Pétur Pan, Amélie og jólin 1984

Ég er búin að klippa mig... stutt!
Ég er ennþá að venjast því að hafa ekki langa lokka, sem festust iðulega í rennilásnum á úlpunni minni, festust undir bandinu á axlartöskunni, festust í teygjum svo hálfur hársvörðurinn logaði. En ekki lengur! Þið ykkar sem ekki hafið séð mig enn verðið að bíða aðeins lengur - set inn mynd síðar ;)

Átti alveg hreint frábæran dag í gær þegar ég skilaði af mér ritgerð um Tristram og Ísöndu, fór í ræktina (40 mín. á brettinu, takk fyrir takk!) og fór svo í matarboð með þýðingafræði gellunum mínum. Ég hló svo mikið og borðaði ógrynni af mat að ég er ennþá að jafna mig! Takk fyrir frábært kveld stúlkur og skemmtisögur!!

Í dag er ég að ganga frá ofaní ferðatösku því á morgun ætlum við Eva systir að bruna norður í páskaveðrið þar og tjútta í viku eða svo. Hlakka til að komast aðeins í burtu.

Föstudagur, kalt úti, var að drekka gulrótarsafa með skvettu af eplasafa útí... nammi namm!

Hafið það "bra" um helgina!

hlátur og breytt viðhorf

Sat og hlustaði á víðsjárpistil um hegðun unglinga og datt næstum því af stólnum, vegna hláturs, yfir skarplegum athugasemdum og lýsingum á þessum "þjóðflokki" sem kallast unglingar. ekki er nú langt síðan ég var unglingur en ekki var ég að veitast að fólki í strætóskýlum.. held ég hafi valdið foreldrum mínum meiri vandræðum en öðrum.. ja, kannski gamli enskukennarinn minn í gagganum verði ekkert allt of glaður að sjá mig í vor! hahaha!

Það er kominn tími á breytingar - fer í klippingu annað kvöld og faxið skal af.. það er komið nóg af síðu hári ... í bili :)
sit núna við tölvuna, hlusta á johnny cash kyrja cover lög á American III...

I See A Darkness

Well, you're my friend
And can you see
Many times we've been out drinking
Many times we've shared our thoughts
Did you ever, ever notice, the kind of thoughts I got
Well you know I have a love, for everyone I know
And you know I have a drive, for life I won't let go
But sometimes this opposition, comes rising up in me
This terrible imposition, comes blacking through my mind

And then I see a darkness
Oh no, I see a darkness
Do you know how much I love you
Cause I'm hoping some day soon
You'll save me from this darkness

Well I hope that someday soon
We'll find peace in our lives
Together or apart
Alone or with our wives
And we can stop our whoring
And draw the smiles inside
And light it up forever
And never go to sleep
My best unbeaten brother
That isn't all I see

And then I see a darkness
Oh no, I see a darkness
Do you know how much I love you
Cause I'm hoping some day soon
You'll save me from this darkness


enginn flottari

síðasta skólavikan

Var svo yfirspennt á fimmtudaginn að ég fékk það beint í hausinn á föstudaginn og lagðist í veikindi um helgina. Maður þarf að passa sig á stressinu!
Er nú orðin frísk aftur, svona að mestu leyti, og sit heima í lærdómi. Þetta er síðasta skólavikan mín og merkilegt nokk held ég að þetta verði síðasti lærdómur minn í bili (ef frá er talin ritgerðin mín). Þarf að fá almennilega pásu aftur.. kannski ég taki mér hálfsmánaðar frí eftir prófin þangað til ég fer að vinna í ritgerðinni..

Er að reyna að klára sem mest ég get áður en ég bruna norður í eitt stykki fermingu og smá páskafrí sem mun samt innihalda mikinn lærdóm fyrir munnlegt próf í bókmenntasögunni. Á eftir að lesa svolítið um 20. öldina og glósa helling líka.
En það verður gott að komast "heim" í smá stund ;)

takk enn og aftur fyrir allar frábæru kveðjurnar við síðasta innslag, það er yndislegt að sjá hvað maður á í raun marga og góða vini.. maður gleymir því stundum..
takk ezzkurnar mínar

all things must come to an end

jæja.. þá er kominn tími til að tala.
Ástæða þess að ég er ekki búin að blogga neitt undanfarið er sú að ég stóð í viðræðum við vinnustaðinn minn um launaða þýðingavinnu í sumar. Ég hefði þá verið alfarið í þýðingum og ekki lengur þurft að klæðast gula hryllingnum. En í dag varð úti um þann draum þar sem við náðum ekki saman í launamálum.

Svolítið erfitt að horfa á eftir þessu starfi en ég er bara hreinlega meira virði en þeir voru tilbúnir að borga svo ég sagði starfi mínu lausu áðan.
Ég fer núna á fullt í það að finna mér aðra og betri vinnu en þarf að vinna smá uppsagnarfrest hjá þeim, en ekki samt við þýðingar.

Þetta er búið að taka á, vera einstaklega erfið vika og ég vil bara þakka öllum sem hlustuðu á mig, hjálpuðu mér að taka þessa ákvörðun og sannfærðu mig um að ég væri ekki klikkuð..

takk!

afsakið hlé

hef ekki verið í stuði fyrir bloggið.. hef margt og mikið að segja en það á ekki heima hérna.. held ég.. þó ég vilji ekki beint ritskoða sjálfa mig þá held ég að ég skrifi bara ekkert meira hér fyrr en ég er búin að ganga frá ýmsum málum.
svo það verður afsakið hlé skilti hér í smá stund...

vona að þið afsakið

Wicked Science

Já krakkar mínir, ansi er ég löt við að setja eitthvað hérna inn! Er andlaus andi...
Átti bara ansi ljúfan föstudag þar sem ég skellti inn þýðingu á skjáinn (þið ykkar sem eruð með adsl sjónvarp getið kíkt á þátt númer 5 í wicked science og séð nafnið mitt aftast ;)og kíkti svo í holtagarða til að græja svefnherbergið mitt.
Ég splæsti í nýjar gardínur og málningu og sef ég nú extra vel í nýútbúnu herbergi.
Helgin fór annars bara í vinnu, styttingu á gardínum og málningarvinnu og var ég það þreytt að fátt annað komst að!
Síðustu daga hef ég verið að vinna í skólaverkefnum og verð að klára þetta á næstu 4 vikum ef ég á að halda geðheilsu og klára þetta mastersnám.
Ég stend líka í samningaviðræðum með sumarvinnuna mína - fæ að vita meira á mánudaginn.

En, er sem sagt á lífi, lítið að frétta, langar að sofa endalaust...

Ó heilagur Patrekur

"Allt er vænt sem vel er grænt" gæti verið slagorð hjá Íþróttaálfinum en ég vil heldur fagna því að í dag er St. Patrick's day og ber hann loksins upp á föstudegi! Í dag langar mig að sitja á skítugri krá og sötra eins og eina kollu af bjór.
Ég man eftir litlum bar í Peterborough sem var með klukku á veggnum sem taldi stanslaust niður að þessum degi og að honum loknum byrjaði hún aftur að telja niður - alveg niður í sekúndubrot! Ahh, Kanada..

Fékk næturgesti í gær þegar systir mín og frænka komu frá London færandi mér m&m poka sem ég maulaði aðeins í morgun. Alltaf gaman að heyra ferðasögur - sérstaklega þar sem þær hittu Jamie Oliver á Fifteen! Vel gert!!

Er að fá hnút í magann því ég er um það bil að fara upp á skjáinn með þýðingu sem ég vann fyrir þá og nú er komið að dómsdegi : gott eða slæmt? Annars er ég merkilega ánægð með þýðinguna - læt ykkur hin þó um að dæma hana ef hún kemst inn hjá þeim ;)

Föstudagur, komin með ógeð á kvefinu mínu - nenni ekki að snýta gulgrænu lengur...

schönes wochenende

klukk-blogg

Jæja, Lisa klukkaði mig:

4 störf sem ég hef unnið um ævina:
Kirkjugarðar Akureyrar - allt möööögulegt og ómögulegt
Bréfberi (Íslandspóstur)
Sölumaður (Ikea, Lyf og Heilsa)
Hamborgaragella (Natten, hvar annars staðar??)

4 bíómyndir sem ég gæti horft á aftur og aftur:
Bridget Jones' diary
While you were sleeping
Lord of the Rings: Fellowship of the Ring
Top gun

4 staðir sem ég hef búið á: (eru reyndar bara 3)
Akureyri
Reykjavík
Peterborough, Kanada

4 sjónvarpsþættir sem mér líkar:
Vesturálman
Gilmore girls
CSI
LOST

4 síður sem ég skoða daglega fyrir utan bloggið:
simnet.is
hi.is
mbl.is
landsbanki.is

4 matarkyns sem ég held upp á:
Kjúklingurinn hennar mömmu
Samloka með hnetusmjöri
Kínverski maturinn sem pabbi eldar
Grjónagrautur

4 staðir sem ég vildi heldur vera á núna:
Á eyðieyju í karabíska hafinu
Á Ítalíu, helst ´í Toscana
Í góðu freyðibaði
Í heimsókn í Kanada

4 staðir sem ég hef heimsótt í fríum:
Bretland
Danmörk
Slóvenía
Þýskaland

4 bloggarar sem þurfa að gera þetta líka:
Íris Helga
Inga Björk
Bjössi (ef hann les þetta ;)
Garún

Jammsí, efast um að þið séuð nokkru nær en þetta er 'as good as it gets' í kvöld!

Starr reyndist ekki mikil stjarna

Já fyrir ykkur sem fylgist með Project Runway þá skiljið þið fyrirsögn dagsins! Anorexíu-lögfræðingurinn datt út í gær með ljótasta kjól sem ég hef séð lengi (þótt Robert hafi farið ansi nærri því líka!)en hinir kjólarnir voru margir hverjir fínir.

Er búin að vera á kafi þessa vikuna í skólanum og vinnunni og sé ekki fyrir endan á neinu en þó verður aðeins léttir á morgun - skila af mér verkefni - meira um það síðar.

Helgin er að koma á fullri siglingu (er ekki nýbúin að vera helgi?) og er ég að vinna báða dagana og mánudaginn líka, úff púff! Vona að næsta vika verði mér happadrjúg og ég nái að klára eða vinna langleiðina verkefni mitt um elskendurna miklu, rómeó og júlíu hans.

St. Paddy's day er á morgun - spurning um einn bjór?

það kemur alltaf aftur mánudagur

Góðri helgi er lokið.
Árshátíðin gekk glimrandi vel þrátt fyrir smá slappleika hjá mér og náði ég að líta ansi fabulous út að mati flestra þarna um kvöldið :) Byrjuðum á því að mæta til Katrínar í förðun og fordrykk og var ansi mikið spjallað við eldhúsborðið hennar. Eftir að við komum í víkingasalinn var borinn í okkur matur ásamt úrvals skemmtiatriðum og ræðum og verð ég að segja að þetta heppnaðist allt saman mjög vel. Ég veit samt ekkert hvernig ballið var því þá var ég orðin svo þreytt og máttlaus að ég hringdi í Evu systur og lét hana ná í mig!

Í gær átti ég svo bara dag fyrir mig. Gleymdi öllu stressi, allri vinnunni sem ég á eftir að vinna á næstu 30 dögum og lét fara vel um mig á sófanum mínum á milli þess sem ég lagaði aðeins til í herberginu og þurrkaði ryk af hillunum í stofunni.

En í dag er að sjálfsögðu mánudagur og þá þarf maður að vera duglegur að læra aftur. Er búin að klára strembið heimaverkefni í prófarkarlestri fyrir Málnotkun og er að demba mér í skrif Fjölnismanna inná timarit.is
fyrir bókmenntasögutímann á morgun.. svona er maður hress á mánudegi!

Vona að þið hafið haft það ljúft og skemmtilegt um helgina...

Árshátíð og að segja bless

Já kæra fólk ég er að fara á árshátíð Ikjea í kvöld! Húllumhæið byrjar þó um 3 leytið þegar við kvenfólkið ætlum að safnast saman og fá okkur eitt kampavínsglas yfir léttu spjalli og meikpúðum. Er búin að græja allt saman- eða næstum því ;)
Er á leiðinni í Smáralind að finna eitt stk. armband sem mér datt allt í einu í hug að væri sniðugt að vera með!
Ég verð annars mjög svört í kvöld - allt svart nema sokkabuxurnar, svei mér þá!

Ég sagði bless við gamla hottmeil netfangið mitt í gær og mun ekki lengur þekkjast unir 'koskinkorva'. Það var kominn tími á að slútta þessu sambandi þar sem hólfið mitt fylltist alltaf af rusli - óvelkomnu rusli. Ég nota nú annað netfang og held ég hafi fært ykkur öll yfir í nýja msn-ið mitt en endilega látið mig vita ef þið hafið ekki fengið póst og svona pop-up þegar þið loggið ykkur inn á msn :)

Í kvöld ætla ég að skála fyrir fortíðinni, skála fyrir nútíðinni og loks fyrir framtíðinni sem virðist bara geyma góða hluti og skemmtileg fyrirheit.

skál ezzzkan

Upp upp upp!

Líf mitt er á stöðugri uppleið þessa dagana! Er svooooooo ánægð í dag að ég er að springa úr gleði því ég er hægt og sígandi að ná markmiðum mínum og öðlast á reynslu sem ég þarf og vil fá!
Því miður ætla ég ekki að útskýra þetta neitt nánar í bili en langaði bara að deila með ykkur hvað ég er ánægð!


veivei!

held ég fái mér eitthvað gott að borða til að halda upp á þetta :)

að ferðast um heiminn með kókaín í faberge-eggi

Já það er fólk sem er með klassa og svo er fólk með vafasaman klassa. Kate Moss er nú alveg í sérflokki, einhvers staðar þarna á milli og vafraði víst milli verkefna með eggið sitt góða fullt af nasa-nammi. Sumt fólk, sumt fólk...

Fór í morgun í próf í Bókmenntasögu og gékk bara vel - bara ein spurning sem ég lokaðist alveg og gat ekkert svarað en hitt var bueno. Kom svo heim og fann óvæntan glaðning í pósthólfinu mínu.. meira um það síðar..

er á leiðinni út, þarf að kaupa nýtt strætókort, kíkja aðeins í ræktina og skella mér svo í vinnu í nokkra klukkutíma...

góðar stundir.

sunday, sunday

Átti ansi slappan leik í gær þar sem ég skrópaði í partý til hennar Lindu minnar (skamm skamm) en ég var bara búin á því eftir afgreiðslur dagsins... það tekur á að vera alltaf að vinna þær helgar þar sem annað hvort er nýbúið að borga út laun eða þá að nýtt Visa tímabil hefur tekið gildi!

Sat í staðinn í sófanum mínum og horfði á The Life Aquatic with Steve Zissou og hló eins og fáviti. skreið extra snemma í rúmið og dreymdi drauma um skrýtna kalla og skrýtin hús.. veit ekki hvað það snérist um..

