupa dýrum dómi var vondur. Nú lendingin í Madríd var harðari en á Heathrow svo við ákváðum að dæma þær líka á leiðinni heim, svona okkur til dægrastyttingar.

Á flugvellinum í Madríd tók ungur kennari á móti okkur en hann talaði voða litla ensku og vissi þar að auki ekki alveg hvenær hinn kennarinn kæmi til að sækja okkur. 30 mínútum seinna birtinn hinn kennarinn og upphófst nú mikill leikur um hvernig ætti að koma sér út af bílastæðinu við flugvöllin (það er víst ekki auðvelt). Bílferðin niður til Toledo var ein sú háskalegasta sem ég hef farið í og sat ég með samanherptar kinnar (á báðum stöðum) á meðan maðurinn sveiflaði bílnum til og frá milli akreina á 130km hraða og talaði spænsku mjög hratt við samferðakonu sína. Ég var hrædd um líf mitt og svei mér ef Róbert var ekki orðin pínu smeykur á endanum!
Þegar við komum loks til Toledo var okkur tjáð að við gætum sett töskurnar okkar upp á hótelherbergi og svo væri beðið eftir okkur á veitingastað í nágrenninu (n.b. klukkan var orðin hálf ellefu að kvöldi til) og neyddumst við til að borða 3 réttaðan kvöldverð sem stóð yfir til miðnættis áður en við náðum að hvíla okkur. Ég var orðin svo þreytt að ég tók ekki einu sinni eftir því að hótelið okkar var við hliðina á yndislegri kirkju með fallegum kirkjuturni en hann sá ég næsta morgun....

Þeir segja að fall sé fararheill...

Ok.
ferðin byrjaði nú ekkert allt of vel. Við áttum flug suður kl. 18:40 á þriðjudagskvöldið. Veðrið var svona lala og ég frétti að það væri jafnvel skítt í Reykjavík. Með hroll í hjarta og kvíða steig ég upp í flugvélina og vonaði að ég hefði rangt fyrir mér. Því miður var þessi flugferð það slæm að hún vann stimpilinn "versta flugferð síðustu 2ja ára" í mínum huga. Annar nemandinn minn var mjög hræddur og ég verð að segja að hjartað mitt sló ansi ört þar sem vélin tók dýfur og hristi okkur eins og Martini drykk. Við komumst þó á leiðarenda og náðum að hvíla okkur (mismikið) áður en við mættum á BSÍ kl. 05:30 á miðvikudagsmorguninn. Ferðin til Kefló var óáhugaverð og í raun flugið út til Heathrow líka. En hér byrjaði allt svona "vesenið"(ekki svo mikið þó).

Vegna þess að IBERIA hafði gjörsamlega drullað yfir okkur þurftum við nú að taka leigubíl yfir á Gatwick flugvöll til þess að ná EasyJet flugi til Madrídar. Leigubílstjórinn var fyndinn ungur maður sem hafði skoðanir á öllu, tengdi alla forseta Bandaríkjanna við konungborið fólk í Evrópu (alla, þ.e. nema Bush) og var með slatta af samsæriskenningum. 45 mínútum af hraðbraut seinna vorum við mætt á Gatwick en gátum ekki innritað okkur í flugið nærri því strax svo við þurftum að drösla töskunum okkar upp á aðra hæð og planta okkur í sófa nærri Starbucks og spilakassa sal sem spilaði alltaf 10 sek. af "Money" með Pink Floyd á 3 mín. fresti. Stuð.

ég þarf nú að gera hlé á sögu minni til að fara í 1 stk. atvinnuviðtal en meira síðar (m.a. um starfsfólk EasyJet, háskalega keyrslu út úr Madríd og kirkjuturn)

18. mars 2007

komin heim...

Ég er loksins komin heim aftur!
Eftir 5 daga ferðalag, 3 lönd, 6 flug (3x2), lestarferðir, rútuferðir og trilljón gönguferðir er ég komin aftur til Akureyrar með þunga tösku og höfuð fullt af minningum.
Ég er við það að sofna við tölvuna svo ég læt þetta duga - tilkynningarskyldan búin.

13. mars 2007

Ferðin byrjar...

