gobbeldigook

sigur rós komið með nýtt lag í spilun og myndband með beru fólki (rísið nú upp, teprur landsins) og ég held að ég sé hreinlega að fíla þetta. Allt öðruvísi en áður en samt þeir... Orri fer hamförum á trommunum! Hlakka til að heyra rest, þann 23. júní ;)

Voruð þið annars búin að fatta að maí er alveg að verða búinn? Það mætti reyndar ætla, miðað við hitabeltisloftslagið hér á 7. hæðinni, að það væri miður júlímánuður. Hver trúir því að það sé 18-20 stiga hiti hérna dag eftir dag? Klöppum fyrir öfugum hæðum/lægðum sem skófla heita loftinu til okkar!

Þetta hitabeltisloftslag er að gera út af við skapandi hugsun hjá mér svo ég læt staðar numið.

jú annars, takk fyrir öll fallegu kommentin varðandi Óliver ;)

Er hægt að vera meira krútt?

Óliver, 5 vikna og 3 daga gamall í dag.

og svo ein af okkur saman :)

Babell

Ég fékk heimsókn í gær frá Ágústu og gaf hún mér svona ótrúlega krúttlegan köku/ávaxta stand! Takk kærlega fyrir mig - nú er eina vandamálið hvort ég eigi að setja kökur eða eitthvað hollara á bakkana? ;)

Bloggletin heldur áfram og er alveg að drepa mig.. Stundum nennir maður bara ekki að deila með öðrum. Stundum er bara gott að melta sjálfur. Annars er helst í fréttum að ég er ekki enn búin að kíkja aftur á Óliver en ætla að drífa í því - langar mikið að sjá krúttið ;)

---

Ég fæ líka loksins sjónvarp á eftir! adsl-myndlykillinn mætir á svæðið um fjögur leytið svo ég held ég baði mig í lélegu sjónvarpsefni næstu daga, svona til að bæta upp fyrir síðustu 3-4 vikur hehe.

---

Ég kíkti út í Mið-Samtún til Ingu og Einars og sauðburður er þar í fullum gangi. Fékk að klappa nokkrum lömbum, gefa á garða og fylgjast með hundaskottunum borða misgáfulega hluti. All in a days work :)

---

Framundan er brúðkaup Írisar og Halldórs í Reykjavík, flutningur litlu systur af stúdentagörðunum og svo heimkoma Ólivers í lok júní. Er lífið ekki bara nokkuð gott?

Pleh

Langur tími, lítið blogg.

Er í andleysi ársins, þ.e. fæ alltaf leið á blogginu mínu annað slagið og er í þeim gír núna. Verð samt að deila því með ykkur að ég fór á tónleika með Svavari Knúti á Græna Hattinum 1. maí og skemmti mér stórkostlega. Útilegulag Gunnars í Krossinum og baráttulagið Mengum Ísland hafa hljómað í huga mér undanfarna daga.... you had to be there ;)

Ég kíkti líka á Jökul Bergmann og hann er algjört krútt. Gaman að sjá mumma í pabbaleik, hehe.

Nú er Óliver líka orðin 3ja vikna og ég ætla að kíkja á hann í vikunni - set þá örugglega nýja mynd af kvikindinu hérna inn. Hlakka til að sjá hvað hann er orðinn stór og hvort hann er ennþá jafn frekur á mat!

Safnadagurinn var í gær og afrekaði ég að fara í fyrsta sinn á bæði Smámunasafnið og Iðnaðarsafnið. Á því fyrrnefnda sá ég flotta heimildamynd um Sverri Hermannsson sem verður sýnd seinna á árinu á rúv - ekki missa af henni því þetta er hörku kall með ótrúlega ævi að baki.
Á Iðnaðarsafninu sá ég svo svart á hvítu hvað Akureyri hefur í raun breyst mikið síðustu 50-60 árin. Ég fann líka 3 myndir af verkstæði langa afa míns, sem svo skemmtilega vill til að ég bý í núna. Mæli með þessu - ótrúlega hollt eitthvað fyrir mann.

Nú ætla ég að sigla inn í sunnudaginn með bros á vör og hugsa um að dansa - hvað er betr' en að dansa?