Sit núna og pikka inn glósur úr bókmenntasögunni og bölva sjálfri mér fyrir að vinna ekki alltaf hlutina jafnóðum... *sigh*
en nú er þetta að klárast, bara örfáar vikur eftir og þá tekur við ritgerðasmíð sem mun eflaust standa fram að jólum ef ég þekki mig rétt!

ætla að hlusta einu sinni enn á lagið Ping Island/lightning strike op sem er tær snilld!

af heimsóknum og sigri MA

ahh.. ég átti frekar óskemmtilegan morgun í gær þar sem ég mætti extra snemma í skólann (fyrir kl. 8) til að prenta út blöð og svona og kíkti svo rétt á póstinn minn (sem ég hefði átt að gera áður en ég fór út!) og þar blasti við mér forfalla tilkynning frá Hauki... bölv og ragn fylgdu í kjölfarið, sérstaklega þar sem ég hafði eytt dýrmætum tíma í að lesa Sögu af Parmesi Loðinbirni kvöldið áður.. bölv, bölv, bölv. Jæja, ég skundaði nú heim til mömmu en hún er í heimsókn hjá mér og Evu systur í nokkra daga.
Ég lét mér svo leiðast í vinnunni því ekkert var að gera og fór svo í ísbíltúr með Ólöfu og missti þar af leiðandi af keppni MR-MA í Gettu betur! Ég verð nú samt að vera stolt af þeim og litla MA hjartað var glatt að sjá á mbl.is að þeir höfðu unnið. Klapp klapp! (og baula á MR)

Í dag er föstudagur, góður dagur með ekta glugga veðri enda ætla ég að halda mig innan dyra í dag - ef ekki heima þá í verslunarmiðstöðvum því mig vantar ennþá spariskó ;)

ble í bili og góða helgi öll sömul

Prestur strokinn

Fann þessa grein í tímaritinu Ísafold og er hún frá 3. ágúst 1887:
Prestur Strokinn
Sóknarpresturinn að Hvammi í Laxárdal í Skagafjarðarsýslu, síra Magnús Jósepsson, er í síðastliðnum mánuði hlaupinn af landi burt til Vesturheims með fjölskyldu sína, frá brauði sínu í algjöru reiðuleysi og án nokkurra skila. Hann mun hafa flosnað upp til fulls á þessu voru, og viðskilnaðurinn var sá að öll kúgildi staðarins eru gjörsamlega farin, beinagrindur af 5 hrossum lágu í kringum bæinn, ekkert hrossbein slórði af nema eitt mertryppi veturgamalt, 2 kýr tórðu kálflausar og mjög magrar, og 20 kindur komu fram, allar ullarlausar og horaðar. Kirkjan, að kalla fallin, átti um 900 kr. í sjóði inni hjá prestinum.
Prófastur frétti ekki til þessa tiltækis fyr en síra Magnús var kominn alfarinn á Sauðárkrók. Brá hann strax við, en fjekk eigi kyrrsett prestinn, sem sagðist fara af landi burt hvenær sem hann gæti, væri hann ekki hafður í böndum, og fargjald fengi hann annarstaðar að, sent og lánað, svo ekki yrði það af sér tekið. Prófasturinn fjekk að eins skriflega afhendingu á öllum eptirskildum eignum hans sem auðvitað ná stutt til þess, að staður og kirkja fái sitt.
Fróðlegt verður að frétta, hvort nokkur ízlenskur söfnuður í Vesturheimi tekur þennan mann fyrir prest sinn á eptir.

Fyrstu línurnar vöktu hjá mér kátínu en svo þegar dró á söguna var hún alls ekki fyndin. Þvílík eymd og volæði sem fólk flúði.. síðustu línurnar eru samt ómetanlegar og gott dæmi um hvað fólki fannst hér!

býr ástríða í okkur öllum?

þegar maður rekst á fólk sem býr yfir þekkingu á öðrum hlutum en maður sjálfur er auðveldlega hægt að hrífast með ef vel er haldið á spilunum.
Sumt fólk á auðveldara með að koma frá sér ástríðum sínum og ná þannig til fjölda manna sem annars sætu kyrrir og lifðu einungis í sínum eigin huga. Ef hægt er að vekja fólk til umhugsunar með því einu að vera annt um málefnin sín þá er hægt að hafa áhrif - góð áhrif.

Ég veit hvar mínar ástríður liggja - eða ástríður mínar í augnablikinu. Mér hefur alltaf þótt vænt um bækur og bókasöfn. Það er eitthvað við lyktina af pappírnum, hvernig þær raðast misháar í hillurnar og eru mislitar eftir kápunum sem fær hjartað til að slá aðeins hraðar.
Í hvert sinn sem ég heyri frétt um Kanada tekur hjartað mitt lítið aukaslag - eins og það þurfi að slá aukalega fyrir landið sem tók svo vel á móti mér.. landið sem ég sakna stundum ennþá... aðallega sakna ég fólksins og reyni að forðast þá hugsun að suma sé ég aldrei aftur...
Þegar ég heyri tónlist sem virðist slitin úr hjarta og huga tónlistarmanna og sett á disk fyrir alþjóð að gagnrýna, dæma, slíta í sundur og túlka á sinn eigin hátt - þá held ég oft niðri í mér andanum aðeins of lengi...

Á föstudaginn kviknaði ný ástríða í huga mér. Hún kom mér alveg á óvart því ég hélt ég gæti ekki myndað mér nýjar heitar ástríður á svona köldum mánuði en þarna var hún. Í dimmu herbergi andspænis gamalli bók vaknaði með mér ástríða á einhverju sem ég get ekki alveg neglt niður - en hjartað í mér hefur síðan þá verið óvenju hresst, sálin óvenju létt og göngulagið aðeins hraðara.

Ég sit núna við skjáinn, reyni að finna hjá mér löngun til að lesa meira en hún kemur ekki.. Eina löngunin núna er í heitt bað og svo beint undir sæng... kannski ég reyni að vaka aðeins lengur- bara aðeins lengur...

Walk well, brother

Var að koma heim frá Kanadísku kvikmyndahátíðinni í Norræna húsinu. Við sáum tvær myndir, The importance of being Icelandic, 40 mín heimildamynd um vestur íslendinga sem komu hingað í leit að uppruna sínum og svo mynd sem heitir Snow Walker. Seinni myndin var alveg frábær, Barry Pepper sýndi stórleik sem flugmaður er hrapar vélinni sinni einhvers staðar í hrjóstruga norðursvæðinu. Lítil og krúttlega Inúíta stúlka hjálpar honum að halda lífi og kennir honum hvernig á að ná sambandi við náttúruna á sama tíma og hún sjálf glímir við berkla. Hljómar kannski ekki spennandi í eyrum margra en hún var þrusugóð - þið verðið bara að treysta mér ;)

Er búin að vera í lærdómi um helgina en tók mér pásu í gær til að versla saltkjöt og horfa á Sister Act með Ólöfu og Salóme úr vinnunni og hef þar af leiðandi verið að syngja
"I will follow him, follow him wherever he may gooooo" í ALLAN dag!!!
Ætla að fara snemma að sofa svo ég nýti morgundaginn vel - próf á þriðjudaginn í Málnotkun...

ble í bili

af vandræðagangi og vetrarhátíð

ok,
var rosalega dugleg í dag að afla mér upplýsinga og kanna netheiminn sem leiddi mig óhjákvæmilega að Þjóðarbókhlöðunni í enn frekar leit upplýsinga. Ekki vildi þó betur til en svo að þegar ég er að koma upp á 3. hæð hlöðunnar verður mér eitthvað á í síðasta þrepinu og hálf dett ég svona uppfyrir mig en lendi samt á pallinum - beint á milli tveggja stráka sem stóðu á spjallinu! Það eina sem ég gat sagt og gert var "Jesús, enn vandræðalegt" og staulaðist á fætur og gegnum glerhurðina... Rauð í framan og með dularfullan verk í hægri hnésbótinni staulaðist ég að næsta borði og bölvaði í hljóði.. Ég hefði að sjálfsögðu átt að skella mér á línuna "Ég bara féll fyrir ykkur strákar" - en er maður ekki alltaf vitur eftir á?

Í kvöld ákvað ég svo að gerast menningarleg og skellti mér á Þjóðminjasafnið og hlustaði á Þórarin Eldjárn tala um minningar sínar af safninu en hann ólst upp innan veggja safnsins. Maðurinn er með endæmum orðheppinn og kann aldeilis að segja sögur! Eftir lítinn kaffibolla skundaði ég niður á Borgarbókasafn þar sem ljóðlestur, bútasaumur og arabíska hljómuðu um sali safnsins áður en ég trítlaði í næsta hús - Hafnarhúsið. Þar var Stomp að flytja verk ásamt því að allar sýningar hússins voru opnar og vafraði ég aðeins um kalda sali hússins áður en ég ákvað að færa mig úr skuggahverfinu og aðeins nær heimahögunum.

Þjóðmenningarhúsið er eitt af þeim húsum sem ég hef aldrei komið inn í og varð ég alls ekki fyrir vonbrigðum í kvöld. Tvær yndislegar konur tóku á móti mér með brosi á vör og leiðbeindu mér um húsakynnin á og bentu mér á að "alvöru" handritin væru geymd í dimmu herbergi bakatil í húsinu. Eftir að hafa skoðað ljósmyndir og skreytingar úr handritunum, séð nokkrar fréttamyndir af heimkomu handritanna og vafrað um ein í smá stund fann ég dimma herbergið- og það var aldeilis dimmt. Ég bakkaði næstum út aftur en harkaði af mér og varð alls ekki fyrir vonbrigðum. Þarna voru þær komnar, Konungsbók Eddukvæða og Flateyjarbók - bækurnar sem ég er búin að vera að lesa um og úr. Skinnin af öllum þessum kálfum, teygð og hreinsuð, vandlega skrifuð og nostrað við lágu eins og dýrgripir sem ég hafði aldrei ímyndað mér. Ég fylltist einhverju vandræðalegu stolti sem kannski má kalla klisju en sjaldan hef ég verið eins stolt af því að gea bent á eitthvað og sagt það vera menningararfur minn. Ég endaði ferð mína í litlu herbergi með bandarískum hjónum og dóttur þeirra að skrifa með fjaðurpennum á lítil bréfsnifsi og hlustaði með öðru eyranu á fjölskyldufaðirinn spyrja konurnar um aðferðir við varðveislu á handritunum.

Allt í allt held ég að ég hafi lært meira á 2 klukkutímum í kvöld en ég hef í langan tíma. Vona að þetta hvetji mig áfram í lærdómnum á morgun en nú er kominn tími að skella þjóðlega rassi mínum undir sæng og vona að ég sofni út frá draumum um litla menn við kertaljós að skrifa á skinn.....

síðasti föstudagur febrúar

Hvert fór tíminn?
Alveg hreint ótrúlegt að það sé að koma nýr mánuður með nýjum verkefnum og ég ekki búin að klára þau sem ég vildi!
Af hverju er alltaf þúsund sinnum meiri vinna á bak við allt en maður heldur í byrjun? Getur einhver sagt mér það?

Sit í Árnagarði sveitt við að grufla upp ritdóma, gagnrýni, umfjöllun um þýðingar Matthíasar á Shakespeare en gengur voðalega hægt.. held ég verði kannski að játa mig sigraða og færa mig yfir á næsta mann, hann Helga H.
Ef mér tekst vel til í dag ætla ég að verðlauna mig með því að fara á skauta á sunnudaginn með Lisu og Daniel.. þarf bara að muna að hringja í þau bæði og láta þau vita ;)

Það er sól úti, veðrið alveg til fyrirmyndar - hafið það gott í dag

Afsakið, lærdómur stendur yfir

Vildi að ég gæti sett svona skilti á húsið mitt svo að það væri ekki svona mikill hávaði í kringum mig! Ég ætti að sjálfsögðu bara að fara eitthvert annað en ég var eitthvað heimakær í morgun- vildi ekki út!
Er búin að sitja yfir þýðingu Matthíasar Jochumssonar á Rómeó og Júlíu og fannst ég eiga skilið að taka mér smá pásu, skunda út í Bónus og kaupa smá mat (og nammi:) er að maula lítið súkkulaðistykki sem hrópaði á mig að kaupa sig - maður fer ekki að neita svoleiðis ... er það nokkuð?

Nýji síminn minn virkar líka svona agalega vel - er búin að setja inn vel valda hringitóna og nokkrar skemmtilegar myndir líka... nú þarf ég bara að spurja Bjössa hvernig ég á að setja þær inn á bloggið mitt!

En jæja, Matthías kallinn bíður eftir mér - best að kíkja betur á hann

Hello new telephone!

Já krakkar, ekki entist ég lengi í helvíti!
Fór og keypti mér nýjan síma í dag og er hann í hleðslu akkúrat núna. Verð komin aftur í gott skjásamband í fyrramálið :) Þið getið séð mynd af símanum mínum hérna.

þjáist af stanslausri hnakka stífni, er að drepast úr vöðvabólgu greinilega og hefur hún áhrif á skapið rétt eins og líkamann ;) Hafði ekki mikla þolinmæði í vinnunni í dag en svona er víst lífið eða such is life eins og við Lisa segjum allt of oft!

Á morgun er bara bókasafnið og svo lunch með henni Önnu Margréti minni sem tilkynnti mér að loksins verðum við búsettar í sömu borg næsta vetur!!! Við höfum ekki búið á sama stað síðan ég kom heim frá Kanada í maí 2003 og þá var það aðeins í nokkra mánuði þannig að ég er ansi spennt! Þetta verður extra ljúft þar sem Guðjón minn yfirgefur mig líklegast í byrjun sumarsins og verð ég svakalega ein hérna þá!
en venst maður ekki öllu? bara spurning um tíma...

farewell my tephalone

nú er það svart... eða meira blátt kannski. Skjárinn á símanum mínum gaf sig endanlega í dag og er ég nú hálf handalaus! Það þýðir ekkert að senda mér sms og ég sé ekki hver er að hringja í mig.. frekar erfitt allt saman! Það versta við þetta er samt að nú veit ég ekki hvað klukkan er!!!! Hef voðalega sjaldan gengið með úr og hef því treyst á símann minn til að segja mér hvað tímanum líður en núna er ég aldeilis allslaus.
Ég held að þetta séu endalok sambandsins - nýr sími verður keyptur helst í dag svo hann geti notast á morgun...

Átti annars ágætis helgi, var mjög þreytt og með mikinn svima en komst klakklaust í gegnum 3 daga vinnutörn. Í dag ætlaði ég svo að læra og vinna seinnipartinn en þurfti að skjótast í vinnuna áðan í rúmlega klukkutíma og fer svo aftur á eftir.. nennti ekki að hanga í holtagörðum í 3 klukkutíma - það eru takmörk fyrir því hvað hægt er að eyða tímanum í þessum búðum!