Flug til Reykjavíkur eftir einn og hálfan, flug til London eftir 16 tíma og áfram til Madrid eftir rétt um sólarhring.... Veit ekkert hvernig netsambandi ég verð í þarna úti svo ég hendi bara inn færslu ef ég get.. annars bara leiter....

11. mars 2007

Voy a Espana!

Takk fyrir krossleggingu putta og tása og allt - ég er þokkalega á leiðinni til Spánar! Á miðvikudaginn held ég því til Madrídar gegnum London og fer svo þaðan til Toledo. Framundan eru fundir, skoðunarferðir, smá afslöppun (vonandi) og kannski maður kaupi smá marsípan?

Í dag fór í ég skírn og skírnarveislu með tilheyrandi kökum. Mætti reyndar aðeins og seint í kirkjuna (ekki mér að kenna!) en náði þó mest allri athöfninni. Innilega til hamingju Inga, Einar og Jóhanna Margrét!

Á morgun byrjar Ratatoskur hjá nemendum M.A. og ætlum við Harpa samkennari að bjóða upp á kennslu í prjóni og hekli - vúhú! Þetta þýðir að almenn kennsla fellur niður að mestu leyti og því er hægt að nýta dagana í að fara yfir ýmsustu mál; stíla, möppur o.fl.

Er á leiðinni í bólið - þreytan að hellast yfir mann...

9. mars 2007

Toledo


Það vill svo skemmtilega til að ég er sennilegast, (nánast alveg komið á hreint, bara smá eftir að staðfesta) að skreppa til Toledo á Spáni á miðvikudaginn (sjá fallegu mynd hér að ofan). "Skreppa?" heyri ég einhverja segja - jú ég þarf að fara á fund ásamt samkennara mínum Róberti og tveimur nemendum. Ef allt gengur eftir þá förum við út á miðvikudaginn og komum aftur á sunnudaginn. Viljið þið nú krossleggja alla putta (og tær) að Easy Jet sé ekki með vesen eins og Iberia sem hefur hér með misst mikil viðskipti (löng og drepleiðinleg saga sem ég verð pirruð á að segja svo ég sleppi henni bara ;).


Helgin fer í lestur fyrir MA ritgerðina og á sunnudaginn mun hún Jóhann Margrét verða skírð og er mér að sjálfsögðu boðið :) Hlakka til að sjá ykkur, krúttin mín!

Átti smá erfiðan dag í gær og vil bara segja TAKK Inga mín fyrir að skilja mig :)
Hafið það eeeeeeeextra gott og túdúls
p.s. Hawaii druslan haggaðist ekki (fór meira að segja aðeins upp - úbbs!)

5. mars 2007

mar í lófa

Það er margt sem ég er tilbúin til að gera fyrir vini mína. Ég er til í að hjálpa þeim að flytja, bera húsgögn og kassa langar leiðir og jafnvel hjálpa þeim að mála, þrífa og setja saman IKEA húsgögn. Það er samt eitt sem ég mun aldrei gera fyrir ykkur, elskurnar mínar og það er að losa gólfefni hjá ykkur! Ég eyddi meirihluta sunnudagsins í að rífa upp gólfdúk, teppi og berja sundur parket. Í dag var mér illt í öllum líkamanum og í lófa mínum er rauður, aumur blettur eftir kúbeinið. Mér þykir samt ennþá vænt um kúbeinið ;)

Á meðan ég sat hérna fann ég hvernig líkaminn stífnaði enn meira. Ég finn að ég verð enn aumari á morgun - ég hlakka ekki til :(

1. mars 2007

niðurrif, bekkjarpartý og 100 grömm

Ég hoppaði upp um 100 grömmin aftur.. better luck next time!

Fór í bekkjarpartý hjá umsjónarbekknum mínum í kvöld. Gisela var svo yndisleg að bjóða okkur heim í spjall og köku og þegar ég fór voru þau ennþá að og horfðu á Lögregluhundinn Rex. Mér tókst líka að hjálpa meira til við framkvæmdirnar (aðallega með því að taka myndir :) en ég fékk samt flís.. töff.

Er að örmagnast af þreytu svo ég hef þetta stutt í kvöld.
Munið samt að horfa á Gettu Betur annað kvöld - Verzló-MA í beinni!!