Everyday People

Muna fleiri eftir þessari snilld? Elskaði þetta lag á sínum tíma og finnst það ennþá flott ;)

Tileinka lagið Mumma og Söru sem eignuðust lítinn dreng í nótt - til lukku mín kæru!

Óliver

Ég kynni stolt nýjustu viðbótina við fjölskylduna mína, labradorhvolpinn Óliver :)

Mummi og Sara fóru með mér í gær að kíkja á tvo rakka sem ég mátti velja á milli. Þessi var mesti töffarinn, enda étur hann nánast allt frá systrum sínum og bróður en örlög okkar beggja voru innsigluð þegar ég hélt á honum og hann pissaði á mig! Þvílíkur klassi að merkja sér eiganda sinn ;)

Ég fæ hann formlega afhentan í júnílok því konan er svo elskuleg að geyma hann aðeins lengur fyrir mig svo ég geti sinnt honum vel í sumarfríinu. Ég fæ samt að fá hann í „aðlögun“ í júnímánuði :)

Þá er bara að finna búr, skálar, ól, hundaöryggisbelti og allt tilheyrandi! Er einhver að losa sig við stórt hundabúr?? ;)

Besti vinur

Um næstu helgi verð ég viðstödd giftingu besta vinar míns.
Lengi vissi ég ekki almennilega hvað "besti vinur" í rauninni var. Ég hélt ég vissi það en var í raun grunlaus. Mér finnst líka alltaf hálf kjánalegt að tala um einhvern sem besta vin - finnst ég komin í leikskóla eða núll bekk frekar en að vera nánast orðin þrítug.

Besti vinur minn var búinn að vera vinur minn í mörg ár en varð bestastur (svo ég dett í leikskólagírinn aftur) þegar við ákváðum að leigja saman íbúð fyrir næstum 4 árum. Mér hefði aldrei þá dottið í hug að ég ætti eftir að tengjast honum svona sterkum böndum, já eða þykja svona óendanlega vænt um hann. Þessi tvö ár sem við bjuggum saman lærði ég meira um sjálfa mig en mörg ár þar á undan.

Þegar ég svo flutti aftur norður fór hann til Parísar en símafyrirtækin okkar græddu heldur betur því það leið nánast ekki sá dagur að ég hringdi ekki í hann, oft bara út af einhverju sem ég las eða sá í sjónvarpinu og fannst fyndið af því það tengist okkur á einhvern kjánalegan hátt. Hann kom svo heim til Íslands aftur í fyrrasumar en ástæðurnar voru ömurlegar því hann greindist með sjúkdóm sem mun fylgja honum alla ævi. Ég hef sjaldan verið jafnreið á ævinni eða fundist lífið jafn ósanngjarnt og þá. Það eina jákvæða við þetta var að símreikningurinn minn snarlækkaði, enda ódýrara að hringja milli landshluta en heimshluta.

Í dag er hann svo fluttur til Belgíu svo Síminn sér fram á góða daga og gróða fyrir hluthafa. Mér finnst erfitt að hafa vini mína svona langt í burtu - hluti af hjartanu fer nefnilega með þeim.

En á föstudaginn ætlar hann að gifta sig og ég fæ að vera með honum og manninum hans. Og það er meira virði en allt annað.

Out with the old, in with the new

Jæja,
út með landsbyggðarfyrirlitninguna og inn með eitthvað nýtt.

Ég er loksins komin með annan fótinn í íbúðina mína! :) Er búin að sofa þar þrjár nætur og fataskápurinn þar tekinn við af litla ljót sem ég hafði áður og í gær dröslaði ég sjónvarpi og spilara yfir svo ég gæti horft á eitthvað skemmtilegra en litinn á veggjunum ;)

Málið er að rafvirkinn á eftir að koma og tengja rafmagnið í stofunni og ég á eftir að skella símanum og internetinu í samband svo svefnherbergið og baðið eru uppáhaldsherbergin mín þessa dagana ;)

Þetta kemur samt allt saman og krúttlegt að labba hálfsofandi yfir til mömmu og pabba í morgunmat.