þarf að vinna eitt stykki verkefni í vikunni og læra undir próf á þriðjudaginn - jibbí

solitary man

Loksins komst ég í bíó á Walk the Line!
Fyrir þá sem lesa hér reglulega þá var uppselt í síðustu viku og endaði ég á Ölstofunni í staðinn.. það var reyndar frekar skemmtilegt kvöld :) En sem sagt, þá skelltum við Guðjón okkur í bíó í gær og urðum alls ekki fyrir vonbrigðum! Svona í tilefni afmælis hans um daginn hljóp ég í skífuna fyrst og splæsti í tónlistina úr myndinni.
Það er alveg ótrúlegt hvað þau Joaquin og Reese sýna snilldartakta í myndinni og fá mann til að trúa að þau séu í raun Johnny og June.. vel gert, vel gert.
sit einmitt núna og hlusta til skiptis á lögin hans af American III og svo hann Joaquin syngja lögin úr myndinni, sérstaklega Get rhythm... ég held að ég sé líka búin að finna ákveðinn takt í sálinni minni.. ansi ljúft..

Hef samt líka uppgötvað Rás 1 alveg upp á nýtt og er það eiginlega kennaranum mínum að þakka, honum Hauki. Hann benti okkur á að hlusta á Passíusálmana svona annað slagið á kvöldin og er ég eiginlega búin að hlusta alltaf -svona eftir á. frekar flott að hafa vef upptökur þannig að maður geti kíkt á þetta þó svo maður missi af þessu í útvarpinu...

sit á náttbuxunum í hálf myrkruðu herbergi, ein heima - bíð eftir að gulu skyrturnar hoppi sjálfar úr þvottavélinni og upp á snúrurnar... nenni ekki að labba niður í kjallara og alla leið upp aftur... Framundan er vinnuhelgi - eins gott að ég selji slatta af dóti!

af veikindum

ok,
ég er að skríða saman eftir heiftarlega sólarhringspest sem ég fékk í gærmorgun! Vaknaði við ógurlega verki í maganum og eyddi morgninum á klósettinu þar sem vessar komu ýmist upp eða runnu niður! Eftir að hafa staulast að símanum til að tilkynna veikindi í vinnunni náði ég að drekka vatn og sofna örlítið en vaknaði við það að ég var komin með 38 stiga hita og leið bölvanlega. Hitinn náði hámarki um hálf 9 í gær þegar ég mældist með 39 gráður og var þá jafnvægisskynið í ólagi og ég grenjaði því mér leið svo illa. Ef Guðjón hefði ekki keypt handa mér bláan Powerade þá held ég að ég hefði ekki lifað þetta af..

Í dag líður mér nú aðeins betur, hitinn er farinn en ég er með sjúklegan svima - tengist líklega því að ég hef ekkert borðað í rúman sólarhring.. er núna að pína ofan í mig pasta því það var það eina sem ég átti í augnablikinu..

held ég kíki aðeins á ólympíuleikana í sjónvarpinu og lesi svo meira í bókmenntasögu..

helgarlok

þá er helginni minni lokið og heimsókn Steinunnar systur og Ágústar Óla. Mikið fjör, glens og grín ásamt bleyjuskiptum, frekjuköstum og kókómjólkurdrykkju ;)

Á laugardaginn var ég í stífu prógrammi með litla frænda ásamt Evu systur og Árna á meðan mamma hans var í vinnunni og náðum við að gera eftirfarandi:
-fara í húsdýragarðinn og sjá þegar selirnir fengu að borða
-borða kjötbollur í IKEA og renna okkur óspart í rennibrautinni
-heimsækja Evu og horfa á "skíðakalla" í sjónvarpinu
-kíkja á 112 daginn í Skógarhlíðinni og sjá alla sírenubílana
-gefa öndunum brauð og reyna að forðast gæsirnar gráðugu
-labba upp alla stigana heima hjá mér án þess að þurfa hjálp!
Það er kannski ekkert skrítið að barnið steinsofnaði kl. 7 um kvöldið!!
Sunnudagurinn var öllu rólegri og fór öll dagskrá fram innandyra sökum leiðinlegs veðurs en þá náðum við líka að lita myndir, hoppa í rúminu, binda bönd í húsgögnin og svona ;)
Í dag var svo tekinn smá rólórúntur og andabrauði hent í "litlu endurnar" auk búðaferða í smáralind og IKEA aftur!
Ég verð að viðurkenna að ég sofnaði á sófanum eftir að heimsókn þeirra lauk í dag enda skil ég ekki hvar börn fá alla þessa orku sem þau hafa!!

Í dag á svo Guðjón afmæli og ég ætla að baka betty brownies handa honum eftir smástund.. þegar ég nenni að standa aftur upp....

vona að ykkar helgi hafi verið eins viðburðarrík og skemmtileg og mín!

bíó or bust

ok, svo bío ferð okkar var algjört bust þar sem það var uppselt á myndina! við fórum í staðinn á Ölstofuna þar sem við fengum okkur drykki til að halda upp á ... eitthvað! gott kvöld alla vega og geðveikt nice að sitja þarna því enginn böggar mann þar sem allir þarna inni eru sjúklea self absorbed og vilja ekki tala við aðra!

gott kvöld, skemmtileg helgi framundan þar sem 2 og hálfs árs frændi minn verður aðal stjarnan!

hafið góða skemmtun!

af súkkulaðiköku og tímaskorti

ég sver það, alltaf þegar ég ætla mér að blogga þá er eitthvað vesen hjá blogger.. gat ekki skráð mig inn í gær þrátt fyrir mikla þolinmæði af minni hálfu (fannst mér)
En, í gær kom Lisa í heimsókn í fyrsta bakstur úr súkkulaðibókinni sem hún gaf mér í afmælisgjöf :)Kakan rann mjööög ljúlega og létt niður, sérstaklega í ljósi þess að við drukkum kanadískt te sem ég fékk í gjöf frá Guðrúnu!
Við ræddum heimsmálin, kanadíska kvikmyndahátíð og það hversu lítill tími er í raun fyrir annað en skólann og vinnuna.

Sit einmitt núna í smá 'eyðu' milli skóla og vinnu og ég ætti í raun að vera að lesa, þvo þvott, fara í ræktina, laga til og slappa af á sama tíma en því miður- þó ég geti gert nokkra hluti í einu þá er þetta allt of mikið! Ég ætla samt að njóta þess í kvöld að fara á Walk the Line í Regnboganum með Guðjóni :)Er einmitt að hlusta á eina af perlunum af American III, I see a Darkness.. ljúft

ahhh... enn hvað það er gott að sitja hérna heima í þögninni eftir 2 daga af stanslausum straumi fólks sem vill að maður hjálpi sér.
Í gær var Karókíkvöld Ikjea á Ölver og var ég bílandi :) skemmti mér ansi vel við að fylgjast með misdrukknum starfsmönnum reyna fyrir sér á sviði - vildi að ég hefði tekið með mér myndavél! Ég ákvað að taka ekki þátt í þessu heldur söng bara Hollaback girl í bílnum á leiðinni heim.. miklu betra að syngja bara fyrir sjálfan sig!

Náði að læra ansi mikið og kláraði tvo lítil handavinnuverkefni sem hafa legið ofaní körfu allt of lengi...

Held ég horfi á 24 og slappi rækilega af í kvöld, er að vinna allan daginn á morgun..

tjuuuuuuus

janúar búinn- febrúar hafinn

þá er bara kominn nýr mánuður. Ég biðst forláts á þessu blogg leysi en ég hef varla verið heima hjá mér til að borða og sofa hvað þá blogga!
Undanfarin vika hefur farið að öllu leyti í vinnu, mætingu í skólann og svo fór allur (og þá er ég ekki að ýkja) gærdagurinn í fyrirlestrarvinnu sem skilaði sér svo feitt áðan að það hálfa væri nóg!
Við Þórdís áttum sem sagt frábæran fyrirlestur um Tristram og Ísönd sem var svo ýtarlegur að þegar við spurðum hvort það væru einhverjar spurningar sagði kennarinn:" ég held þið hafið bara farið í allt saman, þurfum engar umræður". snilld.

Er núna að ná andanum og búin að stússast í bankaveseni áður en ég skutlast í vinnuna og svo í heimsókn í Hafnarfjörðinn til hennar Lisu minnar að sjá nýja kettlinginn, hana Peanut :)
Á morgun á ég svo langþráð frí áður en ég dembi mér í helgarvinnu sem teigir sig inn á mánudaginn..

eins gott að maður er skipulagður ;)

24

það er ótrúlegt hvað auglýsingar hafa sterk áhrif á mann. Er búin að sitja undir svaka auglýsingaherferð um nýjustu syrpuna um Jack Bauer og vini hans (með flottustu símhringingu í heimi - dú dú dírúúúúúú) og heillaðist svo mikið að ég er að ná mér í fyrstu 2 í augnablikinu! Vona að þeir standi undir væntingum hreinlega!

Helgin var alveg ágæt, átti dúndurpartý á föstudaginn og þakka öllum þeim sem litu inn!!
er búin að vera að læra restina af helginni og ætla að glápa aðeins á sjónvarpið núna

ég er ógeðslega löt

við að blogga!
Er búin að vera undir miklu álagi þessa vikuna, mikið að gera í vinnunni, skólanum, einkalífinu og ég veit ekki hvað og hvað! Guðjón minn er farinn til Parísar, ansi leiðilegt án hans

Er búin að þurfa að þola verkamenn alla vikuna því það er víst eitthvað að vatnslögninni í næsta húsi. Ekki nóg með að þessi vandræði hafi byrjað í síðustu viku og olli Guðjóni næstum brunasári (þegar þeir gleymdu að láta okkur vita að þeir tóku kalda vatnið af í smá stund) heldur komu í ljós svo miklar skemmdir að þeir eru búnir að grafa meters djúpan skurð niður hálfa götuna mína! drullan og skemmtilegheitin við þetta allt saman eru alveg búin að reyna á þolinmæði mína en sem betur fer á þetta víst að klárast núna fljótlega eftir helgi.. vona bara að það detti enginn köttur eða eitthvað lítið dýr þarna ofaní!

Sit hérna og er að hlusta á disk sem ég var að setja saman, veit ekki hvort þetta er góð eða slæm blanda af partýtónlist.. kannski of mörg lög úr OC þáttunum! hehehe

afmælishelgi

jahá!
Þessi helgi er búin að vera alveg frábær! Ég átti reyndar erfiðan föstudag sem ég eyddi í hálf-lasleika (kannski að aldurinn sé að færast yfir!) en fékk heimsókn um kvöldið sem gerði lífið auðveldara.
Á laugardaginn var ég svo í vinnu til 5 og skellti mér eftir það í bíó með Lisu á Memoirs of a Geisha og VÁ! alveg var þessi mynd ótrúlega flott! Við sátum í algjörri þögn (nema þegar ég var að gera grín að hreimnum hjá fólkinu með því að segja ´okey dokey doktor Jones' eins og litli strákurinn í Indiana Jones, fliss fliss) og létum myndina alveg heilla okkur. Mæli hiklaust með henni. Eftir myndina kíktum við so á kaffihús þar sem við virtumst vera einu stelpurnar! Á öllum hinum borðunum sátu 2 karlmenn saman.. ansi athyglisvert verð ég að segja.. held við höfum dottið niður á "Man Town" í miðri Reykjavík!

Í dag var ég svo að þrykkja út síðustu útsöluvörunum í vinnunni og tók það ansi mikla orku frá mér. Ég ákvað samt að skella mér aftur í bíó, í þetta sinn með Lindu og Bjarka á Brokeback Mountain og aftur VÁ! Þessi mynd á eftir að sitja í mér ansi lengi - er ennþá að velta fyrir mér ótrúlegu landslagi, fallegri tónlist, enn fallegri karlmönnum og sögu sem er epískari en allt sem epískt er! Vona að sem flestir sjái sér fært að sjá þessar tvær myndir því þær eru alveg á klassa stigi!

er núna að kveðja hann Guðjón minn sem heldur til Parísar snemma í fyrramálið til að vera lítill þræll hjá Givency í 2 vikur..

Ég vil byrja á því að þakka kærlega fyrir mig ! Allar kveðjurnar voru frábærar, hvort sem þær komu í formi sms-a, símtala eða sem comment á síðunni - TAKK!
Ég átti alveg frábæran afmælisdag sem náði hápunkti í kvöldmat með mömmu, Evu systur og Árna á American Style. Sjúklega góð nautasteik rann ljúflega niður og bjórinn sem ég fékk frá Ólöfu og Hjalta var alveg það sem ég þurfti til að halda upp á daginn :)
Í dag er ég svo bókuð í nokkur símtöl, köku með Lisu og kaffiboð með Lindu í kvöld...

Um helgina þarf ég að vinna, vinna, vinna en vona að allir hafi það ljúft og gott og ef ykkur leiðist á laugardagskvöldið þá er myndin 28 Days með Söndru Bullock á Rúv -ansi skemmtileg mynd!

knús til allra

afmæli

ég á afmæli eftir hálftíma. 26 ár í pokanum, vonandi eins mörg og helst miklu fleiri eftir ;)
Sit og hlusta á Fistful of Love með Anthony & The Johnsons - annað lag af þessum góða "mix-cd" sem ég fékk að gjöf.. ansi ljúft að hlusta á einhvern jarma tregafull lög..

það er búið að vera svo kalt undanfarið að í dag fannst mér vorið hreinlega verið komið þó aðeins hefði mælirinn rétt skiðið yfir núllið. Hætti mér út í jakka en ekki úlpu, svei mér þá!
Hitti stelpurnar úr þýðingafræðinni á Sólon áðan og áttum við ansi góða stund yfir gómsætum matnum (flestir fengu sér eitthvað með kjúklingi í..hmm :)þar sem við ræddum heimsmálin og litlu málin - ansi gott.
ætla að baka köku þegar Guðjón kemur heim með eggin sem vantar...

ekki slæmt að eiga afmæli :)

sunnudags hugsanir

ég er ekkert búin að vera allt of dugleg í janúar að blogga. held ég sé bara ekki í miklu tjáningarstuði þessa dagana. eða kannski er það vegna þess að ég vil ekki eða má ekki tala um allt í lífi mínu. stundum er leiðinlegt að eiga leyndarmál :)

fékk annars í gær frábæra gjöf - disk með alls konar lögum og meðal þeirra er Blackbird með Bítlunum. þetta lag er einfaldlega snilld, glæst, þétt. alltaf gaman þegar einhver eyðir tíma í að velja handa manni lög sem þeir halda að manni finnist skemmtileg :)

er á leiðinni í verslunarferð upp í úthverfi, aka, Smáralindina, til að finna mér einhverjar spjarir. vona að helgin ykkar hafi verið ánægjuleg og að næsta vika feli í sér skemmtilegheit - mín vika inniheldur a.m.k 3 kaffiboð, 2 afmæli (mitt og pabba), e.t.v. heimsókn frá mömmu minni, skólann og vinnuna...

knús knús knús

Tristam og Ísöld

já krakkar mínir, annar skóladagurinn búinn og þá er ég bara búin í skólanum í þessari viku! flott er!
Fór í bókmenntasögu og málnotkun í morgun og átti ansi erfitt með að vakna klukkan 06:50 en það hafðist eftir smá snooze ;) Fékk úthlutað aukaverkefni í bókmenntasögunni og þarf sem betur fer ekki að halda fyrirlestur ein heldur fæ að vera með henni Þórdísi minni og ætlum við sem sagt að tala um Tristam og Ísöld eða hvernig sem fólk vill skrifa þetta (kennarinn vill hafa það svona :) Það besta við þennan fyrirlestur er að hann er eftir 3 vikur og þá þarf ég ekki að hafa áhyggjur af honum meira. þannig að kannski verður þetta ekki svo erfitt verkefnalega séð en það verður hellings lestur!