27. febrúar 2007

Ég fíla ekki steinull


stend í smá framkvæmdum með ma & pa og hef komist að eftirfarandi:


-steinull er rykug og inniheldur kláða aukandi efni
-kúbein er massa flott verkfæri
-það er ekki flott að líma spónaplötur fastar
-það er nauðsynlegt að eiga hanska (sjá steinull)

er rykug, þreytt og fór ekki einu sinni í ræktina - fussum svei!

25. febrúar 2007

Sunnudags fótbolti


Er búin að horfa á 2 fótboltaleiki í dag. Horfði á úrslitin í deildarbikarnum milli Arsenal og Chelsea og sá þegar John Terry fékk fast spark í andlitið. Þetta var eitt það ljótasta sem ég hef séð lengi! Svo missti ég reyndar af slagsmálunum og öllum rauðu spjöldunum en þetta endaði í sigri Chelsea, sem að mínu mati áttu arfaslappan fyrri hálfleik.
Í augnablikinu er ég að horfa á Barcelona - Bilbao og Barca er að vinna 2-0 í augnablikinu og Eto'o var að skjóta rétt framhjá...

ég er fótboltahóra

22. febrúar 2007

Júkaleilei

Vúhú!
daman hreyfðist nú ekkert mikið en eitthvað ;) Er einmitt á leiðinni í ræktina - gott að geta horft á Guiding á meðan maður svitnar eins og svín... það er nefnilega ALLT að gerast í GL þessa dagana og ber þá hæst að minn gamli, góði Philip Spaulding er mættur til leiks á ný, Blake er ólétt af tvíbbum (Ross á einn, Rick á hinn - yes, I know!) og Dinah er að reyna að ná pjeningunum sínum aftur af Roger.. þetta er alveg allt að gera sig!!

Ég hef verið óheyrilega löt þessa vikuna, einhver innipúki í mér. Í kvöld ætla ég því að drífa mig í prjónaklúbb hjá Hörpu sem ég vinn með og reyna að mjaka þessum peysum mínum áfram.

Helgin er algjörlega óplönuð - sjáum hvort eitthvað skemmtilegt detti ekki inn ;)

21. febrúar 2007

Special song for you, my friend...

Bad news comes don't you worry even when it lands
Good news will work its way to all them plans

And we'll all float on, ok
And we'll all float on, alright

Bolludagskórónur




19. febrúar 2007

Gleðilegan bolludag!


Bolla, bolla!
Afrekaði að föndra bolludagskórónu handa mér og Ágústi Óla á meðan ég passaði hann. Hendi inn mynd við tækifæri. Þar til fáið þið að njóta þess að stara á þessa ljúfu sem ég fann á kanadískri heimasíðu!
Á morgun heldur átið og hefðin áfram með Baunadagnum, aka, Sprengidegi. Hlakka mikið til að kjamsa á baunasúpu með kjötbitum og rófu útí *slurp*.
Öskudagurinn rekur síðan lestina á miðvikudaginn en mér skilst að einhverjir ætli að mæta í búning í skólanum. Spurning um að fara með lepp fyrir öðru auganu?
Helgin var ljúf og góð, vann sem minnst og leyfði mér að sofa, horfði á Júró og leigði mér svo Prada-djöfulinn. Hún var alveg ágæt, hló inn á milli þess sem ég slefaði yfir öllum þessum fötum og skóm! Fékk eina gamla með, Garden State - með skemmtilegri myndum sem ég hef séð. Gott hjá Zack Braff!
Best að byrja útvötnun fyrir morgundaginn - saltið fer illa í mig :/ en þetta er bara svo gott!


15. febrúar 2007

óbreytt ástand

já,
eins og mig grunaði þá fór vigtin ekkert niður á við þessa vikuna. Ég fór bara einu sinni í ræktina og borðaði bakarísfæði (uss uss!) svo ég bjóst nú alveg við þessu.
Hawaii daman situr því sem fastast á núllinu alla vega þar til næsta fimmtudag.