Þið megið því búast við kaffiboðum og spilakvöldum og alls konar á næstunni og hver veit nema ég splæsi í eitt stykku Eurovision partý?

Landsbyggðarfyrirlitning?

Rakst á þessa frétt á inni á Vísi núna rétt áðan:
Orkuveitan selur gömul líkamsræktartæki

Orkuveita Reykjavíkur er að selja notuð líkamsræktartæki.

Orkuveita Reykjavíkur auglýsir til sölu í Morgunblaðinu í dag fjöldann allan af líkamsræktartækjum. Um er að ræða gömul tæki sem fyritækið keypti notuð þegar nýja húsið var tekið í notkun. Tilvalið fyrir fólk á landsbyggðinni segir Sigrún A. Ámundadóttir hjá Orkuveitunni.

„Þegar við fluttum yfir í núverandi húsnæði var gert ráð fyrir líkamsræktaraðstöðu og voru keypt notuð tæki. Síðan var gerður þjónustusamningur við World Class sem sá um aðstöðuna. Fyrir nokkru ákvað World Class síðan að þessi tæki væru ekki boðleg fyrir sýna kúnna þannig að þeir tóku þetta yfir í heild sinni og fylltu stöðina af sínum tækjum," segir Sigrún en í kjölfarið var gömlu tækjunum hent út.

Sigrún segir að tækin séu mörg hver komin til ára sinna og séu ekki boðleg líkamsræktarstöðvum í Reykjavík. „Þetta eru engu að síður tæki sem stöðvar úti á landi geta boðið sýnum viðskiptavinum, við gerum nefnilega minni kröfur úti á landi," segir Sigrún en öll tækin verða seld í einu lagi.

Því geta einstaklingar ekki nælt sér í einstök tæki en listinn er nokkkuð langur. Þar má sjá kálfavél, fótakreppur, kviðvélar og tvo ljósabekki.„Nei einstaklingar geta ekki nælt sér í ljósabekk hjá okkur. Það er bara annaðhvort allt eða ekkert."

Sigrún segist vonast til þess að aðilar úti á landi geti nælt sér í tækin og byrjað að æfa sem fyrst. „Það er það sem skiptir máli."


Hvað finnst ykkur, lesendur kærir?

Ljúfleikinn

Ég á það til að hugsa ansi mikið um það sem ég á ekki, eða það sem miður fer í lífinu og heiminum almennt. Undanfarna daga hef ég hins vegar reynt að taka meðvitaða ákvörðun um að einblína á það sem ég á, þá sem ég tengist og litlu góðu hluta sem gerast á hverjum degi.

Fyrir viku síðan átti Eva Stína vinkona mín sitt annað barn, yndislegan dreng sem hefur hlotið nafnið Hjálmar Snær. Þau búa í Kaupmannahöfn þar sem hún kynntist manninum sínum, Anders. Fyrst hugsaði ég bara um það hversu sjaldan ég myndi hitta þau, hvað það væri erfitt að vera svona sitt í hvoru landinu en svo ákvað ég að ég væri nú bara ansi heppin að þekkja þau yfir höfuð!

Einbeita sér að því góða, fólkið mitt - það er lífsmottóið þessa dagana... :)

The return of the Lára

Ég er komin heim frá Lundúnum. Kom meira að segja heim á mánudaginn en sökum anna og flugþreytu hef ég ekki haft andann til að skrifa hérna.

London var frábær, eins og alltaf. Komst að því að það er alveg sama hvernig veðrið er, hversu lengi maður þarf að bíða eftir lestinni, hversu margir dónalegir Lundúnarbúar rekast utan í mann og ryðjast framfyrir mann þá finnst mér borgin yndisleg.

Ég fór í fyrsta sinn í leikhús þarna úti - söngleikurinn MAMMA MIA! sem reyndist vera tær snilld! Abba lögin hljóma ennþá í huga mér, en núna tengd leikurunum og atriðum sem voru frábærlega útfærð. Get varla beðið eftir myndinni sem kemur út núna í sumar :)

Ég fór líka í fyrsta sinn í London Eye og fann reyndar nett fyrir lofthræðslu en bara á leiðinni upp. Ég var líka að asnast til að horfa beint niður - kjánaprik!