Tók annars eftir því að commentin minnkuðu eftir að ég setti inn orða-staðfestinguna þannig að ég tók hana af aftur... ég eyði bara út leiðinlegum spam commentum ef þau koma...

Er að drepa tíminn þar til ég fer á fund og svo bara í vinnuna - alltaf í vinnunni...

dagur 2

byrjaði í ræktinni í gær og fór bæði í gær og í dag.. gerði samning í 12 mánuði þannig að það er eins gott að þetta endist hjá mér!
Hef annars verið einstaklega upptekin undanfarna daga , svo mikið að mér finnst ég hafa hálfpartinn týnt sjálfri mér í leiðinni. Er þreytt, leið og það er einhvern veginn allt svo erfitt í augnablikinu..
kannski þarf ég bara að sofa extra mikið þessa dagana.. það virðast bara ekki vera nógu margar klukkustundir í sólarhringnum til þess!

Skólinn byrjaði í dag - sé fram á mikinn lestur og ansi mikla vinnu út þessa önn.. eins gott að maður er að verða einu árinu eldri til að höndla þetta allt saman ;)

er að sofna

afeitrun

ok, kominn tími á smá línu hérna.
Er komin aftur suður, byrjuð að vinna aftur og skólinn byrjar á mánudaginn. Einhvern veginn er búið að vera miklu meira að gera en ég hélt! Er núna í miðri afeitrun og langar bara að naga eitthvað. Já þessar vökvablöndur eru ekki alveg að gera það fyrir mig en samt er þetta ágætt.. ég er alla vega eiturhress en þarf að pissa svolítið oft!
Annars er voða lítið að frétta, bara éta, sofa, borða og einhvern veginn fyllist dagurinn af þessu...

Er á leiðinni út í rok og rigningu - eins gott að ég á strætókort!

senn á enda förin er

hmm já, svona er þetta þegar maður reynir að vera skáldlegur - það endar allt í hlátursköstum.
Nú fer Akureyrar dvölinni að ljúka í bili og er ég bara nokkuð sátt við fríið mitt í ár. Ég eyddi miklu meiri tíma með fjölskyldunni en áður, fór í bíó en ekki á ball og byrjaði nýja árið með litlu vínglasi en ekki timburmönnum og ælu um morguninn. Eins og Guðjón sagði rétt áðan þá skiptir það máli hvernig maður byrjar árið og ég held ég hafi gert drastíska breytingu í ár með því að byrja það vel!
Ég fer aftur suður á morgun og tekur þá við vika af hálf-aðgerðarleysi þar sem skólinn minn byrjar ekki aftur fyrr en 10 janúar. Verð nú samt að fara í vinnuna og skipuleggja næsta mánuðinn svo ég mun ekki sitja auðum höndum - alla vega ekki allan tímann.
Best að fara og kaupa eyrnatappa fyrir flugið...

pistill 2005

geri hér heiðarlega tilraun til að skella þessu inn
Janúar
Vann hjá Íslandspósti í miklum kulda og trekki, synti annan hvern dag og beið eftir að eiga 25 ára afmæli. Náði þeim merka áfanga, fagnaði og eyddi svo vikunni á eftir í ákveðinni lífskrísu. Merkilegt hvað tímamót hafa áhrif á mann. Náði að setja þjófavarnarkefið í gang hjá Erotica shop á Barónsstígnum og fékk það að óma um hverfið í nær klukkustund því Láru brá svo að hún skellti í lás á eftir sér. Klassa leikur.
Febrúar
Nokkuð viðburðalítill mánuður – nokkur partý, meiri snjór og vont veður í póstinum og svo kom þoka dauðans. Reykjavík lá í heljargreipum mestu þoku síðan á landnámsöld og var ekki laust við að ákveðinn hræðsla og manía gripi borgarbúa. Flestir vildu burt en eftir nokkra daga sáum við lengra en 10 metra og borgin róaðist á ný.
Mars
Grái fákurinn hans Guðjóns hlaut hrikalegan dauðdaga þegar ökuþór brunaði á honum niður Hverfisgötuna og skellti honum upp á tvo staura svo hann brann til kaldra kola. Eini ljósi punkturinn við þetta var myndefnið sem Bjössi náði og varð að jólagjöf ársins í ár. Námið hélt áfram og vinnuhóparnir hrönnuðust upp. Kynnti mér þætti sem heita League of Gentlemen og elska þá enn í dag; Páskarnir færðu mér för heim til Akureyrar með tilheyrandi súkkulaðiáti..mmm.

Apríl
Vorið hélt innreið sína í Reykjavík með tilheyrandi sól á lofti og rigningarsudda. Páfinn og Rainier fursti ákváðu að hanga ekki lengur á þessari jörð og var því mikið um grand jarðarfarir og læti í kringum nýjan páfa. Man bara eftir einhverri svaka útsendingu í sjónvarpinu.Ég fór á Þjóðminjasafnið í fyrsta sinn á ævinni og var mjög hrifin – hefði samt viljað sjá gamla safnið til að bera saman; hætti vinnu hjá Íslandspósti og tók upp gamla hvíta sloppinn og skundaði í apótekið á ný.
Maí
Í þessum mánuði flakkaði ég á milli Reykjavíkur og Akureyrar þar sem ég tók upp verbúðalíf í 6 vikur. Kláraði fyrsta ár mitt í þýðingafræðinni þrátt fyrir fall í setningafræði, tsk tsk. Brunaði norður í land og tók upp vinnu og lestur bóka, sótti fjölskyldugrill í hagléli og horfði á Ísland ekki vinna Eurivision eina ferðina enn.
Júní
Fagnaði 5 ára stúdentsafmæli í góðra manna hópi, drakk of mikið en þó ekki eins mikið og sumir og uppskar eftir því. Tómatsósu flögur héldu innreið sína á Íslandi og náði ég að sannfæra að minnsta kosti eina manneskju um ágæti þeirra. Flutti aftur til Reykjavíkur og skellti upp Adjessellinu heima hjá mér með aðstoð Guðjóns – netvæðingin var hafin.

Júlí
Mánuður ræktarinnar. Skráði mig í gymmið og var staðföst og brött fyrstu vikurnar - datt svo í sama kæruleysið og alltaf en náði þó af mér einhverju. Fór í fyrstu Esju gönguna mína ásamt Maríu sem reyndist síðar verða Esju buddy-inn minn :) Harry Potter kom og fór með gleði blandaðri sorg – það er bara ein bók eftir. Fór í Nauthólsvíkina í fyrsta sinn og Eva Stína vinkona eignaðist hann Óskar Smára litla gaur. Eyddi versló í Reykjavík og varð ekki meint af.
Ágúst
Hóf vinnu hjá Ikjea sem sölumaður og stend mína plikt í gulri skyrtu. Sá Gay pride í fyrsta sinn með berum augum; fór á Árbæjarsafnið í fyrsta sinn; komst að því að brjóstin á mér heita Elvis – bæði ;) fann ást mína á frímerkjum. Helstu tíðindin voru þau að ég fékk nýtt klósett og blöndunartæki og nýjan/gamlan ísskáp eftir að hinn gaf sig. Nýji/gamli ísskápurinn gaf sig svo síðar á árinu (sjá neðar) Adjessellið hélt áfram að gefa af sér og nú kom kristaltært sjónvarp inn á heimilið með tilheyrandi fagnaðarlátum.
September
Skólinn byrjaði aftur og eftir mikla erfiðleika við að finna fög við hæfi endaði ég í Hollywood söngleikjum og Bókmenntafræði. Var þetta án efa besta ákvörðun ársins þar sem ég endurnýjaði kynnin við Lisu mína og höfum við haft það ansi gott síðan ;) Þvottavélin mín ákvað að elta hin rafmagnstækin á heimilinu og bila. Eftir mikið drama og allt og mikinn pening komst hún í lag og malar nú ánægð í kjallaranum. Planaði bæði heimför og utanför – Akureyri og London yrðu á dagskrá í október.
Október
Skundaði til Akureyrar, flutti systur mína í nýtt hús, tjúttaði og skellti mér svo til London með litlu systur minni. Maturinn á Fifteen var ómetanlegur, og verslunin í London tók stóran kipp - komum við heim á ferðatöskum sem voru að springa á saumunum. Kvennafrídagurinn var stórmerkilegur í mínum augum og arkaði ég með systur minni, Maríu Erlu og Ingibjörgu þar til innilokunarkenndin í mannþrönginni gerði vart við sig. Hrekkjavökupartý var stuð og fórum við Lisa sem Sexy sixties chicks.
Nóvember
Vinnuálag skólans fór að segja til sín og vinnuálag Ikjea einnig – fólk var byrjað að hamstra jólaskraut. Matarboð í anda þakkargjörðarhátíðar Kanadabúa/Bandaríkjamanna var haldið við mikla lukku og gleði og heppnaðist svo vel að ég mun elda áramóta kalkúninn hér heima. Enskupartý hjá Maríu vakti upp gamlar og góðar minningar og sá maður hverjir vilja í raun halda sambandi. Endaði mánuðinn á bestu tónleikum lífs míns (hingað til) í Laugardalshöllinni hjá Sigur Rós..
Desember
Skreytti íbúðina með dóti – keypti jólagjafir í tíma en gleymdi nokkrum jólakortum. Fór heim í laufabrauð, tjúttaði með Ikjea fólkinu á Sólon; uppgötvaði að líf mitt væri nú á öðru skeiði, eða part two; átti frábæran stelpudag með stúlkunum úr Ikjea sem endaði með heljarinnar Pina Colada veislu og setningunum ódauðlegu ‘ég er ekki lesbía’ og ‘ég er á sneplunum’. You had to be there.
Sit svo núna, á síðasta degi ársins og sem þennan lista sem er orðinn allt of langur en er þó árið mitt svona nokkur veginn í stuttu máli ;)
Ég vona að þið hafið það öll gott í dag og kvöld og munið að skjóta upp rakettum/ragettum/fljúgeldum/flugeldum/bombum/kökum/blysum þar til himininn er orðinn svo grár að ekkert sést lengur.

þriðji í jólamatsáti

já, bara annar í jólum mættur og ekkert lát á áti!
Ég er búin að eiga alveg frábær jól, mikið að gera og ansi margir pakkar að opna þegar einn 2ja ára gutti er með manni!
Ég fékk gönguskó frá foreldrum mínum og get því þrammað sómasamlega upp á fjöll með Maríu Erlu framvegis ;)
ég fékk líka handklæði og bók og föt frá systrum minum og Ágústi Óla; fallegan leirdisk frá Lisu; The Nightmare before Christmas á DVD frá Guðjóni og svo ofsalega fallega ljósaseríu frá mömmu og pabba líka. Góð jól, allt í allt :)
Eyddi síðan deginum í gær í algjörri afslöppun og fjölskyldu jólaboð sem í ár var haldið heima hjá mér. Át og át og held ég þurfi að fara í saltlosun eftir jolin - pissa þessu öllu út úr mér!

í dag er ég svo að leika mér og lesa bækur- held ég kíki aðeins í kökudallinn og bæti smá í átsafn dagsins í dag

hafið það gott!

messa Þorláks

jæja, er að tygja mig af stað út á flugvöll - muna að henda mjólkinni (check) og slökkva á seríunum (check) og ekki gleyma neinu!

Jólakortin mín lentu svona fyrir ofan garð og neðan í ár en þeir sem ekki fengu kort geta huggað sig við það að ég hugsaði alveg rooooooosalega mikið til þeirra;)

hafið þið það gott um jólin, verið góð við hvort annað og vonandi sjáumst við sem fyrst!

Jólin öll sömul!!!!

jólalífið byrjar

já nú er ég loksins búin að skila af mér ritgerðinni, búin að ná í jólapakkann frá IKEA, búin að ná í jólagjöfina hans Guðjón og lítið annað eftir en að skella jólakortunum í póst og þrífa aðeins betur íbúðina!
jólaandinn svífur yfir vötnum og afslöppun er ekki langt undan!
fyrir þá sem vilja hitta mig eitthvað fyrir reisuna norður þá er ég að vinna á morgun milli 16-22 og á þorláksmessu milli 10-15.
vona að þið hafið það öll sem best í dag,
ég ætla að kíkja aðeins betur á nammið í jólakörfunni... mmmmm

síðustu metrarnir

ég er að klára... ég er alveg að verða búin með ritgerðina... yeeeeeeesss.. skila henni inn á hádegi á morgun og hugsa ekki um hana meir! þá eru jólin að koma.. 3 dögum áður en þau bresta á :)

sit og klára að skrifa og fara yfir suma kaflana - lagfæringar hér og þar og er að þvo þvott í leiðinni.. nenni ekki að byrja nýja árið á að taka til hérna þannig að best að klára þetta í leiðinni, áður en maður fer heim í jólasteikina og svona..

hef þetta stutt í dag, all is well..

erfiðara en ég hélt

þessi listi er alveg að fara með mig! er nú reyndar búin að svara öllum hingað til en það var hreinlega ekki eins auðvelt og ég hélt! en svona er þetta.. á maður einmitt ekki að hrista aðeins upp í sálinni og minninu annað slagið og hætta að taka fólk og hluti sem sjálfgefna eða sjáfsagða? jú ég held það.