Í gær sat ég áhugavert námskeið um dyslexiu og komast að helling sem ég vissi ekki áður. Nú ætla ég að tileinka mér nokkrar bættar kennsluaðferðir sem gagnast ekki bara þeim heldur öllum nemendum.
Í dag sit ég hins vegar heima og vinn í MA ritgerðinni minni. Fimmtudagsmorgnar verða helgaðir þessum skrifum og er ég núna á algjöru grunnstigi. Í síðustu viku fékk ég lánaðar bækur hjá Ólöfu hinni þýðu og er ég að fara í gegnum þær núna. Erfiðast er að byggja upp hinn faglega/fræðilega grunn sem ritgerðin mun svo loks byggjast á svo ég held að skrifin sjálf verði mun síðar.

Helgin er framundan, veit ekki hvað ég ætla að gera en líklegast þarf ég að vinna eitthvað - sit uppi með slatta af ritunarverkefnum eftir daginn í dag!

10. febrúar 2007

The big ticker...

Lengi hefur mig vantað almennilega hvatningu til að hreyfa mig reglulega. Þrátt fyrir að vita um skaðsemi kyrrsetu, nammiáts og óhollustu af öllu tagi þá hef ég aldrei verið nógu hrædd, nógu ákveðin að takast á við vigtina sem mjakast (reyndar mishratt) upp á við á hverju ári. Nú er svo komið að ég er 14 kg og þung miðað við hæð og aldur og allt saman. Jebbsí, og ég er búin að komast að því að þessi kíló eru að sjálfsögðu allt saman fitukíló. Svo markmiðið er núna að hafa teljarann fyrir framan augun á mér og öllum hinum sem koma hingað inn svo ég geti asnast til að taka ábyrgð á mínu lífi og minni heilsu. Fyrir jól lækkaði ég þessa tölu úr 17 kg í 12 kg en 2 komu aftur yfir jólin og prófatíðina (úff púff) svo nú er talan í 14 kg.

Það virðist vera ákveðið "trend" að létta á hjarta sínu í bloggheiminum en þetta er ekkert slíkt. Hver sem sér mig veit að ég gæti auðveldlega lifað heilbrigðara lífi, án þess að ég sé einhver offitusjúklingur á barmi örvilnunar.

Nú er bara að drífa sig út, hlaupa fituna af og byggja upp vöðva. Og hvað hef ég sem gulrót núna?
Nú fyrri gulrótin er ferðin mín til Kaupmannahafnar eftir 49 daga. Ef ég ætla mér að versla einhver föt þá er nú betra að passa í þau - ekki satt?
Seinni gulrótin er fyrirhuguð heimsókn til Parísar og hugsanlega Nice seint í sumar. Það væri nú ekki slæmt að geta spókað sig í landi herðatrjánna í bikiní!

Svo, á hverjum fimmtudagsmorgni vigta ég mig og skelli nýrri tölu á hawaii dömuna hérna uppi.
Fylgist með.....

9. febrúar 2007

Hörmungar

Eins og flestir íslendingar hef ég fylgst með Kastljósinu og DV í umfjöllun þeirra um Breiðavíkur málið svokallaða. Ég á engin orð sem geta lýst því hvernig það er að fylgjast með þessum mönnum sem þurftu að ganga í gegnum hreint helvíti segja sögu sína í sjónvarpi. Ég held ég sé búin að gráta á hverju einasta kvöldi síðan þetta kom upp og ég trúi því ekki enn að svona lagað hafi gerst hérna á Íslandi.

Annað mál er Byrgismálið. Þessir ótrúlegu atburðir þar eru líkastir glæpasögu og vona ég heitt og innilega að það mál verði krufið til mergjar en ekki látið liggja í möppum og kössum í einhverri geymslu í mörg ár eða jafnvel áratugi.

Ég er fegin að fólk þorir að koma fram og segja frá þessum hræðilegu atburðum.

7. febrúar 2007

Möðruvellir


Kenndi á Möðruvöllum í dag.
Þeir sem þekkja til MA vita að Möðruvellir er móderníska, kassalaga byggingin sem sést þegar þú kemur að skólanum frá Þórunnarstræti. Vanalegast kenna tungumálakennarar aðeins í Gamla skóla og á Hólum en auðvitað þurfa menn að flakka á milli - bara hollt.