Að sjálfsögðu fylgdi smá verslun með þessu öllu saman og er ég ánægðust með myndavélina sem ég skellti mér á. Verð að hafa góða vél í reisunni minni í sumar!

Er núna að hamast við að klára að þýða landbúnaðarsamninginn og veit nú ýmislegt um grænmeti og ávexti sem ég vissi ekki áður og hefur Orðabankinn komið mér sífellt á óvart með Matarorðasafninu sínu.

Með kveðju af sjöundu hæðinni

Londres

Reykjavík í kvöld, London á morgun!

Áfram MA í gettu betur í kvöld!

Gröndal

Fór á tónleika í gærkvöldi með Ragnheiði Gröndal. Stúlkan sú var að syngja í Akureyrarkirkju og tók vel valin lög, bæði frumsamin og önnur. Ég held að hápunkturinn hafi verið þegar hún söng Hærra minn guð til þín og ég heyrði einhvern snökta hinum megin í kirkjunni. Magnaður söngur, eins einfalt og hugsast getur, yndislegt alveg.

Ég er búin að vera í blogglægð - finnst betra að segja ekkert en að búa eitthvað til úr engu. Ég er á leiðinni til London á föstudaginn svo ég bið núna um gott veður á fimmtudaginn því þá þarf ég að fljúga suður ;)

Þessa dagana læri ég allt um landbúnaðarafurðir, sérstaklega þær sem fást í Kanada og eru eða gætu verið fluttar hingað inn. Vissuð þið að til eru Buskabaunir?

Enn um kraftaverkin

Í gær tók rúv fyrir kærur (takið eftir, fleirtala) vegna viðureignar Kvennó og MH. Páll Ásgeir viðurkenndi mistök sín í spurningunni um kraftaverkið og baðst afsökunar á því. Hins vegar standa úrslitin og ætlar Kvennó að una þessum úrskurði. Kæra MH snérist um skilvinduna en henni var vísað frá. Kíkið á www.gettubetur.is fyrir frekar fréttir af þessari æsispennandi keppni ;)

Fortíðin

Ég setti inn gamla mynd hérna um daginn og ætla að setja inn aðra núna. Hér má sjá mig og eldri systur mína, Steinunni, með dularfulla sultukrukku. Mig grunar að ánamaðkar hafi komið við sögu :) Hversu æðisleg eru stígvélin mín? og KHB húfan hennar Steinunnar?

Mikið var lífið einfaldara þegar maður var svona lítill...

Gettu betur klúður

Ætlar enginn að segja neitt út af klúðrinu í gær?

Í spurningunni um kraftaverkið þegar Jesú mettaði fjöldann var beðið um fjölda manna (5000) og hvað hefði verið borðað, skv. Lúkasar guðspjalli. Klárlega stendur í biblíunni að það hafi verið 5 brauð og 2 fiskar. Kvennaskólinn svaraði báðum þessum atriðum rétt en Páll Ásgeir, dómari og spurningahöfundur sagði að það hefðu verið 5 fiskar og 2 brauð og því fengu þau ekki stig.

Þetta þarf að leiðrétta því Kvennaskólinn hefði, með þessu stigi, unnið áður en keppnin fór í bráðabana. Tók einhver annar eftir þessu??

Brussel

-Brussel er höfuðborg Belgíu. Nafnið kemur af gamla hollenska orðinu Bruocsella, Bruoc þýðir mýri og sella þýðir heima svo Brussel er "heimili í mýrinni"


-Manneken Pis eða Peðlingur piss er eitt frægasta kennimerki borgarinnar og hægt að kaupa alls kyns minjagripi með drengnum, m.a. penna (átti svoleiðis fyrir 12 árum).

-Samkvæmt óstaðfestum heimildum rignir að meðaltali 217 daga á ári í Brussel


-Neðanjarðarlestakerfið í Brussel er einungis síðar 1976 þó svo að premetro hafi verið starfrækt frá 1968.