Fór á laugardaginn í stelpuferð með Salóme, Ólöfu og Steinunni sem byrjaði kl. 10 um morguninn heima hjá Ólöfu. Það var ennþá dimmt úti og við vorum allar sjúklega þreyttar. Eftir spjall og slúður löbbuðum við svo upp laugarveginn og heim til foreldra Ólafar til að ná í jeppann sem beið okkar þar. Brunuðum við svo í Bláa Lónið og vá vá vá! Ég var bláa lóns 'virgin', hafði sem sagt aldrei komið þarna og fílaði mig í tætlur! Við vorum ofaní í einn og hálfan tíma og fórum í gufu, skelltum á okkur leir, fórum í fossinn og löbbuðum/syntum um allt lónið.. snilld.
Þegar rúsínuputtarnir voru orðnir hrikalegir ákváðum við að skella okkur í mat í Grindavík og enduðum á lítilli krá sem heitir Lukku Láki og fengum við okkur geðveika hamborgara. Þessi staður var líka tær snilld - tónlistin alveg á fullu og körfuboltaleikur í sjónvarpinu. Við vorum einu gestirnir og fengum því mjög góða þjónustu.
Nú ég þurfti að fara í vinnuna þannig að við brunuðum aftur í bæinn þar sem ég eyddi fjórum klukkutímum í að afgreiða allt of fáa :) Svo hittumst við aftur hjá Ólöfu um 11 leytið og blönduðum Pina Coladas og enduðum á Celtic um 2 leytið um nóttina.. stuð stuð stuð og meira stuð langt fram á nótt en allt endaði vel og allir komust heilir á höldnu heim :)

Í gær skrifaði ég svo meira í ritgerðinni minni, bakaði smá súkkulaðibitakökur og fór í vinnuna þar sem var brjálað að gera nánast allan tímann!
Í dag er ég svo í fríi og er að klára ritgerðina mína þannig að ég ætti kannski að hætta að bulla hérna.. En ég þarf reyndar að svara tveimur spurningum:
ég er 1.64 á hæð (samkvæmt vegabréfinu mínu - hef ekki mælt mig í mörg ár)

ég held að fótfestan mín sé blanda af nokkrum hlutum, þannig að ef að einn þeirra klikkar þá er alltaf eitthvað annað sem tekur af manni fallið. Til dæmis reyni ég að trúa á sjálfa mig og þykja vænt um sjálfa mig. Ef að það bregst (svona eins og getur gerst) þá trúi ég því að það sé alltaf í það minnsta ein manneskja sem trúir á mann eða þyki vænt um mann. Það er ekkert endilega sama manneskjan gegnum alla okkar ævi en það er alltaf einhver.. þannig að allir eru elskaðir af einhverjum og það er alltaf einhver sem trúir á mann.. þannig að það er allt í lagi ef manni skrikar aðeins fótur - það er alltaf einhver sem hjálpar manni.

vona að þetta svari einhverju :)

le list

þessi listi er bæði hjá Ingibjörgu og Maríu Erlu og verð ég því að setja hann inn hjá mér.. ég lofa ekki hröðum svörum en svara þó..
setjið nafnið ykkar í comments ef þið viljið að:

1. Ég segi þér eitthvað handahófskennt um þig.
2. Ég segi þér hvaða lag/mynd minnir mig á þig.
3. Ég segi þér hvaða bragð minnir mig á þig.
4. Ég segi þér eitthvað sem meikar bara sens fyrir mig og þig.
5. Ég segi þér fyrstu ljósu minninguna mína af þér.
6. Ég segi þér á hvaða dýr þú minnir mig á.
7. Ég spyr þig að einhverju sem ég hef lengi velt fyrir mér um þig.
8. Ef þú lest þetta þá verðurðu að setja þetta á bloggið þitt

úff, þetta verður spennandi held ég bara :)

hlaupatjakkur

það er alltaf jafngaman að finna eitthvað nýtt til að dunda sér við.. Í vinnunni þarf maður stundum að fara með rusl já eða gallaðar vörur inn á lager og notast maður þá oft við tjakk, svona til að færa bretti til og frá. Nú hvað er skemmtilegt við það að draga svona dót á eftir sér þegar maður getur notað þaðsem hlaupahjól og brunað um ganga lagersins á fullu spani!! Hlaupatjakkurinn er orðinn mjög vinsæll og eru stundum slagsmál yfir því hver fær að fara með ruslið.. snilld.

bakaði piparkökur í gær.. nú á bara eftir að skreyta þær með glassúr og perlusykri.. þarf reyndar að kaupa meiri flórsykur til að græja þetta en það reddast..

komst líka að því í gær að það vinnur strákur á lagernum sem er frá Akureyri og er ári yngri en ég.. hef aldrei séð hann heima og trúði honum eiginlega ekki alveg..fyndið hvað maður telur sit þekkja alla í sínum árgangi og árgangnum fyrir neðan en nei... svo er ekki :)

jæja... söngleikjaritgerðin mín kallar - just a spoonful of sugar helps the medicine go down! (gott að syngja þetta þegar ég tek lýsið á morgnanna.. yum yum)

jólastemning

já krakkar,
búin í prófinu, búin að kaupa jólatré, búin að skreyta og þrífa eldhúsið og á bara eftir að baka piparkökurnar og súkkulaðibitakökurnar á morgun.. snilld.
á eftir að klára ritgerðina en ég ákvað að í dag skyldi ég bara gera eitthvað sem ég vildi gera - fyrir utan að læra! mjög mikil framtakssemi í gangi og verður húsið bráðum hreint, hreint, hreint!

er að fara að hitta Lisu í kaffi eða eitthvað skemmtilegt og svo fer ég í vinnuna eftir það.. alltaf eitthvað að gera!

vona að þið séuð komin í jólastuð - ekki seinna vænna!!!

jólaþreyta, jólaskraut, jólapróf

já.. ég er sem sagt ekki búin að blogga neitt vegna óvenjumikillar vinnu síðan á fimmtudaginn. Er búin að vera föst í vinnunni nánast síðan þá og er loksins í fríi í dag til að læra undir prófið mitt á morgun.. verum nú með krosslagða putta og von í hjarta!
Eignaðist helling af nýjum vinum í vinnunni samt, fyndið hvað maður er fljótur að kynnst fólki ef maður er hress sem fress.

Annars er lítið að frétta, verð að standa mig í prófinu á morgun og verð að klára söngleikjaritgerðina mína.. þá koma jólin

annað líf

fyndið hvað það kemur alltaf betur og betur í ljós hvað maður á margt sameiginlegt með vinum sínum. Ég var að tala við vinkonu mína í gær um allt og ekkert og þá fer hún allt í einu að segja mér hvað henni finnst hún vera að upplifa annað lífið sitt, þ.e. að síðastliðið ár hafi hún fundið fyrir því að hún sé í raun að byrja upp á nýtt en samt með allt hitt í grunninn.
Alveg skyldi ég nákvæmlega hvað hún var að fara! Mér finnst einmitt eins og ég hafi byrjað líf númer 2 eða Lára: part two þegar ég flutti aftur suður fyrir rúmu ári. ÉG veit ekki af hverju það er endilega núna sem ég er að byrja annan kaflann.. kannski tengist það 25 ára afmælinu.. kannski því að ég var búin að búa úti og svo heima á akureyri og ná nokkurri sátt við sjálfa mig. Alla vega, þá er líf númer 2 í fullum gangi og ekkert betra en að vera til!

Ég bakaði einmitt smákökur í gær, Bounty toppa.. mmmmm kókosmjölið flæddi um bekkinn hjá mér og ofninn malaði alveg á fullu á meðan ég setti alla jóladiskana mína í spilarann og stillti í botn.. alltaf gaman að fá smá jólastemming í húsið..
vona bara að nágrannarnir hafi verið sama sinnis!
Í dag er ég svo að læra og þarf að vinna seinna... vissuð þið að IKEA er nú opið til kl. 22:00 öll kvöld fram að jólum?? veivei! ;)

potterinn, afmæli og fleira

já ég fór í bíó á HP í gær og skemmti mér bara alveg ágætlega.. Auðvitað saknar maður alltaf vissra smáatriða þegar maður hefur þaullesið bækurnar nokkrum sinnum en hey, það er ekki hægt að skella öllu með í myndirnar :) fór í sex bíó og svei mér þá ef krakkar í dag eru bara ekki vel upp alin, þau þögðu í það minnsta alla myndina.. flott flott

í gær átti hann Jeramy minn afmæli og ég rétt mundi eftir að senda honum afmælis e-mail áður en ég rotaðist yfir sjónvarpinu.. merkilegt hvað loftið á akureyri getur gert mann syfjaðan. Ég fór sko að gefa öndunum brauð með Ágústi Óla og svo enduðum við á sprelli í garðinum þar sem snjórinn gerði nær út af við barnið, gat varla labbað og svo datt hann alltaf af snjóþotunni!

í dag ætlaði ég svo að vera dugleg og læra en hef eytt meirihlutanum í að spila tölvuleiki og éta smákökur.. kem aftur suður á morgun og verð þar fram að þorláksmessu... tjus for now

laufabrauð = leafbread = lembas bread?

það er alltaf jafngott að komast heim í smá afslöppun, gleyma símanum svo klukkustundum skiptir og hafa það bara býsna notalegt.
Vorum að enda við laufabrauðsskurð og er afraksturinn 220 kökur, skornar, steiktar og í stöflum takk fyrir! Fyndið hvað maður missir hugmyndaflugið eftir svona 10 kökur - þarf að kíkja á hvað hinir eru að gera til að starta því upp á ný.

í nótt snjóaði svo mikið að mér fannst ég vera stödd í White Christmas.. vantaði bara Lisu til að syngja "Sisters" lagið fyrir mig ;) hef nú samt ekki hætt mér út fyrir dyr - langar ekki að blotna í fæturna.

annars fór ég einmitt að pæla í laufabrauðinu, og ákvað að það væri lembas brauðið í LOTR.. maður getur borðað pínulítið af því og orðið frekar saddur.. ó já..

er að fara að dansa með litla frænda mínum við jólalög...

homeward bound

er að fara út á völl, farin til akureyrar í nokkra daga... c yas

23 dagar til jóla

vá.
Fyndið hvað maður leggst stundum í svona lægðir á blogginu.. hef varla nennt að skrifa neitt hérna undanfarið, bara rétt til að segja að maður sé á lífi.. en svona er þetta.. ég held að skammdegið sé farið að segja til sín..er núna búin að vera vakandi í 2 klst og fyrst núna er orðið bjart úti!

Mamma og pabbi komu frá skotlandi á þriðjudaginn og gáfu mér bounty (fyrir smákökurnar, ó já) og Jamie Oliver's Christmas þar sem hann eldar frábæran kalkún og meðlæti,a la England. Mjöööög girnilegt og held ég að eldamennskan um áramótin fái að njóta góðst af þessu! Ég fékk líka óvænta jólagjöf frá afa mínum, en hann ákvað að styrkja okkur systur í námsfátæktinni :)

Í dag er svo fyrsti desember, jólaskrautið upp og jólalögin í botn gott fólk! Fer í vinnuna á eftir og ætla að njóta þess að geta sungið með lögunum því ég er í rólegu deildinni í kvöld og hef ekkert betra að gera en humma "svon' eru jóóóóóólin"

'Við vorum orðin svo stressuð yfir að koma hingað'

þetta sagði Jónsi í Sigur Rós rétt áður en tónleikunum lauk í höllinni í gær.. öö þau hefðu alveg getað sparað sér þetta stress því þetta var ÓTRÚLEGT!!!!! Ég er samt ekkert smá fegin að ég var í stúku en ekki í maurahafinu á gólfinu eins og allir 'litlu krakkarnir'.
Sviðsframkoman, öll umgjörðin í kringum tónleikana, ljósin, myndbrotin sem er varpað á tjaldið bakvið þá - allt saman small eins og flís við rass og maður fór í gegnum allan tilfinningaskalann bara. Ég held ég hafi verið með gæsahúð meirihlutann af þeim 2 og hálfum tíma sem þeir voru á sviðinu og geri aðrir gott betur!

öll, öll, öll uppáhaldslögin mín fengu að hljóma um salinn -
er hægt að biðja um eitthvað betra?

glæst endurkoma

þvílíkur snillingur sem Snjólaug Bragadóttir er!
Fyrir ykkur sem kannist ekki við nafnið, eða kannist við það en munið ekki hvaðan þá er hún snilldar rithöfundur sem átti sína gósentíð á íslenska bókamarkaðinum seint á 8. áratugnum og snemma á þeim 9. Í íslenskuáfanga í MA gerði ég heimasíðu um hana sem var enn virkur þar til fyrir örfáum mánuðum. Í dag vinnur hún sem þýðandi hjá 365 miðlum og þýðir meðal annars Nágranna, Opruh og einhverja glitz þætti á Sirkus.En nú er hún búin að toppa allt saman!
Snjólaug Braga er að endurþýða Ísfólkið!!!!
Alveg áttti ísfólkið hug minn allan á tímabili, líklega 14-15 ára og held ég að allar vinkonur mínar á þessum tíma hafi lesið ísfólkið alla vega einu sinni ef ekki oftar! Það truflaði mig alltaf rosalega hvað þær voru einmitt illa þýddar, hálfkák og stafsetningavillur í hrönnum alveg en vá vá vá!
Sjaldan eða aldrei hef ég verið jafnánægð með eina manneskju eins og hana í dag!

Til lukku Snjólaug og til lukku allir nýjir ísfólkslesendur á íslandi í dag... hehehehehehe

símaleysi

ég gleymdi símanum mínum heima í morgun, verð ekki í símasambandi fyrr en um 6 leytið í kveld...

Andlaus andi

ég held ég sofi of mikið. Fer snemma að sofa (fyrir miðnætti) en næ yfirleitt aldrei að drulla mér á lappir á skynsamlegum tíma.. kannski ég verði að endurskoða gardínurnar mínar - sleppa dimmunni í bili ;)

Ég er annars alveg að truflast á þessari bókmenntaritgerð.. nenni ekki að vera svona lengi að þessu en þetta er að mjakast.. mjaaaaaaakast og sé ég framá að geta kannski klárað hana í dag.. en þegar ég meina klára þá meina ég "best að láta hana liggja í nokkra daga og laga hana svo.. helling" þannig að þetta er ekkert að klárast ..

eftir 12 daga fer ég heim í laufabrauð - það er 'gulrótin' mín.. klára allt fyrir þann tíma... *andvarp*

fræðimennska

ég er búin að komast að því að ég á ofsalega erfitt með að tjá mig fræðilega á íslensku. Að sjálfsögðu kenni ég enskunáminu um og því að ég bjó úti í 1 ár en come on! Er þetta ekki móðurmálið? á maður ekki að hafa þetta í genunum líka? úff bara púff!
ritgerðin mín gengur sem sagt hægt - ekki vegna þess að ég sé ekki með nóg af efni heldur vegna þess að ég er stanslaust að gagnrýna sjálfa mig ef ég næ að aula einhverju út úr mér. Held ég verði bara að sparka vel í rassinn og drífa þetta af! Beinagrindin er sjúklega flott og held að ef ég næ að fylla almennilega inní hana þá verði þessi bókmenntagreining bara ansi góð.. en eins og ég segi, tjáningin lætur standa á sér.