Mér tókst að "týna" veskinu mínu á leiðinni heim frá Reykjavík. Eftir mikla leit og örvæntingarfulla hringingu í bensínstöðina í Borgarnesi, bankann fyrir lokun og í Valdísi sem ég keyrði með, gafst ég upp og taldi það glatað. Sem betur fer fann hún Valdís það síðan í bílnum sínum svo ég glataði ekki öllum kortunum mínum, ökuskírteininu, nafnspjöldum og kaffibollakortinu ómissandi. Þvílíkur léttir. Sannar bara það að um leið og þú hringir í bankann og lætur loka kortunum þá finnurðu veskið.
Lögmál.

4. febrúar 2007

Back in the north country...

komin heim aftur eftir stutta helgi í borginni - ég veit að ég hitti ekki alla sem ég þekki þar en ég var með fókusinn á familíuna.

er að brjóta saman allar peysurnar sem ég keypti og ganga frá herberginu áður en ég skríð undir sængina og legg höfuðið á nýja koddann minn.
það er dúnkoddi.

good times.

2. febrúar 2007

Múrmeldýrsdagur

blogger er tvisvar búinn að gleypa færsluna mína.

nenni ekki að skrifa í þriðja sinn það sem ég hafði að segja en í stuttu máli:
-Í dag er groundhog day. Punxatawny Phil sá skuggann - vor er væntanlegt.
-er á leiðinni suður. Óvænt ferð til að hitta systur mína og Guðjón, mon frére..
-klúðraði næstum akademískum ferli mínum í dag. Með góðri hjálp nemendaskrár og 38.000 kr náði ég að bjarga MA náminu mín.

lag dagsins: Eyes með Rogue Wave

Missed the last train home
birds pass by to tell me that im not alone
well im pushing myself
to finish this part
i can handle a lot
but one thing i'm missing is in your eyes

have you seen this film
it reminds me of walking down the avenue
well im washing my hands of attachments,
yeah i will land on the ground
but one thing I’m missing is in your eyes

1. febrúar 2007

Ný önn, nýr mánuður

Í dag byrjar skólinn formlega aftur. Ég hitti reyndar nokkra nemendur í gær í prófsýningum og stundatöflu-útbýtingu en í dag byrjar ballið. Kennsluáætlanir, leslistar og orðaforðalistar hafa komið í hrönnum úr ljósritun og hvíla nú í plastvösum merktum bekkjunum mínum. Alltaf ákveðinn léttir að hafa hlutina tilbúna vel fyrirfram ;)

Er búin að vera í lægð, eða á púpu-stigi og vil helst bara vera ein úti í horni vafin inn í sæng og teppi en það gengur ekki! Segi letipúkanum stríð á hendur og fer í ræktina á eftir!

Helgin býður upp á nokkra möguleika; leikhús, sund, ræktin, saumar, prjónaskap, lestur, sjónvarpsgláp o.s.frv. o.s.frv.

Vona að þið hin hafið það sem best - já og til hamingju með að janúar er loksins búinn!

25. janúar 2007

hugarró

Ég var að senda frá mér síðustu einkunirnar. Þungu fargi er af mér létt og mér er hreinlega illt í augunum eftir að hafa rýnt í ansi marga stíla, þýðingar og ritunarverkefni (sem í gamla daga hét allt bara stíll ;)

Framundan er helgin þar sem ég hyggst slappa talsvert af og í næstu viku fer lokafrágangur fram á undirbúningi næstu annar og hún byrjar svo á fullu á fimmtudaginn. Kominn viss spenningur í mann að byrja upp á nýtt, hreint excel blað fyrir einkunnir og ótaldir möguleikar á verkefnum, kennsluaðferðum og efnum (hehe).

Voða lítið að segja - er frosin í hausnum....

22. janúar 2007

24... again

Sá fyrsta þátt nýrrar syrpu af 24 í gær. Þar var nóg um blóð og pyntingartól og læti. Jack eins og niðurbrotin maður eftir 2 ár í kínversku fangelsi. Þegar svartnættið virtist ætla að grúfa yfir öllu reis minn maður upp og barðist. Flottur Bauer.