-Brussel er "tvítyngd borg" (flæmska og franska) og það má sjá glöggt á götuskiltum borgarinnar. Þó eru útlendingar um fjórðungur íbúa borgarinnar og flestir þeirra tala ensku eða frönsku sín á milli.


-Belgískar vöfflur eru jafnfjölbreyttar og annað. Vaffla í Brussel er yfirleitt borin fram með flórsykri eða rjóma og stundum súkkulaði en hún er einnig notuð sem eftirréttur.

Ástæða þessara mola? Minn ástkæri Guðjón er að flytja til Brussel til að vinna hjá sendiherranum þar. Hans verður sárt saknað. Love you longtime Jacks...

Þankar um heimilistæki

Mig langar ofsalega mikið í svona hræivél. Þetta er Kenwood Patissier vélin og hjartað slær í alvörunni aukaslag þegar ég sé hana. Kemur kannski ekki á óvart að mig langar í rauðu týpuna?

Annars hef ég mikið hugsað um heimilistæki undanfarið, aðallega vegna þess að mig vantar þau nokkur. Ég þarf að kaupa mér ryksugu. Ég þarf líka að kaupa mér moppu og fleira og langar í Magnaða moppuskaftið sem var að hækka greinilega, humph! Kostaði aðeins minna fyrir hálfum mánuð síðan! Mig vantar líka brauðrist og hraðsuðuketil og Martan í mér er búin að finna 2 ristar en ketillinn lætur bíða eftir sér. Enda eflaust með pott á helli og bölva mér í hvert skipti fyrir að vera nú ekki búin að drullast til að sætta mig við eitthvað á tilboði.

En þurfum við öll þessi tæki? Ég þekki 1 par sem á pizzaofn og virkilega notar hann, 2 pör sem eiga og nota ísvélar en poppvélar, raclette sett, súkkulaði fondú-pottar (og gosbrunnar, n.b.)ásamt hinum ýmsu matvinnsluvélum standa yfirleitt rykfallin inni í skáp og sjá sjaldan dagsbirtuna.

Nú spyr ég ykkur: hvaða tæki býr í skápnum hjá ykkur sem aldrei eða sjaldan er notað?

Bylur

hó hó, hí hí, ha ha!

Loksins kom óveðrið til Akureyrar! Ég beið og beið og vonaði en aldrei varð veðrið nógu leiðinlegt til að hægt væri að kalla það vetrarveður. Í morgun beið mín fjall af snjó á bílnum og annað fjall beint fyrir framan hann. Hmm. Í fyrsta sinn efaðist ég um getu litla Aygo en svo mundi ég eftir Top Gear Winter Olympics þar sem þeir fóru í Hokkíleik með bílana og ég tók gleði mína á ný. Fyrst þeir gátu gert það í Lillehammer í Noregi þá gæti ég komist í vinnuna á Akureyri, Íslandi!

Götur bæjarins höfðu allar verið ruddar svo ekki var erfitt að komast upp að Borgum en þar tók annað við. Búið var að ryðja litlu plönin en ýtan var akkúrat í aðreininni svo ég ákvað að leggja bara á stóra planinu. Big mistake! Þar var ekkert búið að ýta og lenti ég því í vægast sagt skemmtilegum hasarakstri þar sem ég vonaðist til að sleppa án þess að festa mig og verða mér til skammar! Ég hló frekar mikið þar sem ég rásaði um og komst loks út af planinu aftur og framhjá ýtunni.

Nú bíð ég bara eftir frostinu mikla sem á víst að skella á okkur á laugardaginn. Best að kaupa Swiss Miss og baka skúffuköku.

Kom mér svo sem ekki á óvart

Sá þetta hjá Sverri Páli og Doktornum:

82% Barack Obama
80% Hillary Clinton
80% Bill Richardson
78% Chris Dodd
78% John Edwards
77% Dennis Kucinich
76% Joe Biden
72% Mike Gravel
41% Rudy Giuliani
35% John McCain
29% Mitt Romney
26% Mike Huckabee
19% Tom Tancredo
18% Ron Paul
17% Fred Thompson

2008 Presidential Candidate Matching Quiz