Er að fara í kanadíska sendiráðið á föstudaginn með hóp enskunema. hlakka geðveikt til að sjá þarna inn því þetta sendiráð var tekið í notkun árið eftir að ég var úti.. maður nær kannski að slá um sig með orðum eins og Touque, tobogganing og spjalla um Tim Horton's kaffi og Cesar's drykki, að ógleymdum Chrétien sem var mest hataði forsætisráðherra Kanada í mörg ár...

er í fríi í vinnunni um helgina og verð að sitja við skriftir meirihlutann af henni.. ætla þó að bregða mér á tískusýningu með Guðjóni og flissa með honum allan tímann..

tjus tjus frá þreyttri píu í þingholtunum

mánudagar eru bara erfiðir

enn ein vikan að byrja og nú styttist óðum í ritgerðaskil og hefur púlsinn minn hækkar í samræmi við það. Ég veit að þetta hefst allt saman á endanum en það er bara erfitt að sjá það fyrir sér núna.. get eiginlega bara tekið einn dag fyrir í einu.. höndla ekki langtímaplön í augnablikinu.

Eftir veikindi gærdagsins (og nei, þau tengdust ekki enskupartýinu á laugardaginn) reis ég upp eins og fönix úr ösku og mætti í tíma í morgun kl. 8:15, tilbúin með heita vatnið fyrir Tetley's teið mitt... mm.. Lisa kom með tepokana og Hulda kom með mjólk þannig að það reddaði eiginlega morgninum.

er að reyna að vinna í ritgerðunum mínum samhliða.. gengur ágætlega en held að þessi vika muni hafa mest með það að segja hvort þær séu allt í lagi, eða góðar.. vera dugleg, vera dugleg.

'Jólaskrautið er inni á lagersvæðinu'

Þessi setning er orðin besti vinur minn eftir vinnudaginn í dag.
það var heitt og leiðinlegt í vinnunni í dag - allt of margir erfiðir viðskiptavinir sem tóku allt mikinn tíma af lífi mínu.. mun reyna að gleyma þeim öllum í kvöld.

Sá annars í hádeginu blaðið Sirkus RVK og vá hvað þetta blað hefur alveg hrunið í gæðum. Komst svo að því að síðan Mikki Torfa tók við ritstjórninni hefur það færst nánast í sama horf og hann kom DV í á sínum tíma.. frábært. Ákvað í staðinn fyrir að drepa í mér heilasellur með lestri á þessu riti að kaupa mér jólagardínur í eldhúsið.. vei vei! það verður jólalegt hérna strax fyrsta í aðventu sem myndi vera 27. nóvember. get varla beðið...

sit heima og er að græja mig fyrir enskupartý hjá Maríu Erlu og hlakka geðveikt til! Hef ekki séð suma í langan tíma, aðra sé ég nánast daglega ;) verður forvitnilegt að sjá hvernig spilast úr kvöldinu :D

að spíta í lófana

já það er sko kominn tími til. Var að staðfesta flug heim til Akureyrar fyrstu helgina í desember til að komast í laufabrauð með fjölskyldunni. Sá að ég á að skila ritgerðunum mínum 2 dögum fyrr þannig að þessi ferð verður smá afslöppun áður en ég þarf að læra undir bókmenntafræðiprófið mitt 14. des :)

annars held ég að ég sé undir áhrifum af myrkrinu. Ég vakna á hverjum morgni allt of seint og sé að ég hef í móki slökkt á vekjaranum.. verð að laga þetta. Vaknaði rétt áðan við símhringingu frá mömmu, sem betur fer því ég á eftir að lesa eina grein áður en ég fer í skólann.

sé fram á erfiðar 3 vikur en þá verður maður bara að brosa, drekka kaffi og vona það besta!

að borða yfir sig

ég get varla hreyft mig. augnlokin síga stanslaust niður og viðbragðshraðinn er í sögulegu lágmarki. ég var að borða kalkún :)

Matarboðið gekk eins og í sögu, kalkúnninn var fallega brúnn og safaríkur og allt meðlætið frábært.. graskersbakan rann svo ljúflega niður að ég táraðist næstum því. fullkomið. ég dauðvorkenni Ingu, Einari og Hólmari að hafa þurft að setjast upp í bíl eftir þessa stórmáltíð því við vildum öll bara leggja okkur! ég get varla bloggað meira í bili.. nenni ekki né get vaskað upp.. legg bara draslið í bleyti og bíð fram á morgun...

frábær endir á góðri helgi :D

að færa þakkir

á morgun held ég smá matarboð fyrir vinahóp minn að norðan. ég og guðjón vorum búin að ákveða þetta fyrir ári síðan en sökum anna og peningaleysis þurftum við að fresta því sí og æ þar til að nú spörkuðum við í rassinn á hvort öðru og skelltum okkur á kalkún. já, við erum sem sagt að fara að elda þakkargjörðarmáltíð á morgun og er þetta svo tímafrekt að matseldin byrjaði í dag!
Eftir martraðaferð í hagkaup í kringlunni byrjaði ég að vippa í eina graskersböku (sem tók by the way langan tíma) og eftir að hún var í höfn þurfti ég að byrja á trönuberjasósunni sem breyttist síðan í trönuberjasultu.. því ég á ekki matvinnsluvél ;) nú er ég sveitt að undirbúa mig fyrir fertugsafmæli Berglindar (til hamingju!!) sem verður veisla aldarinnar ef marka má sögusagnir!

en boðskapur hátíðarinnar er að færa þakkir. ég er mjög þakklát fyrir þessa vini mína sem eru að koma á morgun og ég er þakklát fyrir að þrátt fyrir að langt líði á milli símtala stundum þá er alltaf auðvelt að finna þráðinn aftur þegar það loks gerist.

aðrar þakkir mínar fara meira með hugboðum og rata vonandi á rétta aðila; þakkir fyrir vináttu; þakkir fyrir að kynnast fólki aftur - og jafnvel á alveg nýjann hátt; þakkir fyrir meiri tíma; þakkir fyrir fjölskylduna; þakkir fyrir lífið...

bilun

held ég sé eitthvað klikkuð. verð alla vega fyrir allt of miklum áhrifum af sjónvarpinu!
Sat áðan og var að horfa á King of Queens með öðru auganu.. sá að þau réðu svona húshjálp sem átti að þrífa og þvo þvott og svona.. hjálpa til sem sagt. áður en ég vissi af var ég staðin upp og farin hálf inn í eldhússkápinn minn til að finna jólaköku dúnkana mína. af hverju, heyri ég ykkur spyrja. jú, af því að húshjálpin hafði þrifið kökukrúsina þeirra og sett Oreo kexið hans Doug ofan í hana. oooooookeeyyy.... klukkutíma og mjöööög hreinu eldhúsi seinna fattaði ég að eitt leiddi af öðru og ég var farin að skrúbba skápana, eldavélina og bökunarofninn...

held ég verði að róa mig aðeins.. leggja frá mér tuskuna...

nóvember

nú fer pressan virkilega að leggjast á mann eins og mara. Þarf að skila ritgerðum í lok mánaðarins og undirbúa þetta eina próf sem ég ferí 14. desember ásamt því að vinna eins mikið og hægt er til að safna smá aukapening! Það er eins og árstíðaskiptin séu loksins skollin á, veturinn er alveg pottþétt tekinn við af haustinu og sannast það á vetrarhríðinni sem skall á okkur á föstudaginn. Oftast fylgir svona nett lægð með aukinni dimmu, auknu verkefnaálagi og þreytu vegna of mikillar vinnu en í ár ætla ég að reyna að bægja þessu frá mér.
Held að það sé betra að sjá fallegu hliðina á þessum hlutum frekar en sorglegu. Af hverju ekki að hlusta á tónlist sem er svo falleg að stundum verður hún sorgleg? eða verður hún kannski ekkert sorgleg heldur vekur hún það í manni á hverjum tíma sem er manni efst í huga? hef mikið pælt í þessu undanfarið...

er að reyna að skrifa söngleikjaritgerðina mína - það gengur, það gengur..

löng helgi

já þetta var ansi löng og þreytandi helgi þannig að ég sleppti öllu bloggi sökum andleysi og þreytu o.s.frv.En nú er kominn mánudagur þannig að ég get skrifað um allt sem gerðist (eða ekki) um helgina, jei!

Hæst ber að sjálfsögðu Hrekkjavökupartý enskudeildarinnar á föstudagskvöldið. Hverjum datt í hug að hafa fyrsta vetrarveðrið akkúrat á þessum tíma? Ég og Lisa fórum sem sexy sixties chicks og ákváðum að gera okkur klárar heima hjá Lisu í Hafnarfirði (eins nálægt Álverinu í Straumsvík og þú kemst!) og það tók okkur bara klukkutíma að keyra þangað út af veðrinu! keyrðum fram hjá tveimur árekstrum (einn bíll valt á hliðina og einn fór upp á umferðareyju og var fastur í girðingunni) þannig að við keyrðum extra varlega! Eins og sjá má á myndasíðunni minni var stuð að setja á sig augnmálingu dauðans (augun á mér eru ennþá að jafna sig) og græja hárið var ekkert mál fyrir mig en aðeins meira mál hjá Lisu þar sem hárið hennar neitar að vera öðruvísi en slétt! Eftir klukkutíma akstur aftur niður í bæ var tjúttað til miðnættis en þá þurftum við að fara heim. Geðeikt kvöld með flottum búningum og skemmtilegum magadansi líka!

Laugardagurinn byrjaði svo ansi illa, var svo þreytt eftir partýið að ég sofnaði næstum því í strætó á leiðinni í vinnuna. Ég tók að mér að fylla á smávöruna áður en búðin opnaði og var því samtals í 18 klukkutíma í gímaldinu bláa og gula.. aðeins og mikið IKEA á einni helgi. Náði nú einhvern veginn að lifa daginn af á 4 klst. af svefni en lognaðist svo út af yfir miðri Royal Tenenbaums ... æ æ .. Gærdagurinn var nokkurn veginn eins, vinna, heim, borða, sofa. Og þess vegna var ég ekkert búin að blogga því í fyrsta lagi var ég þreytt og í öðru lagi var í raun lítið að blogga um!

Er reyndar búin að vera að kíkja á framboð bíómynda á Skjánum (adsl sjónvarpið mitt) og sá að ég get horft á Goonies fyrir 250 kall!! (hehe Íris, good times :)held maður verði nú samt að passa sig - ekki missa sig í myndirnar bara því manni leiðist!

það er eitthvað í gangi í bakgarðinum okkar. síðustu daga hefur ómur loftbors hljómað um hverfið og nú er þannig komið að við finnum fyrir hristingnum þegar þeir eru að brjóta upp bergið hérna niðri.. held þeir séu samt í pásu núna.. það er ótrúleg þögn í augnablikinu...

Hrekkjavaka

Eftir ótrúlega langan vinnudag í gær er ég loksins vöknuð og nokkurn veginn komin á fætur.. Stóð í barnadeildinni í gær og það var hreint ekki eins slæmt og maður var búin að heyra.. reyndar er víst mest að gera um helgar en börnin voru alveg hreint krúttleg.
Í dag er svo bíó í skólanum kl 11 og svo halloween partý hjá enskudeildinni á laugarveginum.. ef þið sjáið skrýtið fólk á vappi nálægt hlemmi þá eru það sem sagt enskunemar...

horfi út um gluggann og það er snjókoma og fok og leiðindi.. held ég taki strætó í skólann í dag

ritgerðir

ok,
er sem sagt komin niður úr gleðivímunni frá því á mánudaginn og komin aftur á jörðina :)Helst í fréttum er að ég er búin að fá samþykki fyrir ritgerðarefninu mínu í Hollywood Söngleikjum, hvernig stéttarskipting birtist í nokkrum vel völdum söngleikjum (jei!) þannig að nú á ég bara eftir að fá samþykkt efnið í bókmenntafræði.. fer í það í dag og vona að ég fái það samþykkt.. veit ekki alveg hvað ég geri annars í þessari blessuðu ritgerð...

jólin halda áfram að streyma í IKEA, meiri skreytingar á hverjum degi finnst mér og runan af fólki heldur áfram að lalla framhjá borðunum okkar og beint í skrautið.. voða lítið að gera líka undir mánaðarmótin en þá er líka bara meiri tími til að slúðra, heyra nýjustu vinnusögurnar og fleira og fleira..

Halloween partý eftir 2 daga, Lisa er á leiðinni til mín með búningahugmyndir.. hlakka til hlakka til hlakka til

p.s. Allar góðar hugsanir fara til Maríu minnar í dag sem er að fá nýtt brjóst!! vei vei! Til hamingju með Betty!! ;)

klapp klapp klapp

Ég held ég hafi sjaldan eða aldrei verið eins stolt af íslendingum eins og í dag. Í heilt ár hef ég fyllst vonleysi í hvert sinn sem samstaða er sýnd í verki annars staðar í heiminum - ekki vegna þess að samstaða sé slæm heldur vegna þess að íslendingar eru ekki mikið fyrir að hópast saman og virkilega sýna mátt sinn. En í dag varð breyting á.
Þar sem ég stóð upp á skólavörðuholti með vinkonum og systur minni fékk ég gæsahúð og hjartað mitt tók aukakippi annað slagið því ég var svo glöð yfir því hvað hægt er að gera ef fólk leggst bara á eitt og er ekki með leiðindi eða vesen. Ég veit að þetta var bara einn dagur en þvílíkur dagur.
ég er stolt af því að vera íslensk kona.

London myndir

ég var nú ekkert sérlega duglega að taka myndir en þær sem ég tók er ég nú búin að setja inn á FOTKI vefinn minn þannig að þið getið kíkt á þetta. Eva systir tók nú eitthvað meira af myndum og þið getið kíkt á hennar síðu líka ;)

er að læra í bókmenntafræðinni, fer í dinner klukkan sjö þannig að ég hef enn nokkra klukkutíma..

later...

útilyktin af hárinu þínu

sit í skólanum.. nennti ekki að horfa á Band Wagon og ákvað í staðinn að vera fullorðin og vinna smá rannsóknarvinnu í tengslum við ritgerðirnar mínar.. ekki seinna vænna held ég ;)
Fór í nýju úlpunni minni og nýju skónum í bónus áðan - komst að því að úlpan er mjög hlý og nýju skórnir eru rosalega nýjir = blaðra á vinstri hælnum. Annars held ég að ég sé búin að máta öll fötin mín aftur.. svei mér þá ef þau eru ekki bara fabulous ;)

Ágætis helgi framundan, hitti Christine á kaffihúsi í kvöld og eflaust Lisu seinna í kvöld; á laugardaginn er svo árshátíð Lyfja og Heilsu og er mér boðið í dýrindis mat og tilheyrandi á hótel Sögu og líka afmælispartý hjá Ólöfu sem vinnur með mér í Íkjea og á sunnudaginn ætlum við að hafa góðan sunday dinner og eld Bayonnes skinku með tilheyrandi gúmmelaði :)er sem sagt ekki að vinna og ætti því að geta byrjað á ritgerðunum - alla vega beinagrindunum..

já og María Erla, fólkið fyrir framan mig í flugvélinni var svo ömurlega leiðinlegt að til að forðast að verða jafn leiðinleg og þau hlustaði ég á 'Takk' plötuna með Sigur Rós aftur og aftur og kann hana núna frá byrjun til enda, :)

góða helgi!