Vann eins og vinnusjúklingur um helgina og uppskar lítið annað en þreytu og er því hálf dofin í dag. Síðasta prófið er um það bil að hefjast og eftir það tekur bara við endalaus yfirferð.. er reyndar aðeins u.þ.b. hálftíma frá því að skila inn fyrstu einkununum... spennó ;)

Langar á sólarströnd, sandur, sjór og kaldir drykkir.... ó já

19. janúar 2007

Graskersbaka

Bakaði graskersböku í gær og fór með hana í skólann því ég er með próf í dag. Í dag er líka bóndadagur og afmælisdagur ;) ég er ekki að fiska kveðjur, bara tilkynna það að ég er orðin 27 ára. Púff!
Í dag er næst síðasta prófið mitt og síðasta er á mánudaginn en svo byrjar ný önn þann 31. janúar. Í millitíðinni er mikil frágangsvinna og undirbúningsvinna, ásamt fundum, ráðstefnum og fyrirlestrum.

M.A. vann útvarpsviðureign sína í Gettu Betur í gær og dróst á móti Verzló í sjónvarpinu föstudaginn 2. mars. Allir að fylkja liði og styðja gamla skólann sinn (þeir sem voru í MA ;)

17. janúar 2007

Langar setur...

Maður virðist ekki gera mikið annað en sitja þessa dagana. Ef maður er ekki að sitja yfir nemendum í prófi er maður að sitja við að semja próf eða sitja við að fara yfir próf. Þetta er ekki eins afslappandi og menn halda kannski :) Ég þarf að vera duglegri að hlaupa yfir götuna og skella mér á brettið þegar ég kem heim úr vinnunni. Í gær var bara svoooooo kalt, -16°C á mælinum heima og hrímþoka lá yfir bænum. Ekki beint hvetjandi ;)

Í dag sá ég sorgarfrétt á mbl.is - leikkonan sem lék Sally Spectra í Bold and the Beautiful er dáin :( hún var með magakrabbamein blessunin. Lengi lifi Sally!

ég sé fyrir endann á prófa samsetningu því síðasta prófið verður að fara í ljósrit í fyrramálið svo það klárast í dag. Þá er bara yfirferðin og yfirsetan eftir.... held ég sé að fá sigg á rassinn......

14. janúar 2007

Dorrit

Ég elska Dorrit.
Flestir sem þekkja mig vita að lengi hefur mér fundist Dorrit ein af flottari manneskjum á landinu og ekki bara fyrir klæðaburð og frábært bros. Viðtal Evu Maríu í sunnudags kastljósinu í kvöld sýndi mér enn og aftur hversu mikil snilld þessi kona er. Hreinskilni og einlægni eru orð sem mér detta í hug eftir að hafa horft á hana svara hverri spurningu á fætur annarri og jafnvel þegar kom að pólitískri spurningu (sem hún sagði að hún ætti ekki að ræða) svaraði hún samt og hikaði hvergi.
Dorrit er klassapía sem á alveg skilið að fá hrós og sýnir einmitt að það er ekki alltaf hversu mikið þú kannt heldur hvað þú gerir við það sem þú kannt.

13. janúar 2007

When you were young

You sit there in your heartache
waiting on some beautiful boy To...

to save you from your old ways

You play forgivness
watch it now , here he comes
he doesn't look a thing like jesus

but he talks like a gentleman
like you imagined
when you were young

Svo byrjar hið frábæra lag When you were young með The Killers. Þegar ég heyrði það fyrst þegar Sam's town kom út þurfti ég að halda niðri í mér andanum í smá stund. Það er bara of mikið að gerast í þessu lagi! En, fílaða í tætlur og hlustaði óendanlega oft á það í dag meðan ég fór yfir próf.

Talandi um próf, þá er mér búið að vera kalt á hægri hendinni í allan dag. Fyrst fannst mér þetta skrýtið því vanalegast verður mér bara kalt á henni ef ég er lengi í tölvunni (svokallaður músar-handar-kuldi) en ég var ekkert í tölvunni í dag... Svo fattaði ég það. Ég var búin að halda á rauðum penna í meira en 4 klukkutíma með afar takmörkuðum pásum. Ég er búin að vera heima í 2 tíma, ekkert gert með hendinni og mér er ennþá kalt. Spurning um heita sturtu?