Le ferðasaga

Jæja.. var ég ekki búin að lofa sögu hérna á blogginu?
Á laugardaginn flaug ég sem sagt út til London. Ég lenti fyrir aftan svona líka skemmtilegt fólk þannig að ég sat með geislaspilarann minn allan tímann og er þekki nú ‘Takk’ alveg fram og tilbaka. Eftir að hafa dröslað töskunni niður í kjallara á flugvellinum náði ég Stanstead express lestinni og tók litla systir mín á móti mér á Liverpool Street station. Þaðan áttum við svo eftir 25 mín í lest að hótelinu okkar og það var ekki kalt úti!!
Klukkan var orðin svo rosalega margt að við tókum því bara extra rólega, fengum okkur að borða og löbbuðum aðeins um Bayswater og svona..

Sunnudagurinn var æðislegur! Eftir rólegan morgun þar sem við gengum um hverfið okkar hentumst við í lest til að fara og borða á Fifteen. Því miður lá svarta línan (norhtern) niðri þann daginn því kallarnir voru í verkfalli. Þeim fannst ekki nóg að fá rúmar 3 milljónir á ári fyrir að sitja fremst og ýta á start og stopp. En jæja.. við náðum nú að hitta Grétar Stein og Mörtu kærustu hans og skunduðum upp að veitingastaðnum – sem við misstum næstum því af því hann er falinn í lítilli götu sem telst vart meira en húsasund!! Við fengum frábær sæti, sáum inn í eldhúsið og alla litlu kokkana og fengum líka æðislegan mat (og við fengum að eiga matseðlana ;) Við komumst líka að því að Jamie á ekki veitingastaðinn lengur heldur á hann bara hugmyndina og kemur því sjaldan inn á staðinn bú hú.. hheeh Eftir matinn ætluðum við í Camden en vegna verkfalls kallanna var það orðið svo flókið að við fórum bara í staðinn á High Street Kensington þar sem veskið var tekið upp í ansi oft! Plönuðum svo næsta dag og horfðum á Spider man í sjónvarpinu

Mánudagurinn var án efa erfiðasti dagur sem ég hef upplifað lengi! Við fórum strax á Oxfrod Street um 10 um morguninn og vorum þar til 6 um kvöldið! Við löbbuðum búð úr búð og versluðum fyrir ansi mikinn pening en vorum sjúklega sáttar þegar við vorum búnar að þessu. Fórum svo á Leicester square til að fá okkur að borða með Grétari Steini og sáum næstum því Tim Burton og Johnny Depp því það var frumsýning á Corpse Bride.. Burton var nýlabbaður framhjá og eftir 20 mín bið þegar Deppinn var ekki búinn að láta sjá sig löbbuðum við í burtu.. Já, maður þarf að vera ansi þreyttur og svangur til þess að labba frá stórstjörnu skal ég segja ykkur ;) Fengum frábæran mat á T.G.I. Fridays þar sem ástralskur þjónn reyndi að heilla okkur upp úr skónum (enda fékk hann ágætis tip frá okkur) og fórum svo snemma að sofa enda uppgefnar.

Þriðjudagurinn var svo síðasti dagurinn í Lundúnum að sinni. Vöknuðum tíu mínútur í 9 við brunabjölluna á hótelinu en það reyndist víst bara hrekkur.. þar sem við vorum vaknaðar ákváðum við samt að skella okkur í Whiteleys, lítið moll hjá hótelinu og kaupa síðustu gjafirnar . Þar hittum við mann frá Suður Afríku sem sagðist hafa hitt íslending í apóteki einhvern tímann og komist að því að þeir töldu eins upp að 10.. asninn ég lét hann ekki telja fyrir mig.. verð víst bara að trúa honum :)
Við eyddum svo deginum í að skoma Westminster Abbey með ágætri söguleiðsögn frá Grétari og er ég nú fróðari um alla Hinrikana og Ríkharðana og Ellu drottningarnar sem eru grafnar þarna og ég held ég hafi frætt hann aðeins um nokkra rithöfundana í Poets Corner.. sweet.
Við ætluðum svo í London eye en hryllti við að eyða restinni af deginum í biðraðir. Fengum okkur vöfflu og göngutúr um svæðið í staðinn. Áttum svo alltaf eftir að græja Tax Free frá H&M þannig að við brunuð á Tottenham Court Road og fundum næstu búð sem græjaði það fyrir okkur og hlupum svo nánast í næstu lest því við áttum að sjálfsögðu eftir að ná í töskurnar og koma okkur í Stanstead lestina! Náðum á síðustu stundum og allt eftir það er eiginlega í þoku. Náðum að hálfsofa alla leiðina heim þar sem beið okkar sjúklega þykk þoka.

Í raun var frekar heitt allan tímann sem við vorum þarna, ringdi bara á nóttunni en við spókuðum okkur í sól og blíðu inn á milli búða ;) Er nú samt ótrúlega fegin að vera komin heim – Ég náði í raun bara að vaka í 8 klst. í gær því ég var svo þreytt og illt í líkamanum og með sjúklegan hausverk... en ´núna, eftir ansi mikinn svefn er ég til í slaginn, búin að kaupa miða á Sigur Rósar tónleikana, (rétt náði miða í stúku) og ætla að klæða mig í eitthvað af þessum nýju fötum!!
Túdelú öll sömul

heil á húfi

komin heim, heil á höldnu ...eða eitthvað :) of þreytt til að hugsa, hvað þá deila sögum.. lofa betrun á morgun..eða eftir.. það er víst kominn nýr dagur...

Í augnablikinu gæti verið slökkt á farsímanum

er að ganga frá síðustu hlutunum, London awaits.

sjáumst!

taugaspenna

úff.. ok.. Eva systir er komin út og ég er að verða spenntari með hverju augnablikinu sem líður! veit varla hvað ég á af mér að gera þangað til eitt á morgun!!!
Fór nú í hollywood musicals í dag og horfði á Singin' in the Rain sem kom mér alveg skemmtilega á óvart. Mikið rosalega var Gene Kelly myndarlegur maður - fékk alveg hroll bara. *hrollur* ahh já.. fór svo í kaffi með Írisi Helgu vinkonu og endaði á borgarbókasafninu þar sem ég nældi mér loksin í Óskar og Bleikklædda konan og Milarepa ásamt 2 litlum bókum um London sem ég hyggst glugga í í flugvélinni :) Fór líka í bankann og náði í smá gjaldeyri- svona í lestina og þess háttar smotterí ;)
Var að ljúka við síðusta þáttinn í syrpu 2 af OC og horfði svo gott betur á fyrstu 4 þættina í syrpu 3!! ó já, talandi um að vera sjónvarpsfíkill :D

er að klára að pakka niður.. held ég verði að hoppa aðeins með íþróttaálfinum til að ná mér niður,

áfram latibær!

Hi, this is Jamie...

skemmtilegar fréttir í tengslum við london,
náði að bóka borð fyrir okkur í lunch á Fifteen á sunnudaginn (jei!) og eftir það liggur leið okkar í Camden þar sem veskið verður örugglega tekið upp einu sinni eða tvisvar ;)
fékk líka góðar fréttir frá lækninum mínum- það er ekkert að mér, alla vega ekkert sem hann sér þannig að ég er sem sagt hress.. sem fress..

er á leiðinni í vinnuna, í jólaskrautið og geislabauginn yfir stöðinni minni - fer ósjálfrátt að humma jólalög.. hmm hmm hmm, hmm hmm hmm, hmm hmmm hmmmmmmm hm hmmmmmmmmmm...

..... and back again

komin aftur í borg óttans með hálsbólgu og tilheyrandi vanlíðan. nældi mér í skemmtileg veikindi heima á akureyri en maður verður bara að hrista þetta af sér og horfa fram á við, nánar tiltekið á laugardaginn!!!
já það styttist óðum í Lundúna ferðalag okkar Evu og það er erfitt að sjá hvor okkar er spenntari! ætla að kíkja á ferðatösku hjá henni í kvöld því ég er alveg sannfærð um að mín er allt of lítil fyrir þessa reisu...

hef komist að því að síðan ég byrjaði að vinna hjá núverandi vinnuveitanda mínum hef ég lent í mörgum umræðum og lagerstöðu og lagerkerfi fyrirtækisins og hvers vegna hlutirnir séu aldrei til. þetta er stundum fyndið en stundum er það hreinlega þreytandi að þurfa að miðla upplýsingum sem fyrirtækið sjálft ætti í raun að vera að gera. en svona er þetta.

sit á náttsloppnum fyrir framan skjáinn, með netlute og vona að mér batni.. nenni ekki að vera lasin...

sum sum

kannski kominn tími á öppdeit?

Kom heim á fimmtudaginn í rigningu, internetleysi og hafði gleymt skólabókunum - en samt gott að koma heim :) Þrátt fyrir snjókomu undanfarna daga hef ég náð að tjútta með Önnu Möggu minni, föndra eitt piparkökuhús úr efni (mjööög flott), passa Ágúst Óla, séð systur mína flytja í nýtt hús og náð mér í hálsbólgu! og ég á eftir að vera hérna í heilan dag í viðbót - excellent work ;)

Fór svo til læknis í morgun (þess vegna er ég vakandi svona snemma) til að tékka á blóðinu mínu og svona.. vona að þetta sé bara ímyndun í mér og það sé ekkert að mér nema léleg blóðrás og ekki nægur svefn.
Ætla að eyða deginum í meira föndur, svefn og almenna afslöppun svo ég eigi nú einhverja orku eftir þegar ég fer til London næstu helgi :D

home on the range

er á leiðinni út á flugvöll, akureyri here i come!

af flensu-einkennum og hetjum

er með væg einkenni flensunnar eftir sprautuna í gær og lá í hálfgerðu móki í hollywood söngleikjum í dag.. endaði með því að fá frí í vinnunni þar sem ég sá ekki fram á að vera nægilega hress til þess að standa þar í 4 klukkutíma og brosa...

keypti Vikuna áðan því hún María mín var í viðtali ásamt fleiri ungum konum sem greinst hafa með brjóstakrabbamein. Margt af því sem kom fram í greininni vissi ég fyrir en áttaði mig samt á því hversu ótrúlega sterk hún er og hversu stolt ég er af því að vera vinkona hennar. hlakka til að faðma hana þegar hún kemur heim frá Japan :)

hef verið að hlusta á Push the Button með Chemical Brothers undanfarna daga.. ekki frá því að hann sé með betri diskum sem ég hef heyrt lengi - þ.e. af þess háttar tónlist.. ekki spillir fyrir þegar lögin hafa aukna merkingu út af skondnum atriðum í þáttum (í einum O.C er snilldar atriði með laginu Marvo Ging) eða frábærum myndböndum (Galvanize).. En þegar tónist vekur upp með manni orku sem maður hélt að maður ætti ekki til - priceless

ætla að leggjast í bólið og vona að hitinn og skjálftinn hverfi..

needle in the hay

fékk flensusprautu í dag í apótekinu. ákvað að nýta mér þetta þar sem konan mætti hreinlega á svæðið með pakka af bóluefni og bauð okkur starfsfólkinu upp á smá nálastungu. fann til í vinstri hendinni í allan dag og er rétt núna búin að losna við bólguna og roðan sem var í kringum stunguna.

þreytan og kuldinn halda áfram að leiðast hönd í hönd og næ ég varla góðum nætursvefni þó ég reyni mitt besta. er búin að panta annan tíma hjá lækni - best að fá þetta á hreint með skjaldkirtilinn. hver veit nema ég hressist við, bara vegna þess að ég á pantaðan tíma hjá lækni.. merkilegt hvað það gerist oft.

bakaði súkkulaðiböku í kvöld. er ekki ennþá búin að smakka hana því hún er enn að setjast.. það gerist líka merkilega oft- hlutirnir taka lengri tíma en gefinn er upp í matreiðslubókum.

verð að reyna að sofna.. verð að sofa vel... verð að hvílast...

dansk bryllup

já krakkar mínir,
haldiði ekki að Eva Stína vinkona mín hafi ekki látið pússa sig saman við danann sinn á laugardaginn! Það sem virtist vera sáraeinföld skírnarathöfn fyrir Óskar Smára breyttist í brúðkaup með tilheyrandi andköfum og hissa-svip á mannskapnum í kirkjunni! Innilega til hamingju Eva Stína mín og til lykke Anders med familien:)

á svona stundum samgleðst maður vinum sínum... en áttar sig líka á því hversu einn maður er... reyni nú að láta gleðina ná yfirhöndinni og vona að ég fái að hitta þau sem fyrst..:)

orkusuga

september búinn, október nýbyrjaður.. fyndið hvað tíminn líður hratt!
Helgin fór að langmestu leyti í það að vinna og vinna svo aðeins meira.. það er alveg ótrúlegt hvað maður verður þreyttur af því að vinna þarna - fólkið sýgur alveg úr manni orkuna svo maður á ekkert eftir handa sjálfum sér..
Náði nú samt að kíkja í bíó á laugardeginum á The League of Gentlemen's Apocalypse og flissaði ansi mikið yfir henni!

Í dag og næstu 3 daga verð ég einni á kafi í vinnu og skóla en á fimmtudaginn fer ég norður í 5 daga svo það verður ansi ljúft..
bleble í bili

follow the yellow brick road

horfði á The Wizard of Oz í dag í Hollywood musicals og skemmti mér sjúklega vel! ég og Lisa og Daniel sátum aftast þannig að við sáum lang best (hehehe)og ég viðurkenni að ég söng annað slagið með :) Ég og Lisa fórum svo í kringluna og fengum okkur að borða ásamt smá verslunarferð hjá Lisu því ég er að sjálfsögðu að spara núna! náðum samt að kaupa okkur eins hatt!

Vikan er annars búin að vera góð - allt nánast klappað og klárt fyrir Lundúna ferðina hjá okkur og ég er líka búin að redda fríi í vinnunni þegar ég fer norður til Akureyrar þannig að þetta er barasta allt saman fínt :)

Er samt frekar andlaus yfir þessu bloggi eitthvað, kannski því ég er búin að tala svo mikið við fólk í síma undanfarið - finnst lítið að frétta af mér í augnablikinu..en jæja.. er að vinna um helgina, vú-hú!

This is the BBC World Service

Ok, átti alveg snilldar dag í gær þar sem Londonferðin var fest niður, fattaði næstum því allt sem var sagt í bókmenntafræðitímanum mínum OG fór svo í mat og kaffi með þýðingafræðipíunum (og Guðrún og Maja, ég ER með sólgleraugun á andlitinu en ekki ofan á höfðinu!). Eftir það komu Eva systir og Árni og náðum við að græja hótel fyrir okkur, Hyde Park Towers (3 stjörnur og svona) þannig að ég er bara nokkuð vel sett fyrir þessa ferð! nú þarf bara að vera duglegur á stigavélinni...

Annars var verið að klukka mig aftur, í þetta sinn af Ingu Björk vinkonu þannig að ég reyndi að finna fleiri staðreyndir um mig en var frekar blankó.. reyni aftur seinna...

Sit heima, hlusta á BBC í útvarpinu og læt mig dreyma..

LONDON BABY!!!!!!!!!!!

Ó já!
Eva litla systir mín er snillingur! Hún lagðist á vef Icelandexpress og náði að herkja út flug fyrir okkur á pínkupons pening í október!! reyndar fer hún út á föstudeginum 14. og ég fer á laugardeginum 15 en það er bara fínt!! Við ætlum svo að koma aftur heim á þriðjudeginum 18. þannig að þetta verður alveg sjúkt! Nú þarf ég bara að finna út hvað ég má eyða miklu :D

Helgin var annars svakafín, notaði laugardaginn í að kíkja í Smáralind á systur mína og villast í strætó (aldrei að skipta um skoðun á síðustu stundu!!) og tók því svo úber rólega um kvöldið og sá 2 myndir í sjónvarpinu. Gærdagurinn fór svo að mestu í lærdóm og eldun á kvöldmati og tiltekt eftir helgina, hehe..

Í dag náði ég svo þeim snilldarárangri að sofa yfir mig og missa af Hollívídd tímanum en ég reddaði því bara.. Vikan framundan er aðeins minna pökkuð en sú síðasta, er reyndar að fara í vinnuna í apótekinu í dag og skólann aftur OG svo hitta þýðingastelpurnar á Súfistanum en það er bara skemmtilegt :)

ok, ætla að kíkja á hótel og hostel í london.

af bjórdrykkju og sjóvarpsglápi

í gær bauð ég Lisu og Daniel heim til mín til að horfa á The Gold Diggers of 1933 sem var fyrsta myndin í Hollywood Musicals áfanganum og við misstum öll af. Eftir u.þ.b. hálftíma af myndinni vorum við farin að tala um aðra hluti og horfa á myndina með öðru auganu en náðum samt að ná söguþræðinum..svona nokkurn veginn.
ég kíkti svo út á Celtic Cross þar sem nokkrir enskunemar höfðu safnað saman í Karókí keppni og labbaði ég inn á nokkrar írskar klámvísur og Britney Spears. Flott kombó.

Í dag er fyrsta fríhelgin mín síðan í ágúst og ætla ég að njóta þess í botn að þurfa ekki að aðstoða fólk við að finna húsgögn heldur ætla ég að liggja á húsgögnunum mínum.. og kannski fara aðeins út.. good plan :)

St. Christopher

fann gamalt hálsmen í skúffunni í dag. á því hanga tveir hlutir. sá fyrri fylgdi keðjunni og er lítið hjarta með nafninu mínu öðru megin og skírnardeginum mínum hinum megin. þetta var gjöf frá systur mömmu og hef ég sem sagt átt þessa festi í 25 ár. þegar ég flutti til kanada þá var ég með þessa festi nánast allan tímann sem í sjálfu sér var mjög fyndið því ég er ekki mikið fyrir að bera skartgripi á hverjum degi - finnst ég stundum vera að kafna ef ég er með eitthvað mikið. en, sem sagt, þá var ég með þessa hálsfesti á mér allan tímann.

hinn hluturinn á festinni er lítill hringlaga platti úr áli að ég held og ber mynd af heilögum Kristófer á annarri hliðinni bera lítið barn yfir á og á hinni hliðinni er bíll - svona eins og í Monopoly spilinu - að bruna um sveitir einhvers ónefnds lands. jeramy gaf mér þennan verndargrip og sagði að heilagur kristófer væri verndardýrðlingur ferðalanga og því myndi mér vera óhætt á meðan ég bæri hálsfestina þó ég væri ekki kaþólikki.

mörgum finnst kannski skrýtið að ég skuli vera að tala um þetta núna en ég var að tala við systur mína um bílslysið sem ég hefði átt að deyja í þarna rétt fyrir jólin á hraðbrautinni rétt fyrir utan Halifax... kannski var það heppni, kannski átti ég bara einfaldlega ekki að deyja þar, kannski er eitthvað stærra þarna úti.
ég veit bara það að ég er fegin að hafa ekki þurft að koma heim í járnkistu.

Akureyrensis

jæja,

er búin að bóka mér far heim til Akureyrar 6-11 október þannig að allir sem vilja hitta mig þar mega fara að bóka hitting ;) Fannst ég eiga skilið að fara heim eftir þvottvéladrama undanfarði.. já raftækin á heimilinu gefa sig eitt af öðru og nú er blessuð þvottavélin komin á verkstæði eftir dularfull veikindi undanfarið - held ég fari nú bara að gefast upp á þessu - borgar sig ekki að eiga hluti því þeir bila alltaf!

Er á leiðinni í vinnuna eftir vel heppnaða kaffihúsaferð með Írisi Helgu vinkonu og svo smá Bónus ferð.

Sérstaklega góðar hugsanir fara til Maríu minnar í dag sem er að leggja í langferð til Japans um það bil núna.. hafðu það gott ezzkan og hlakka til að heyra sögurnar og sjá myndirnar þegar þú kemur afur!

I've got music, i've got rhythm...

Þegar ég er að vinna þá er ég yfileitt svo þreytt þegar ég kem heim að ég nenni aldrei að blogga, en nú er víst kominn mánudagur og tími til!

Fór í Hollywood söngleiki á föstudaginn og það var tær snilld sem sagt.. ekkert flottara en Fred Astair og Ginger Rogers að tjútta alveg á milljón í fabulous fötum og syngja líka! Eftir þennan tíma áttum við María Erla að fara á Esjuna en enduðum á Bókmenntahátíðinni og hlustuðum á Paul Auster tala um bækurnar sínar.. alveg hreint frábært..

Á laugardaginn var svo vinna og schnilldar partý hjá starfsmannafélgi IKEA á Sólon þar sem ég virstist vera eina manneskjan sem ekki var að hella í sig (í bókstaflegri merkingu) og slapp ég því með nokkrar skemmtilegar myndir af hinum og með þreytu en ekki timburmenn í vinnunni í gær! Frekar fyndið hvað flestir voru alveg ekki í góðum fílíng í gær, flissaði oft og lengi yfir þessu fólki :D

en í dag er víst mánudagur, ég er drulluþreytt eftir helgina en ég á víst að fara og vinna í apótekinu á eftir og ikea á morgun.. og á fimmtudaginn og svo aftur í apótekið á föstudaginn....

en ég á frí um helgina :D

Hollívúdd mjúsikals

Það á ekki beint að ganga hjá mér að vera í skólanum! Um daginn þurfti ég að skifta um bókmenntaáfanga og svo núna þegar Textagerð byrjaði loksins í gær kom í ljós að hann var svona imba-proof og ég þurfti að leita mér að öðrum áfanga. Eftir að hafa skimað yfir stundaskrá Íslenskuskors með hrylling í hjarta ákvað ég að draga upp trompið í erminni: ég á inni 5 einingar í enskunni! Trítlaði yfir í Odda og skellti mér á Hollywood Söngleiki hjá Martin Regal, very nice my friend.
Það besta við þetta allt saman er að Lisa er í þessum áfanga líka (jei!) þannig að ég þekki alla vega eina manneskju ;)

Dagurinn í gær tók samt svolítið á því ég fattaði að ég var búin að vera með hausverk í tvo daga, komin með kvef og hnerra og sofnaði næstum því í bókmenntafræðitímanum. Þetta voru allt saman merki um að ég er ekki búin að hugsa nógu vel um heilsuna, svefninn og að borða nógu reglulega þannig að ég skellti mér á eins og 11 tíma svefn í nótt!

Í dag er vinnudagur..vona að ég selji sjúklega mikið ;)

Annars er ég að reyna að komast heim.. veit einhver um far til Akureyrar á fös. 23 sept eða 7 okt?? endilega látið mig vita

klukk

ok,
manni hefnist fyrir að lesa blogg annarra reglulega.. las áðan á síðunni hennar Ellu Maju að hún er víst að klukka mig (og fleiri) til að deila 5 handahófskenndum staðreyndum um sjálfa mig.

1. Ég er heilluð af alvöru krufningum á látnu fólki, ekki "ó-ekta" eins og sést í CSI og fleiri þáttum. Það er eitthvað svo hrikalegt en á sama tíma svo sjúklega spennandi.

2. Ég hef aldrei ekið hringinn í kringum landið. Svæðið á milli Stokkseyrar og Djúpavogs er ókannað svæði fyrir mér... einhvern daginn, einhvern daginn...

3. Mér finnst hákarl góður á bragðið. Virkilega góður.

4. Þrátt fyrir að ég dáist að fegurð hafisins er fátt sem ég hræðist meira. Ég get ekki horft á kafbátamyndir eða myndir sem fjalla um hamfarir á sjó. Gerði undantekningu með Titanic og fékk martraðir eftir á.

5. Ég skammast mín stundum fyrir að vilja vera heimavinnandi húsmóðir með grænmetisgarði, sultugerð og 2 börn. Finnst ég vera að svíkja þær konur sem börðust fyrir auknum réttindum kvenna. En svo skammast ég mín fyrir að hugsa þannig :)

vá.. þetta var kannski meira en sumir vildu vita en þetta var fínt fyrir mig.. alltaf gaman að bera drauma sína, hræðslur og skringileika..

mayhem and sunday dinners

já.. ahemm.. ég er nú ekki búin að vera í fríi eins og ég sagðist ætla að vera heldur tók ég að mér aukavaktir bæði í gær og í dag. þreytt. náði nú samt að grafa upp geislaspilarann minn og hlustaði á St. Germain á leiðinni í og úr vinnu og hugsað nokkur ár aftur í tímann þegar ég keypti þann disk.. mmm..

vikan framundan lofar góðu - er að fara í skólann á mán-mið-fös og vinna dagana á milli auk hittings á Ara í Ögri annað kvöld og staffapartýið mikla á Sólon næsta laugardag.. úff það verður stuð!

andlaus andi í mér í dag.. ætla að borða eitthvað og kíkja á kassann..
ble

of mikið

fattaði allt í einu að það er kominn fimmtudagur og ég hef ekkert bloggað í vikunni! Það er nú ekki eins og ég hafi ekki verið að gera hellings.. kannski er það málið - það var einfaldlega of mikið að gera :)
stutt recap:
-Á sunnudaginn fengum við Tóta, Fríða, Monika, Ingibjörg og Lísa að bragða á yndislegum vöfflum hjá Maríu og Krumma á nesinu. Ótrúlega gaman að rifja upp gömul kynni og sjá hvað þær eru að gera í dag.. lovely day indeed..

-Á mánudaginn byrjaði ég svo í skólanum aftur, jei! Eftir að hafa setið í klukkutíma í einum bókmenntaáfanga var mér kurteisislega bent á að hann væri allt of auðveldur fyrir mig og mér sagt að fara í framhaldsáfangann sem heitir Straumar og Stefnur í bókmenntafræði. ok. Nýtti þessa 2 klukkutíma sem ég þurfti að bíða í að standa í röð í bóksölunni og ná í þýðingafræðiverkefnin mín frá því í vor. Sama umsögn: LESA MEIRA Á ÍSLENSKU! Þannig að nú eru ensku bækurnar aftur komnar í bann en þær höfðu fundið sér leið aftur inn í líf mitt.. ansans.. Hitti svo Guðrúnu á Ara Í Ögri og kjöftuðum við um allt og ekki neitt... aðallega breskt sjónvarpsefni, hehehe..frekar langur dagur sem endaði með stuttri heimsókn frá eldri systur minni og LOST þætti.

-Á þriðjudaginn komst ég að því að skólasystir mín að norðan (sem ég hélt að væri í Barcelona) er komin til landsins og er í sama kúrs og ég í skólanum!! rakst á hana á bókasafninu þar sem ég reyndi að berja fallega drenginn augum (án árangurs samt). Labbaði þó út með fullt af bókum: Kristnihald undir Jökli eftir hann Halldór minn; Fjallkirkjan (I) eftir Gunnar Gunnarsson, Leigjandann eftir Svövu Jakobsdóttur (skyldulesning í skólanum) og Mávahlátur.. man ekki hvað hún heitir pían,, Kristín eitthvað.. Fór svo sem sagt í vinnuna og seldi fullt fullt af hlutum

Í gær var svo stíft prógram þar sem ég fór og flutti bankaviðskipti mín úr Sparisjóðnum yfir í Landsbankann. ó já.. Þetta tók allt saman sinn tíma og eftir það labbaði ég um þarna í kringum Mjóddina og spókaði mig í þessum örfáu sólargeislum sem komu fram í gær.. vann svo aukavakt í IKEA og uppgötvaði glænýtt office romance meðal starfsfólksins og bíð spennt eftir að komast í vinnuna á eftir.. þetta er mín sápuópera.

Vá ok, ef fólk er búið að nenna að lesa svona langt þá er best að ljúka þessu á styttri nótunum; vinna í dag og svo frí alveg fram á næsta þriðjudag.. engin plön fyrir helgina ennþá..
tak för

Kaupæði

Fór með Maríu og Ingibjörgu á Esjuna í gær og duttum við aðeins í krækiberjalyngið á leiðinni enda risaber og mörg á hverri þúfu.. liggur við að ég sé ennþá blá á tungunni ;) góð ferð í góðu veðri...

En talandi um kaupæði..Fólk fór hamförum í búðinni í dag! hef bara sjaldan séð jafnmarga í biðröð eftir afgreiðslu og eftir 5 klukkutíma var alveg komin með nóg og labbaði út úr búðinni án þess að blikka!
eyddi svo restinni af deginum í að kaupa í matinn og græja klósettið og ætla nú að leggjast undir teppi og glápa á Sahara og eta nammi gott..

lifið heil

Product of IKEA

var að enda við að baka köku fyrir apótekskonurnar mínar.. ætla að kíkja á þær á morgun og færa þeim eina súkkulaðibombu a la Betty! EFtir þá heimsókn ætla ég að arka á Esjuna með Maríu og vonandi Lísu og Monkiu.. mæting kl. 12 ef fólk hefur áhuga!

Annars er ég búin að taka þessa síðustu daga í ágætis tiltekt og skipulagningu á plássi í svefnherberginu. Hef lúmskan grun um að IKEA sé hægt og sígandi að innrita einhverja Bree Van de Camp inn í mig...mm.. Fór einmitt í vinnuna í dag og mætti ekki starfsmannastjórinn með myndavél til að skella í eins og eina mynd á starfsmannavegginn fræga! Þetta er einn fyndnasti veggur sem ég hef séð því myndirnar eru settar í svona vasa eins og eru á öllum húsgögnum og hlutum í IKEA og svo stendur nafnið og deildin og hvað maður er búinn að vinna lengi á miðanum.. hehe hehe hehe hehe

product of IKEA indeed...